Pesalema 148

₁Bakang Jehofa, lo bakeng

Jehofa lo le kwa magodimong;

mmakeng mo mafelong a a godimo.

₂Mmakeng lona lotlhe baengele

ba gagwe; mmakeng lona lotlhe

masomosomo a gagwe.

₃Lo mmakeng letsatsi le kgwedi;

lo mmakeng lona lotlhe

dinaledi tsa lesedi.

₄Mmakeng lona magodimo

a magodimo, le lona metsi

a lo leng kwa godimo ga magodimo

₅A tsotlhe di bake leina la ga Jehofa;

gonne o ne a laola,

mme tsa tlholega.

₆Le gone

o di tlhomamiseditse bosakhutleng

le bosaengkae; o tlhomile molao

o o se ketlang o feta.

₇Bakang Jehofa lo le mo lefatsheng,

lona maruarua,

le lona lotlhe madiba a a boteng;

₈molelo le sefako;

kapoko le mouwane,

phefo e e matsubutsubu

e e dirafatsang lefoko la gagwe;

₉dithaba le dithabana tsotlhe;

ditlhare tse di ungwang,

le masetara otlhe;

₁₀diphologolo le dikgomo tsotlhe;

dilo tse di gagabang le dinonyane

tse di fofang;

₁₁dikgosi tsa lefatshe

le ditšhaba tsotlhe; dikgosana

le baatlhodi botlhe ba lefatshe;

₁₂makau a na le basetsana;

banna bagolo le banyana;

₁₃a ba bake leina la ga Jehofa;

gonne leina la gagwe ke lone losi

le le goletsegileng;

kgalalelo ya gagwe

e godimo ga lefatshe le legodimo.

₁₄O goleditse

lonaka lwa batho ba gagwe,

pako ya baitshepi ba gagwe botlhe;

e bong bana ba Iseraele,

e le tšhaba e e gaufi le ene.

Bakang Jehofa.