Pesalema 122

₁E rile ba nthaya ba re:

“A re yeng kwa ntlong

ya ga Jehofa,” ka itumela.

₂Dinao tsa rona di eme

mo teng ga dikgoro tsa gago,

wena Jerusalema;

₃Jerusalema,

o agilwe jaaka motse o o kitlanyeng;

₄kwa ditso di tlhatlogelang gone,

e bong ditso tsa ga Jehofa,

go nna tshupo mo go Iseraele,

go ntshetsa leina la ga Jehofa

malebogo.

₅Gonne ditulo tsa bogosi

tsa katlholelo di beilwe gone,

e bong ditulo tsa bogosi

tsa ntlo ya ga Dafite.

₆Rapelelang kagiso ya Jerusalema:

“Ba ba go ratang ba tlaa

tlhogonolofala.

₇A go nne kagiso

mo teng ga dithako tsa gago,

le go tlhogonolofala mo teng

ga matlo a gago a dikgosi.”

₈Ka ntlha ya bana ba ga rre

le bankana ba me,

ke tlaa bua jaana ke re:

“Kagiso e nne mo teng ga gago.”

₉Ka ntlha ya ntlo ya ga Jehofa,

Modimo wa rona,

ke tlaa go batlela se se molemo.