Pesalema 2

₁Ana merafe e šakgaletseng,

le ditšhaba di tlhatlhanyetsang

selo sa boithamako?

₂Dikgosi tsa lefatshe

di a ikemisa, le balaodi

ba logisanya maano, ka ga Jehofa,

le ka Motlodiwa wa gagwe, ba re:

₃“A re kgaoleng dithapo tsa bone,

le megala ya bone

re e latlhe mo go rona.”

₄Ene yo o dutseng mo magodimong

o tlaa tshega;

Jehofa o tlaa ba sotla.

₅Ke gone foo o tlaa buang nabo

ka bogale jwa gagwe jo bogolo,

o tlaa ba rema marapo

ka bogale jwa gagwe jo bo tukang:

₆“Le fa go ntse jalo

ke tlhomile kgosi ya me

mo thabeng ya me

e e boitshepo ya Sione.”

₇Ke tlaa bolela ka ga taolo;

Jehofa o ntheile a re:

“O morwaake;

ka tsatsi leno ke go tsetse.

₈Ntopa, mme ke tlaa go naya merafe

go nna boswa jwa gago,

le dikhutlo tsa lefatshe

go nna thuo ya gago.

₉O tlaa ba thubakanya

ka tsamma ya tshipi;

o tlaa ba phatlakanya

jaaka sejana sa mmopi.”

₁₀Ke gone jaana

tlhalefang, lona dikgosi;

lo rutege, lona baatlhodi ba lefatshe.

₁₁Direlang Jehofa ka poifo,

mme lo itumele ka tlakaselo.

₁₂Atlang morwa,

gore e se re gongwe a galefa,

mme lwa nyelela mo tseleng,

gonne bogale jwa gagwe

bo tlaa akofa bo tuka.

Go sego bone botlhe

ba ba mo ikanyang.