Pesalema 145

₁Modimo wa me,

ke tlaa go godisa, Kgosi;

ke tlaa baka leina la gago

ka bosakhutleng le ka bosaengkae.

₂Ke tlaa go baka ka malatsi otlhe;

ke tlaa baka leina la gago

ka bosakhutleng le ka bosaengkae.

₃Jehofa o mogolo,

mme o na le go bakwa thata;

bogolo jwa gagwe ga bo na phukutso.

₄Losika longwe

lo tlaa baka ditiro tsa gago

go ya losikeng lo longwe,

mme lo tlaa kakanya

ditiro tsa gago tsa bonatla.

₅Ke tlaa akanya borena

jo bo galalelang

jwa tlotlego ya gago,

le ditiro tsa gago

tse di gakgamatsang.

₆Batho ba tlaa bua

ka ga bonatla jwa ditiro tsa gago

tse di boitshegang;

mme ke tlaa bolela

bogolo jwa gago.

₇Ba tlaa bolela kgakologelo

ya molemo o mogolo wa gago,

ba tlaa opela

ka ga tshiamo ya gago.

₈Jehofa o pelotshweu,

o tletse pelotlhomogi;

o bonya go galefa,

mme o na le boutlwelobotlhoko

jo bogolo.

₉Jehofa o molemo mo go tsotlhe;

mautlwelobotlhoko a manana

a gagwe

a okame ditiro tsotlhe tsa gagwe.

₁₀Ditiro tsotlhe tsa gago

di tlaa go ntshetsa malebogo, Jehofa;

le baitshepi ba gago

ba tlaa go baka.

₁₁Ba tlaa bua

ka ga kgalalelo ya bogosi jwa gago,

ba bua ka ga thata ya gago;

₁₂go itsise bana ba batho

ditiro tsa gagwe tsa bonatla,

le kgalalelo ya borena

jwa bogosi jwa gagwe.

₁₃Bogosi jwa gago

ke bogosi jo bo se nang bokhutlo,

le puso ya gago

e eme go ya ditshikatshikeng tsotlhe.

₁₄Jehofa o tshegetsa botlhe

ba ba wang,

o topalatsa botlhe ba ba obameng.

₁₅Matlho a dilo tsotlhe

a lebeletse wena;

mme o tle o di fe dijo tsa tsone

mo metlheng e e lebanyeng.

₁₆O huporolola seatla sa gago,

o kgorise keletso

ya ditshedi tsotlhe fela.

₁₇Jehofa o tshiamo

mo ditseleng tsotlhe tsa gagwe,

o pelotshweu mo ditirong

tsotlhe tsa gagwe.

₁₈Jehofa o gaufi le botlhe

ba ba mmitsang,

e bong botlhe ba ba mmitsang

ka boammaaruri.

₁₉O tlaa dirafatsa keletso

ya ba ba mmoifang;

le gone o tlaa utlwa pitso

ya bone, a ba boloke.

₂₀Jehofa o boloka botlhe

ba ba mo ratang;

mme baikepi botlhe o tlaa ba senya.

₂₁Molomo wa me

o tlaa bua pako ya ga Jehofa;

a nama yotlhe e bake

leina la gagwe le le boitshepo,

ka bosakhutleng le ka bosaengkae.