Pesalema 119

₁Go sego bone ba ba

itekanetseng mo tseleng,

ba sepela mo molaong

wa ga Jehofa.

₂Go sego ba ba bolokang

ditshupo tsa gagwe,

ba mmatla ka pelo yotlhe.

₃Ee, ba bo ba sa dire tshiamololo

epe,

ba sepela fela

mo ditseleng tsa gagwe.

₄O re laeletse dikaelo tsa gago,

gore re di tlhokomele ka tlhoafalo.

₅Ao, a bo ditsela tsa me

di ka bo ne ne di tlhomametse

go tlhokomela ditao tsa gago!

₆Foo ke ne ke se ketla

ke tlhajwa ke ditlhong

mogang ke tsayang ditaolo

tsotlhe tsa gago tsia.

₇Ke tlaa go ntshetsa malebogo

ka thokgamo ya pelo,

mogang ke ithutang dikatlholo

tsa gago tse di siameng.

₈Ke tlaa ela ditao tsa gago tlhoko;

a ko o se ka wa ntlogelela ruri.

₉Ana motho wa lekau o tlaa

ntlafatsa tsela ya gagwe ka eng?

Ka go e tlhokomela

ka fa lefokong la gago.

₁₀Ke go batlile

ka pelo ya me yotlhe fela;

a ko o se ka wa ntesa

ka timelwa ke ditaolo tsa gago.

₁₁Ke beile lefoko la gago

mo pelong ya me

gore ke se ka ka go leofela.

₁₂A go bakwe Jehofa;

nthuta ditao tsa gago.

₁₃Ka dipounama tsa me

ke kakantse dikatlholo tsotlhe

tsa molomo wa gago.

₁₄Ke ntse ke itumetse

mo tseleng ya ditshupo tsa gago

mo go kanang ka fa ke itumelela

dikhumo tsotlhe.

₁₅Ke tlaa tlhatlhanya dikaelo tsa gago,

ke tlaa tsaya ditsela tsa gago tsia.

₁₆Ke tlaa ijesa monate

mo ditaong tsa gago;

ga nketla ke lebala lefoko la gago.

₁₇Direla motlhanka wa gago sentle

ka pelo e e feteletseng,

gore ke tle ke tshele;

jalo ke tlaa tsaya lefoko la gago tsia.

₁₈Budulola matlho a me,

gore ke bone dilo tse di

gakgamatsang tsa molao wa gago.

₁₉Ke mojaki fela mo lefatsheng,

se ntshubele ditaolo tsa gago.

₂₀Mowa wa me o phatlolwa

ke go tlhologelelwa dikatlholo

tsa gago ka metlha yotlhe.

₂₁O kgalemetse bapelompe,

ba ba hutsegileng, ba ba

timelelwang ke ditaolo tsa gago.

₂₂Tlosa kgobo le lonyatso

mo go nna;

gonne ke bolokile ditshupo tsa gago.

₂₃Dikgosana le tsone tsa dula,

tsa nna tsa ntsheba;

mme motlhanka wa gago a nna

a tlhatlhanya ditao tsa gago fela.

₂₄Ditshupo tsa gago le tsone

di njesa monate;

ke digakolodi tsa me.

₂₅Mowa wa me o ngaparetse lorole;

ntsitsibosa ka fa lefokong la gago.

₂₆Ke ne ka kakanya ditsela tsa me,

mme wa nkaraba;

nthuta ditao tsa gago.

₂₇Ntlhaloganyetsa

tsela ya dikaelo tsa gago;

jalo ke tlaa tlhatlhanya

ditiro tsa gago tse di gakgamatsang.

₂₈Ke nyera mowa ka go imelesega;

nthatafatsa ka fa lefokong la gago.

₂₉Tlosa tsela ya maaka mo go nna;

o nneye molao wa gago

ka pelotshweu.

₃₀Ke itshenketse tsela ya boikanngo;

dikatlholo tsa gago

ke di tlhomile fa pele ga me.

₃₁Ke ngaparetse ditshupo tsa gago;

Jehofa,

o se ka wa ntlhabisa ditlhong.

