DIANE 28

₁Baikepi ba tle ba tshabe go sa khukhele ope, mme basiami ba pelokgale jaaka tau.

₂Dikgosana tsa lefatshe di tle di nne dintsi ka ntlha ya go leofa ga lone, mme go nna ga lone go tlaa lelefadiwa ke batho ba tlhaloganyo le kitso.

₃Motlhoki yo o patikang bahumanegi o tshwana le pula e e gogolang fela, e e sa tlogeleng dijo dipe.

₄Bone ba ba tlogelang molao ba haka baikepi, mme ba ba tshegetsang molao ba ganela nabo.

₅Batho ba ba bosula ga ba tlhaloganye tshiamiso, mme ba ba batlang Jehofa ba tlhaloganya dilo tsotlhe.

₆Mohumanegi yo o tsamayang mo go tlhokeng molato ga gagwe, o molemo bogolo go yo o lesoko mo mekgweng ya gagwe, le fa a humile.

₇Yo o tshegetsang molao ke ngwana yo o botlhale, mme yo o leng monkana wa diapu o tlhabisa rraagwe ditlhong.

₈Yo o kokotletsang thoto ya gagwe ka go lopa koketso le ka loatiso, o e phuthela ene yo o utlwelang bahumanegi botlhoko.

₉Yo o ithuhulang, gore a se utlwe molao, le e leng one morapelo wa gagwe ke sefedisapelo fela.

₁₀Yo o timeletsang mothokgami kwa tseleng e e bosula, o tlaa wela ka esi mo lemeneng le e leng la gagwe, mme baitekanedi ba tlaa ja molemo boswa.

₁₁Mohumi o ipona botlhale, mme mohumanegi yo o nang le tlhaloganyo a mo kheleise.

₁₂Motlhang basiami ba fenyang, go nne kgalalelo e kgolo, mme motlhang baikepi ba tsogang, batho ba iphitlhe.

₁₃Yo o bipang ditlolo tsa gagwe ga a ketla a tlhogonolofala, mme yo o di ipolelang a ba a di bakela, o tlaa bona boutlwelobotlhoko.

₁₄Go sego motho yo o sisimogang ka metlha yotlhe, mme yo o ikwatlalatsang pelo o tlaa wela mo bosuleng.

₁₅Jaaka tau e e dumang, le bera e e lalogileng, molaodi yo o boikepo o ntse jalo mo tšhabeng e e humanegileng.

₁₆Kgosana e e tlhokang tlhaloganyo e bile ke mopatiki yo mogolo, mme yo o ilang keletso ya boiphetlho o tlaa lelefatsa malatsi a gagwe.

₁₇Motho yo o rweleng lekokoma la madi a motho o tlaa tshabela kwa lemeneng; a go se nne motho ope yo o mo kganelang.

₁₈Motho yo o tsamayang ka thokgamo o tlaa gololwa, mme yo o lesoko mo mekgweng ya gagwe o tlaa wa ka lobaka loo fela.

₁₉Yo o lemalemang masimo a gagwe o tlaa bona letlotlo la dijo, mme yo o salang baithamaki morago o tlaa bona khumanego e e tletseng.

₂₀Monna yo o boikanngo o tlaa nna le letlotlo la matshego, mme yo o potlakelang go huma ga a ketla a tlhoka go bediwa.

₂₁Go gopola bomangmang jwa batho ga go molemo, le fa e le go dira tlolo, gore motho a bone dijonyana.

₂₂Yo o leitlho le le bosula o itlhaganelela dikhumo, mme a sa itse fa botlhokwa bo tlaa mo wela.

₂₃Yo o kgalemelang motho o tlaa nama a bona botsalano bogolo go yo o hakang ka loleme.

₂₄Yo o utswelang rraagwe kgotsa mmaagwe, mme a re: “Ga se tlolo epe;” motho yoo ke monkana wa sesenyi.

₂₅Motho yo o pelotshetlha o tsosa dikgang; mme yo o ikanyang Jehofa o tlaa nontshiwa.

₂₆Yo o ikanyang pelo ya gagwe ka esi ke seeleele, mme yo o tsamayang ka botlhale o tlaa gololwa.

₂₇Yo o abelang bahumanegi ga a ketla a tlhoka, mme yo o ipipang matlho o tlaa bona phutso gantsintsi.

₂₈E a re fa baikepi ba tsoga, batho ba iphitlhe; mme motlhang ba swang basiami ba ntsifale.