Pesalema 3
Thapelo ya moso ya boikanyo mo Modimong
Pesalema ya ga Dafite ya jale ka a tshaba Abesalome morwawe.
1Jehofa, ana baganetsi ba me
ba ntsifetse jang!
Bone ba ba ntsogologelang
ba bantsi.
2Ba bantsi ba ba buang
ka ga mowa wa me ba re:
“Ga a na go thusiwa gope
ke Modimo.” Sela.
3Wena Jehofa,
o thebe ka ntlha tsotlhe tsa me;
o kgalalelo ya me
le motsholetsa tlhogo ya me.
4Ke tle ke bitse Jehofa
ka lentswe la me, mme a nkarabe
a le mo thabaneng ya gagwe
e e boitshepo. Sela.
5Ka rapama, mme ka robala;
ka tsoga;
ka go bo Jehofa o a nkokotletsa.
6Ga nketla ke boifa makgolokgolo
a batho ba ba inkemiseditseng
ka ntlha tsotlhe.
7Tloga o eme, Jehofa;
o mpoloke, Modimo wa me;
gonne o iteile
baba ba me botlhe lesama;
o robile meno a baikepi.
8Poloka ke ya ga Jehofa;
tshegofatso ya gago
a e nne mo bathong ba gago. Sela.
© Bible Society of South Africa 1992. Used with permission. All rights reserved.