₃₂Ke tlaa taboga mo tseleng

ya ditaolo tsa gago,

mogang o katolosang pelo ya me.

₃₃Nthuta tsela

ya ditao tsa gago,

₃₄Nnaya tlhaloganyo,

mme ke tlaa boloka molao wa gago;

ee, ke tlaa o tlhokomela

ka pelo ya me yotlhe fela.

₃₅Ntseisa tsela ya ditaolo tsa gago;

gonne ke ja monate mo go tsone.

₃₆Sokololela pelo ya me

mo ditshupong tsa gago,

e seng mo bopelotshetlheng.

₃₇Faposa matlho a me

mo go lebeng boithamako,

o ntsitsibose mo ditseleng tsa gago.

₃₈Tlhomamisetsa motlhanka wa gago

lefoko la gago,

yo ke leng wa poifo ya gago.

₃₉Thibosa kgobo ya me,

e ke e tshabang;

gonne dikatlholo tsa gago

di molemo.

₄₀Bona, ke ntse ke tlhologeletswe

dikaelo tsa gago;

ntsitsibosa mo tshiamong ya gago.

₄₁A mautlwelobotlhoko a gago

a tle mo go nna, Morena,

e bong poloka ya gago,

ka fa lefokong la gago.

₄₂Jalo ke tlaa bo ke na le go fetola

yo o nkgobang;

gonne ke ikanya lefoko la gago.

₄₃Lefoko la gago

o se ka wa le tlosetsa ruri

mo molomong wa me;

gonne ke ntse ke solofetse

mo dikatlholong tsa gago.

₄₄Jalo ke tlaa tlhokomela

molao wa gago ka gale,

ka bosakhutleng le ka bosaengkae.

₄₅Ke tlaa tsamaya ke gololosegile;

gonne ke senkile dikaelo tsa gago.

₄₆Le gone ke tlaa bua

ka ga ditshupo tsa gago,

le fa pele ga dikgosi

ga nketla ke tlhajwa ke ditlhong.

₄₇Ke tlaa ijesa monate

mo ditaolong tsa gago,

tse ke di ratileng.

₄₈Le tsone diatla tsa me,

ke tlaa di tsholeletsa

kwa ditaolong tsa gago,

tse ke di ratileng;

mme ke tlaa tlhatlhanya ditao

tsa gago.

₄₉Gakologelwa lefoko le o

le buileng le motlhanka wa gago,

gonne o ntsholofeditse.

₅₀Ke lone kgomotso ya me

mo pitlaganong;

gonne lefoko la gago

le ntsitsibositse.

₅₁Ba ba pelompe

ba nngongotse segolo thata;

le fa go ntse jalo ga ke a ngosela

mo molaong wa gago.

₅₂Ke ntse ke gakologetswe

dikatlholo tsa gago

tsa bogologolo Jehofa,

mme ke ikgomoditse.

₅₃Ke tshwerwe ke kgakatsego

e e molelo ka ntlha ya baikepi

ba ba tlogelang molao wa gago.

₅₄Ditao tsa gago

e ntse ke tsone dikopelo tsa me

mo ntlong ya loeto lwa me.

₅₅Ke ntse ke gakologetswe

leina la gago, Jehofa, bosigo,

mme ke tlhokometse molao wa gago.

₅₆Moo ke ntse ke na nago,

gonne ke bolokile dikaelo tsa gago.

₅₇Jehofa ke kabelo ya me; ke rile,

ke tlaa tlhokomela mafoko a gago.

₅₈Ke ne ka rapelela

lesego la gago thata,

ka pelo ya me yotlhe;

o nne kutlwelobotlhoko mo go nna,

ka fa lefokong la gago.

₅₉Ka akanya mekgwa ya me,

ka busetsa dinao tsa me

mo ditshupong tsa gago.

₆₀Ka itlhaganela,

ka se ka ka nyafala

go tlhokomela ditaolo tsa gago.

₆₁Megala ya boikepi e ntharile,

mme ga ke a lebala molao wa gago.

