Bosula jwa motho
Pesalema ya ga Dafite, motlhanka wa ga Jehofa. Ya moopedi yo mogolo.
1Tlolo ya moikepi
e bua mo pelong ya me,
ya re: Ga go na poifo ya Modimo
fa pele ga matlho a gagwe.
2Gonne o iphora mo matlhong
a gagwe, a re,
boikepo jwa gagwe ga bo ketla
bo lemogwa, bo ilwa.
3Mafoko a molomo wa gagwe
ke boikepo le tsietso fela;
o baketse go nna botlhale
le go dira molemo.
4O loga maano a boikepo
mo bolaong jwa gagwe;
o ipaya mo tseleng
e e seng molemo;
ga a feretlhwe ke bosula.
Lorato lwa Modimo lo lo tlhomameng
5Bopelonomi jwa gago jwa lorato
Jehofa, bo kwa magodimong;
boikanngo jwa gago
bo fitlha kwa marung.
6Tshiamo ya gago e tshwana
jaaka dithaba tsa Modimo;
dikatlholo tsa gago
ke lediba le le boteng jo bogolo;
Jehofa, o tlamela batho le ditshedi.
7Ana bopelonomi jwa gago jwa lorato
bo botlhokwa jang, Modimo!
E bile bana ba batho ba tshabela
mo moriting wa diphuka tsa gago.
8Monono wa ntlo ya gago
ba tlaa o kgora thata;
o tlaa ba nosa ka noka
ya tse di natefang tsa gago.
9Gonne motswedi wa botshelo
o ntse nao;
mo leseding la gago
re tlaa bona lesedi.
10A o ko o tsweleleletse bopelonomi
jwa gago jwa lorato
mo go ba ba go itseng;
le tshiamo ya gago
mo go ba ba dipelo di thokgameng.
11A lonao lo lo mabela
lo se tle fa go nna;
a seatla sa moikepi se se nkgarametse.
12Gone ba ba dirang boikepo ba ole;
ba gateletswe,
mme ga ba ketla ba nonofa go tsoga.
