Pesalema 33

₁Itumeleng mo go Jehofa,

lona basiami; pako ke bontle

jo bo tshwanetseng

ba ba thokgameng.

₂Ntshetsang Jehofa malebogo

ka harepe;

lo mo opelele ka saletare

se se ditlhale di some.

₃Mo opeleleng sefela se seša;

letsang ka botswerere,

ka modumo o mogolo.

₄Gonne lefoko la ga Jehofa le siame;

le tiro yotlhe ya gagwe

e dirwa mo boikanyegong.

₅O rata tshiamo le tshiamiso;

lefatshe le tletse lorato

lo lo tlhomameng lwa ga Jehofa.

₆Magodimo a dirilwe ka lefoko

la ga Jehofa; le lesomosomo

lotlhe le le mo go one

ka mowa wa molomo wa gagwe.

₇O kgobokanya metsi a lewatle

a nne jaaka mokoa;

o beile madiba a a botengteng

mo matlong a polokelo.

₈A lefatshe lotlhe le boife Jehofa;

a banni botlhe ba lefatshe

ba mo sisimoge.

₉Gonne o ne a bua,

mme ga dirala; a laola,

mme ga ema ka tlhomamo.

₁₀Jehofa o dira kgakololo ya merafe

go nna lefela;

o dira megopolo ya ditšhaba

go nna e se na tiro.

₁₁Kgakololo ya ga Jehofa

e eme ka tlhomamo ka

bosenabokhutlo,

dikgopolo tsa pelo ya gagwe

go ya tshikatshikeng.

₁₂Go sego morafe

o Jehofa e leng Modimo wa one;

batho ba o ba itshenketseng

gore e nne boswa jwa gagwe ka esi.

₁₃Jehofa o okomela

a le kwa legodimong;

o bona bana botlhe ba batho;

₁₄a le mo felong ga boago jwa gagwe,

o ntsha matlho

o a digela mo banning ba lefatshe.

₁₅E bong ene

yo o bopang dipelo tsa bone botlhe,

yo o akanyang ditiro tsotlhe

tsa bone.

₁₆Ga go na kgosi epe e e tleng

e bolokwe ke bontsi jwa ntwa;

motho yo o senatla

ga a ke a gololwa

ke thata e kgolo.

₁₇Pitse ke selo sa lefela fela go boloka;

le gone ga e ketla e falodisa ope

ka thata e kgolo ya yone.

₁₈Bonang, leitlho la ga Jehofa

le mo go ba ba mmoifang,

mo go ba ba solofelang

mo boutlwelongbotlhoko

jwa gagwe;

₁₉go golola mowa wa bone mo losong,

le go ba tshedisa mo mosweleng.

₂₀Mowa wa rona

o ntse o lebeletse Jehofa;

ke ene thuso ya rona,

le thebe ya rona.

₂₁Gonne pelo ya rona

e tlaa itumela mo go ene,

ka gobo re ikantse

mo ineng la gagwe le le boitshepo.

₂₂“Jehofa, a boutlwelobotlhoko

jwa gago bo nne mo go rona,

fela ka fa re solofetseng mo go wena

ka teng.”