₆₂Bosigo gare ke tlaa tsoga

ke go leboga,

ka ntlha ya dikatlholo tsa gago

tse di siameng.

₆₃Ke monkana wa botlhe

ba ba go boifang,

le wa ba ba tlhokomelang

dikaelo tsa gago.

₆₄Jehofa, lefatshe le tletse

kutlwelobotlhoko ya gago;

nthuta ditao tsa gago.

₆₅O diretse motlhanka wa gago sentle,

Jehofa, fela ka fa lefokong la gago.

₆₆Nthuta temogo e e molemo,

le kitso;

gonne ke dumetse ditaolo tsa gago.

₆₇E rile ke ise ke patikwe ka timela;

mme jaanong ke tlhokomela lefoko

la gago.

₆₈O molemo, mme o dira molemo;

nthuta ditao tsa gago.

₆₉Ba ba pelompe ba ntogetse kako;

ke tlaa boloka dikaelo tsa gago

ka pelo yotlhe ya me.

₇₀Pelo ya bone e nonne jaaka mafura,

mme nna ke natefelwa

mo molaong wa gago.

₇₁Go ntiretse molemo

fa ke ntse ke patikwa;

gore ke tle ke ithute ditao tsa gago.

₇₂Molao wa molomo wa gago

o molemo mo go nna

bogolo go makgolokgolo a gouta le

selefera.

₇₃Diatla tsa gago

di ntirile tsa ba tsa mpopa;

nnaya tlhaloganyo,

gore ke ithute ditaolo tsa gago.

₇₄Ba ba go boifang

ba tlaa mpona, ba itumela;

gonne ke solofetse

mo lefokong la gago.

₇₅Ke a itse Jehofa,

fa dikatlholo tsa gago di le tshiamo,

le gore o nkutlwisitse botlhoko

e le ka go ntshiamisa.

₇₆Ke a go rapela,

a ko o mme mapelonomi a gago

a lorato a nne kgomotso ya me,

ka fa lefokong la gago

mo motlhankeng wa gago.

₇₇A mautlwelobotlhoko

a manana a gago a tle mo go nna,

gore ke tshele;

gonne molao wa gago

ke mo go njesang monate.

₇₈A ba ba pelompe

ba tlhajwe ke ditlhong, gonne

ba ntigile ka mo go sa siamang;

mme nna,

ke tlaa tlhatlhanya dikaelo tsa gago.

₇₉A ba ba go boifang

ba sokologele mo go nna,

mme ba tlaa itse ditshupo tsa gago.

₈₀A pelo ya me e itekanele

mo ditaong tsa gago;

gore ke se ka ka tlhajwa ke ditlhong.

₈₁Mowa wa me

o idibalela poloka ya gago,

mme ke solofetse mo lefokong

la gago.

₈₂Matlho a me

a lapela lefoko la gago,

ka ke ntse ke re:

“O tlaa nkgomotsa leng?”

₈₃Gonne ke ntse jaaka sekoo

mo mosing fela;

le fa go ntse jalo

ga ke lebale ditao tsa gago.

₈₄Ana malatsi a motlhanka wa gago

ke a le kaye?

O tlaa dirafatsa katlholo leng

mo go ba ba mpogisang?

₈₅Ba ba pelompe

ba nkepetse mamena, e bong bone

ba ba sa nnang ka fa molaong

wa gago.

₈₆Ditaolo tsa gago tsotlhe

di boikanngo;

ba mpogisa ka mo go sa siamang;

wena, a ko o nthuse.

₈₇Ba batlile go nja ba ntshwetsa

mo lefatsheng;

mme ga ke a ka ka tlogela

dikaelo tsa gago.

₈₈Ntsitsibosa

ka fa mapelonoming a gago;

jalo ke tlaa tlhokomela tshupo

ya molomo wa gago.

₈₉Jehofa, lefoko la gago

le nnetse ruri ka bosakhutleng

mo legodimong.

₉₀Boikanngo jwa gago bo

fitlha mo tshikatshikeng;

o tlhomamisitse lefatshe,

mme le ntse.

