Pesalema 103

₁Baka Jehofa, mowa wa me;

le tsotlhe tse di mo teng

ga me a di bake

leina la gagwe le le boitshepo.

₂Baka Jehofa, mowa wa me,

mme o se ka wa lebala

dithuso tsa gagwe tsotlhe;

₃yo o itshwarelang

maikepo otlhe a gago;

a fodise malwetse a gago otlhe fela;

₄yo o rekololang botshelo jwa gago

mo tshenyegong;

a go rwese tlhogo

ka bopelonomi jwa lorato,

le ka mautlwelobotlhoko a manana;

₅yo o kgorisang legano la gago

ka dilo tse di molemo;

bokau jwa gago

boo bo tle bo šafadiwe

bo nne jaaka jwa ntswi yo motona.

₆Jehofa o dirafatsa ditiro tsa tshiamo,

le dikatlholo o di dirafaletsa botlhe

ba ba patikwang.

₇O ne a itsise Moše

metsamao ya gagwe,

le madiro a gagwe

a a itsise bana ba Iseraele.

₈Jehofa o tletse bopelotlhomogi,

mme o pelotshweu,

o bonya go galefa,

o letlotlo la boutlwelobotlhoko.

₉Ga a ketla a omana

ka metlha yotlhe;

le fa e le go nna ka bogale

ka bosenabokhutlo.

₁₀Ga a a re direla

ka fa maleong a rona,

le fa e le go re duela

ka fa maikepong a rona.

₁₁Gonne jaaka legodimo le ntse

le le kwa godimo,

godimo ga lefatshe,

boutlwelobotlhoko jwa gagwe

mo go ba ba mmoifang

bo ntse bogolo jalo.

₁₂Jaaka botlhabatsatsi bo le kgakala

le bophirimatsatsi;

le ene o re tloseditse

ditlolo tsa rona

bokgakala jo bo kalo.

₁₃Jaaka rrabana a tle a utlwele

bana ba gagwe botlhoko;

Jehofa le ene o tlhomogela

ba ba mmoifang pelo jalo.

₁₄Gonne o itse popego ya rona,

o gakologetswe fa re le lorole fela.

₁₅Ka ga motho ene, malatsi a gagwe

a ntse jaaka bojang fela;

jaaka sethunya sa naga,

le ene o kgaba fela jalo.

₁₆Gonne phefo ya se foka,

mme se ile; le bonno jwa sone

ga bo ketla bo tlhola bo se itse.

₁₇Mme boutlwelobotlhoko jwa ga Jehofa

bo ntse fela go tswa

bosasimologeng go ya bosaengkae

mo go ba ba mmoifang,

le tshiamo ya gagwe

go ya baneng ba bana;

₁₈mo go ba ba bolokang

kgolagano ya gagwe,

le mo go ba ba gakologelwang

ditaelo tsa gagwe go di dira.

₁₉Jehofa o tlhomamisitse

setulo sa gagwe sa bogosi

mo magodimong;

mme bogosi jwa gagwe

bo busa gotlhe fela.

₂₀Bakang Jehofa lona baengele

ba gagwe;

lona dinatla mo nonofong,

ba lo dirafatsang lefoko la gagwe,

lo ntse lo reeditse

lentswe la lefoko la gagwe.

₂₁Bakang Jehofa

lona masomosomo otlhe a gagwe;

lona badiredi ba gagwe

ba lo dirang go natefelwa ga gagwe.

₂₂Bakang Jehofa lona ditiro

tsotlhe tsa gagwe, mo mafelong

otlhe a puso ya gagwe.

Baka Jehofa mowa wa me.