Pesalema 139

₁Jehofa, o mphukuditse,

mme o nkitsile.

₂O itse go dula ga me

la go nanoga ga me,

o tlhaloganyetsa mogopolo wa me

kwa kgakala.

₃O hukutsa tselana ya me

le go rapama ga me,

mme o tlwaetse

mekgwa ya me yotlhe fela.

₄Gonne ga go na lefoko lepe

mo lolemeng lwa me, fa e se gore,

Jehofa o le itse lotlhe fela.

₅O mpotile kwa morago le kwa pele,

o beile seatla sa gago mo go nna.

₆Kitso e e ntseng jalo

e nkgakgamatsa bobe;

e kwa godimo,

ga ke ka ke ka fitlha kwa go yone.

₇Kana ke ka bo ke ka ya kae

ke tlogela mowa wa gago?

Kgotsa sebonalo sa gago

nka se tshabela kwa kae?

₈Fa ke tlhatlogela kwa legodimong,

o bo o le gone;

fa ke ala phate ya me mo Bobipong,

bona, o bo o le gone fela.

₉Fa ke tsaya diphuka tsa moso,

ke ba ke aga kwa tengteng

ga dikhutlo tsa lewatle.

₁₀Le gone seatla sa gago

se tlaa bo se nkgoga,

le seatla sa gago se segolo

se tlaa ntshwara.

₁₁Fa ke re:

“Ruri lefifi le tlaa mpipa,

le lesedi le le ntikologileng

le tlaa nna bosigo.”

₁₂Le e leng lefifi ga le go bipele sepe;

mme bosigo bo phatsima jaaka

motshegare; lefifi le lesedi ke mo

go tshwanang fela mo go wena.

₁₃Gonne o bopile diphilo tsa me;

wa mpipa

ke le mo sebopelong sa ga mme.

₁₄Ke tlaa go ntshetsa malebogo;

gonne ke dirilwe ka mo go

boitshegang

le ka mo go gakgamatsang;

di a gakgamatsa, ditiro tsa gago;

mme goo mo,

mowa wa me o a go itse sentle.

₁₅Popego ya me

ga e a ka ya go fitlhegela

jale ka ke dirwa mo bosaitsiweng,

ka ke bopiwa ka maatlametlo

kwa tlasetlase ga lefatshe.

₁₆Matlho a gago

a ne a bona go nna ga me

ke ise ke bopege,

mme mo lokwalong lwa gago

go ne go kwadilwe

ditokololo tsotlhe tsa me,

tse di neng di ntse di bopiwa

ka letsatsi le letsatsi, le mororo

go ise go nne epe ya tsone.

₁₇Le gone, Modimo,

megopolo ya gago e ratega jang

mo go nna! Fa e sopaanye,

e a bo e le kgolo jang!

₁₈Fa nka bo ke e bala,

e a bo e le mentsi thata,

go feta palo ya mošawa;

e a re ke kubuga

ke be ke ntse ke na nao fela.

₁₉Ruri, o tlaa bolaya baikepi,

Modimo;

ke gone ntlogelang,

lona batho ba lo nyorelwang madi

a batho.

₂₀Gonne ba bua maswe ka ga gago,

le baba ba gago

ba umakela leina la gago lefela.

₂₁Jehofa, a ga ke ile bone

ba ba go ilang?

A ga ke a tlhokofadiwa

ke ba ba go tsogologelang?

₂₂Ke a ba ila ka kilo e tona thata;

ke ba kaya e le baba ba me.

₂₃Modimo, a ko o mphukutse,

o bo o itse pelo ya me;

nteka, mme o itse megopolo ya me;

₂₄o bone fa go na le mokgwa mongwe

wa boikepo mo go nna;

mme o nkgoge

mo tseleng e e sa khutleng.