₉₁Di ntse le gompieno

ka fa ditaolelong tsa gago;

gonne dilo tsotlhe

ke batlhanka ba gago.

₉₂Fa molao wa gago o ka bo

o se ka wa nna boitumelo jwa me,

nka bo ke nyeletse mo pitlaganong

ya me.

₉₃Ga nketla ke lebala

dikaelo tsa gago gope;

gonne o ntsitsibositse ka tsone.

₉₄Ke wa gago, o mpoloke;

gonne ke batlile dikaelo tsa gago.

₉₅Baikepi ba ntaletse

gore ba tle ba ntshenye,

mme ke tlaa tlhatlhanya

ditshupo tsa gago.

₉₆Ke bonye bokhutlo jwa boitekanelo

jotlhe;

mme taolo ya gago e atlhame thata.

₉₇Ana ke rata molao wa gago jang!

Ke one go tlhatlhanya ga me

ka letsatsi lotlhe.

₉₈Ditaolo tsa gago di ntlhalefisa

go gaisa baba ba me;

gonne di nna le nna ka gale.

₉₉Ke na le tlhaloganyo

go gaisa baruti botlhe ba me;

gonne ditshupo tsa gago

ke tsone tlhatlhanyo ya me.

₁₀₀Ke tlhaloganya bogolo go batsofe,

gonne ke bolokile dikaelo tsa gago.

₁₀₁Ke thibile dinao tsa me

mo ditseleng tsotlhe tse di bosula,

gore ke tle ke tlhokomele

lefoko la gago.

₁₀₂Ga ke a fapoga dikatlholo tsa gago;

gonne o nthutile.

₁₀₃Ana mafoko a gago a botshe jang

mo magalapeng a me;

ee, a gaisa dinotshe

mo molomong wa me.

₁₀₄Ke bona tlhaloganyo

ka dikaelo tsa gago;

ke gone ka moo ke ilang mokgwa

mongwe le mongwe wa phoro.

₁₀₅Lefoko la gago

ke lobone lwa dinao tsa me,

le lesedi la tsela ya me.

₁₀₆Ke ikanne,

mme ke go tlhomamisitse,

gore ke tlaa tlhokomela dikatlholo

tsa gago tse di siameng.

₁₀₇Ke utlwisitswe botlhoko thata;

ntsitsibosa Jehofa,

ka fa lefokong la gago.

₁₀₈Ke a go rapela, Jehofa,

a ko o amogele

ditshupelo tsa molomo wa me,

tse di leng tsa peleego,

mme o nthute dikatlholo tsa gago.

₁₀₉Mowa wa me o ntse o le

mo seatleng sa me fela ka gale;

le fa go ntse jalo

ga ke lebale molao wa gago.

₁₁₀Baikepi ba nthaetse ka seru;

le fa go ntse jalo ga ke a ka

ka timelwa ke dikaelo tsa gago.

₁₁₁Ditshupo tsa gago ke di tseile

go nna boswa ka bosakhutleng;

gonne tsone,

ke boipelo jwa pelo ya me.

₁₁₂Ke sokololetse pelo ya me

kwa go direng ditao tsa gago

ka bosakhutleng,

e leng go ya kwa bokhutlong.

₁₁₃Ke ila ba ba maitlhomo mabedi,

mme molao wa gago one

ke a o rata.

₁₁₄O boitshubelo jwa me,

le thebe ya me;

ke solofetse mo lefokong la gago.

₁₁₅Ntlogelang, lona badira bosula,

gore ke boloke ditaolo

tsa Modimo wa me.

₁₁₆Nkokotletsa ka fa lefokong la gago,

gore ke tshele;

a ke se ka ka tlhabisiwa ditlhong

ke tsholofelo ya me.

₁₁₇Ntshegetsa,

mme ke tlaa bolokesega;

le ditao tsa gago

ke tlaa di tsaya tsia ka gale.

₁₁₈O nyaditse botlhe

ba ba timelwang ke ditao tsa gago;

gonne tsietso ya bone

ke maaka fela.

