Pesalema 105

₁A ko lo ntshetseng Jehofa

malebogo,

bitsang leina la gagwe;

madiro a gagwe

lo a itsefatse mo ditšhabeng.

₂Mo opeleleng,

mo opeleleng dipako;

buang ka ga ditiro tsa gagwe tsotlhe

tse di gakgamatsang.

₃Kgantshang ka leina la gagwe

le le boitshepo;

a dipelo tsa ba ba batlang Jehofa

di itumele.

₄Batlang Jehofa le thata ya gagwe;

batlang sefatlhogo sa gagwe

ka bosakhutleng.

₅Gakologelwang ditiro tsa gagwe

tse di gakgamatsang

tse o di dirileng;

dikgakgamatso tsa gagwe,

le dikatlholo tsa molomo wa gagwe;

₆lona losika lwa ga Aberahame,

motlhanka wa gagwe;

lona bana ba ga Jakobe,

baitshenkedwi ba gagwe.

₇Ke ene Jehofa Modimo wa rona;

dikatlholo tsa gagwe

di mo lefatsheng lotlhe fela.

₈O ntse a gakologetswe

kgolagano ya gagwe

ka bosakhutleng,

e bong lefoko le o le laoletseng

dikokomana di le makgolo a some;

₉e bong kgolagano

e o neng a e dira le Aberahame,

le ikano ya gagwe le Isake;

₁₀mme ikano e,

a e tlhomamisetsa Jakobe

gore e nne molao o o emeng,

le mo go Iseraele

gore e nne kgolagano

e e sa khutleng.

₁₁Ka a re:

“Ke tlaa go naya lefatshe la Kanana,

go nna kabelo ya boswa jwa lona.”

₁₂E le jale

ba sa ntse ba se kaye mo palong;

ee, ba se kayenyana, ba bile

ba le bajaki fela mo go lone;

₁₃ba kgarakgatshega ka go nna

ba tlhomaganya merafe fela,

ba tswe mo bogosing bongwe

ba ye mo tšhabeng e nngwe.

₁₄Ga a ka a leseletsa motho ope

go ba direla tshiamololo;

ee, o ne a kgalemela dikgosi

ka ntlha ya bone;

₁₅a re:

“Se ameng batlodiwa ba me,

lo se ka lwa utlwisa

baperofeti ba me botlhoko bope.”

₁₆A biletsa leuba mo lefatsheng;

a roba seikokotlelo sotlhe

sa senkgwe.

₁₇A roma monna

yo o neng a ba etelela pele;

Josefe a rekisiwa, a nna motlhanka;

₁₈dinao tsa gagwe

ba di utlwisa botlhoko

ka tse di golegang; a tsenngwa

mo diketaneng tsa tshipi;

₁₉ga ba ga tla ga fitlha motlha

wa go dirafala ga lefoko la gagwe;

lefoko la ga Jehofa la mo leka.

₂₀Kgosi ya roma,

ya mo hunolola dikgole;

e bong molaodi wa ditšhaba,

mme a mo lesa a tswa fela.

₂₁A mo dira morena wa ntlo ya gagwe,

le molaodi wa dithoto tsotlhe

tsa gagwe;

₂₂gore a golege dikgosana tsa gagwe

ka fa o ratang ka gone,

le gore a rute bagolwane

ba gagwe botlhale.

₂₃Iseraele le ene a tla mo Egepeto;

Jakobe a jaka mo lefatsheng

la ga Hame.

₂₄Mme Jehofa a atisa ba gagwe thata,

a ba baya go nna thata bogolo

go feta baganetsi ba bone.

₂₅A sokolola pelo ya bone

gore ba ile batho ba gagwe,

go direla batlhanka ba gagwe

ka boferefere.

₂₆A roma Moše, motlhanka wa gagwe,

le ene Arone

yo o mo itshenketseng.

₂₇Ba tlhoma ditshupo tsa gagwe

fa gare ga bone,

le dikgakgamatso tsa gagwe

mo lefatsheng la ga Hame.

₂₈A tlhoma lefifi, mme a le fifatsa;

mme ga ba a ka ba tsuololela

mafoko a gagwe.

₂₉A fetola metsi a bone a nna madi,

a bolaya ditlhapi tsa bone.

₃₀Lefatshe la bone

la nna le lesaisai la digwagwa,

le mo matlwaneng a dikgosi.

₃₁A bua, mme ga tla metshitshi ya

dintshi le dinta mo melelwaneng

yotlhe ya bone.

₃₂A ba naya sefako

mo boemong jwa pula,

le molelo o o tutumang

mo lefatsheng la bone.

₃₃A kgemetha mafine a bone le one,

le ditlhare tsa mafeige tsa bone;

a robakanya ditlhare tsa melelwane

ya bone.

₃₄A bua, mme tsie ya tla le seboko,

mme ya bo e le mo go se nang palo,

₃₅mme tsa ja tsa swetsa merogo yotlhe

mo lefatsheng la bone,

tsa ba tsa ja tsa bilatsa

loungo lwa mmu wa bone.

₃₆Le gone a gaila batsalwapele botlhe

mo lefatsheng la bone,

tshimologo ya thata yotlhe

ya bone.

₃₇Mme a ba ntsha

ba tswa ba na le selefera le gouta;

mme go ne go se na motho ope

yo o sekoa mo ditšhabeng tsa gagwe.

₃₈E rile ba bothologa,

Egepeto a itumela;

gonne poifo ya bone

e ne e ba wetse.

₃₉A tsharolola leru go nna sesiro;

le molelo go sedifatsa bosigo.

₄₀Ba lopa,

mme a lere makwetekwio,

a ba kgorisa ka senkgwe

sa legodimo.

₄₁A arola lefika,

metsi a tšhabanyetsega;

a elela mo mafelong a a lokgere

jaaka noka.

₄₂Gonne a gakologelwa lefoko

la gagwe le le boitshepo

le ene Aberahame

motlhanka wa gagwe.

₄₃A ntsha batho ba gagwe,

ba tswa ka boitumelo,

le baitshenkedwi ba gagwe

ka go opela;

₄₄a ba naya mafatshe a merafe;

ba tsaya mohuhutso wa ditšhaba;

ba o rua;

₄₅gore ba tle ba boloke

ditao tsa gagwe,

ba tlhokomele melao ya gagwe.

Bakang Jehofa.