Pesalema 121

₁Ke tlaa tsholeletsa matlho a me

kwa dithabeng;

thuso ya me e tlaa tswa kae?

₂Thuso ya me e tswa kwa go Jehofa,

yo o dirileng legodimo le lefatshe.

₃Ga a ketla a leseletsa

lonao lwa gago go tshikinyega;

yo o go dibelang

ga a ketla a otsela.

₄Bona, yo o dibelang Iseraele

ga a ketla a otsela,

le fa e le go robala.

₅Jehofa ke modibedi wa gago;

Jehofa ke moriti wa gago

ka fa ntlheng ya letsogo la gago

le le siameng.

₆Letsatsi ga le ketla le go tlhapela

motshegare,

le fa e le ngwedi bosigo.

₇Jehofa o tlaa go dibela

mo bosuleng;

o tlaa dibela mowa wa gago.

₈Jehofa o tlaa dibela go tswa ga gago

le go tsena ga gago,

go tloga fano gompieno

le go ya bosakhutleng.