₁₁₉O a tle o latlhe baikepi botlhe

ba lefatshe jaaka manyelo;

ke gone ka mo

ke ratang ditshupo tsa gago.

₁₂₀Nama ya me

e roromisiwa ke go go boifa;

ke bile ke tshaba dikatlholo tsa gago.

₁₂₁Ke dirile katlholo le tshiamiso;

se ntlogele mo bapatiking ba me.

₁₂₂O nne moemedi wa molemo mo

boemong jwa motlhanka wa gago;

a ba ba bopelompe ba se mpatike.

₁₂₃Matlho a me

a lapela poloka ya gago,

le lefoko la gago la tshiamo.

₁₂₄Direla motlhanka wa gago

ka fa boutlwelongbotlhoko jwa gago,

o nthute ditao tsa gago.

₁₂₅Ke motlhanka wa gago,

nnaya tlhaloganyo, gore ke tle

ke itse ditshupo tsa gago.

₁₂₆Ke lobaka lwa ga Jehofa go dira;

gonne ba thatholotse

molao wa gago.

₁₂₇Ke gone ka moo ke ratang

ditaolo tsa gago bogolo go gouta,

ee, bogolo go gouta e e itshekileng.

₁₂₈Ke gone ka moo ke kayang

dikaelo tsa gago tsotlhe

ka ga dilo tsotlhe, gore di tshiamo;

mme ke ila mokgwa mongwe

le mongwe wa phoro.

₁₂₉Ditshupo tsa gago di a gakgamatsa;

ke gone ka moo mowa wa me

o di bolokang.

₁₃₀Go bolelesega ga mafoko a gago

go a senola; go tle go neye

ba ba sa tlhalefang tlhaloganyo.

₁₃₁Ka momolola molomo wa me,

mme ka fegelwa;

gonne ke ne ke tlhologeletswe

ditaolo tsa gago.

₁₃₂Sokologela mo go nna,

o nkutlwele botlhoko,

jaaka o ne o ntse o tle o direle

ba ba ratang leina la gago.

₁₃₃Rulaganya dikgato tsa me

mo lefokong la gago;

a go se nne boikepo bope jo bo

tlaa nnang le taolo mo go nna.

₁₃₄Nthekolola mo patikong ya motho;

jalo ke tlaa tlhokomela

dikaelo tsa gago.

₁₃₅Phatsimisetsa motlhanka wa gago

sefatlhogo sa gago;

o bo o nthute ditao tsa gago.

₁₃₆Dinoka tsa metsi di ela

mo matlhong a me,

ka gobo ba sa tlhokomele

molao wa gago.

₁₃₇O tshiamo, wena, Jehofa;

le dikatlholo tsa gago di thokgame.

₁₃₈Ditshupo tsa gago

o di laotse mo tshiamong

le boikanngo tota.

₁₃₉Tlhoafalo ya me e njele ya

mphetsa,

gonne baganetsi ba me

ba lebetse mafoko a gago.

₁₄₀Lefoko la gago le itshekile thata;

ke gone ka moo motlhanka wa gago

o le ratang.

₁₄₁Ke monnye, ke bile ke a nyatsega;

le fa go ntse jalo

ga ke lebale ditao tsa gago.

₁₄₂Tshiamo ya gago

ke tshiamo e e sa khutleng,

le molao wa gago ke boammaaruri.

₁₄₃phuduego e ntshwere,

le tlalelo e e mahehe;

le fa go ntse jalo

ditaolo tsa gago

ke natefelo ya me.

₁₄₄Ditshupo tsa gago di tshiamo

ka bosakhutleng;

nnaya tlhaloganyo,

mme ke tlaa tshela.

₁₄₅Ke biditse ka pelo ya me yotlhe;

nkaraba Jehofa;

ke tlaa boloka ditao tsa gago.

₁₄₆Ke bileditse koo go wena;

mpoloka, mme ke tlaa

tlhokomela ditshupo tsa gago.

₁₄₇Ka raka mahube a moso, ka goa;

ka solofela mo mafokong a gago.

₁₄₈Matlho a me

a ne a raka ditebeledi tsa bosigo,

gore ke tle ke tlhatlhanye

lefoko la gago.

₁₄₉Utlwa lentswe la me

ka fa bopelonoming jwa gago jwa

lorato; o ntsitsibose Jehofa,

ka fa dikatlholong tsa gago.

₁₅₀Ba ba latelang boikepo

ba a atamela;

ba kgakala le molao wa gago.

₁₅₁Wena o gaufi Jehofa;

ditaolo tsotlhe tsa gago

di boammaaruri.

₁₅₂Ke sa le ke itse bogologolo

ka ditshupo tsa gago,

fa o di tlhometse bosakhutleng.

₁₅₃Gopola patikego ya me,

mme o nkgolole;

gonne ga ke lebale molao wa gago.

₁₅₄Mpuelela mo kgannyeng ya me,

o bo o nthekolole;

ntsitsibosa ka fa lefokong la gago.

₁₅₅Poloko e kgakala le baikepi;

gonne ga ba batle ditao tsa gago.

₁₅₆Mautlwelobotlhoko a manana a gago

a magolo, Jehofa; ntsitsibosa

ka fa dikatlholong tsa gago.

₁₅₇Ba bantsi babogisi ba me,

le baganetsi ba me;

le fa go ntse jalo ga ke a ngosela

mo ditshupong tsa gago.

₁₅₈Ke ne ka leba ba ba dirang ka koko,

mme ka utlwa botlhoko

ka ba sa tlhokomele lefoko la gago.

₁₅₉A ko o gopole ka fa ke ratang

dikaelo tsa gago ka gone;

ntsitsibosa Jehofa,

ka fa bopelonoming jwa gago

jwa lorato.

₁₆₀Tshobokano ya lefoko la gago

ke boammaaruri;

nngwe le nngwe ya dikatlholo

tsa gago tse di siameng,

e eme ka bosakhutleng.

₁₆₁Dikgosana di mpogisitse ka bomo;

mme pelo ya me e eme

mo go sisimogeng lefoko la gago.

₁₆₂Ke itumela ka lefoko la gago, jaaka

motho yo o bonang thopo e kgolo.

₁₆₃Ke ila maaka, a mphedisa pelo ruri;

molao wa gago ke a o rata.

₁₆₄Ke tle ke go bake gasupa ka letsatsi,

ka ntlha ya dikatlholo tsa gago

tse di siameng.

₁₆₅Ba ba ratang molao wa gago

ba na le kagiso e kgolo;

ga ba na go kgopiwa gope.

₁₆₆Jehofa, ke ntse ke solofetse

poloka ya gago,

mme ke dirile ditaolo tsa gago.

₁₆₇Mowa wa me o tlhokometse

ditshupo tsa gago;

ke di rata segolo thata.

₁₆₈Ke tlhokometse dikaelo tsa gago,

le ditshupo tsa gago;

gonne mekgwa yotlhe ya me

e fa pele ga gago.

₁₆₉A go goa ga me

go atamele fa pele ga gago Jehofa;

nnaya tlhaloganyo

ka fa lefokong la gago.

₁₇₀A mekokotlelo ya me

e fitlhe fa pele ga gago;

nkgolola ka fa lefokong la gago.

₁₇₁A dipounama tsa me di bue pako;

gonne o nthuta ditao tsa gago.

₁₇₂A loleme lwa me

lo opele lefoko la gago;

gonne ditaolo tsotlhe tsa gago

di tshiamo.

₁₇₃A seatla sa gago

se iketleeletse go nthusa;

gonne ke itshenketse

dikaelo tsa gago.

₁₇₄Ke tlhologeletswe poloka ya gago,

Jehofa; molao wa gago

ke o o njesang monate.

₁₇₅A mowa wa me o tshele,

mme o tlaa go baka;

le dikatlholo tsa gago di ntshuse.

₁₇₆Ke timetse jaaka nku

e e ileng le naga;

batla motlhanka wa gago;

gonne ga ke lebale ditaolo tsa gago.