DIANE 11

₁Selekanyo sa pego se se tsietsang ke se se makgapha mo go Jehofa, mme sebokete se se lekanyeng se a mo natefela.

₂E re fa boikgodiso bo tla, foo go tle ditlhong, mme botlhale bo nna le yo o ikgobalatsang.

₃Botlhoka molato jwa bathokgami bo tlaa ba goga, mme lesoko la ba ba bongowane le tlaa ba senya.

₄Dikhumo ga di thuse sepe mo tsatsing la bogale, mme tshiamo e golola mo losong.

₅Tshiamo ya moitekanedi e tlaa mo kaela tsela ya gagwe, mme moikepi o tlaa wa ka boikepo jwa gagwe.

₆Tshiamo ya bathokgami e tlaa ba golola, mme ba ba dirang ka bonongwane ba tlaa tshwarelwa mo bosenying jwa bone fela.

₇Motlhang motho wa boikepo o swang, tebelelo ya gagwe e nyelele, le tsholofelo ya boikepo e fele.

₈Mosiami o gololwa mo tlalelong, mme moikepi a tsene mo boemong jwa gagwe.

₉Motho yo o sa reng Modimo sepe o senya wa ga gabo ka molomo wa gagwe, mme mosiami o tlaa gololwa ka kitso.

₁₀E a re go nna molemo mo mosiaming motse o itumele, mme mogang moikepi o nyelelang, go nne tuduetso.

₁₁Motse o golediwa ke tshegofatso ya mothokgami, mme o ribegediwe ke molomo wa moikepi.

₁₂Yo o nyatsang wa ga gabo ga a na botlhale, mme motho wa tlhaloganyo o ithiba mo puong.

₁₃Yo o tsamayatsamayang e le mosebi o senola maoma, mme yo o mowa wa boikanngo o a a loba.

₁₄Kwa go se nang kgogo ya botlhale gone, batho ba a wa, mme mo bontsing jwa bagakolodi go nne le polokego.

₁₅Yo o leng moemedi wa moeng o tlaa babalesega ka gone, mme yo o ilang kemelo o tlhomame.

₁₆Mosadi yo o pelotshweu o nnela ruri le tlotlo; mme batho ba ba thubakang ba nnela ruri le khumo.

₁₇Motho yo o boutlwelobotlhoko o itirela mowa wa gagwe molemo, mme yo o selalome o itshwenya nama ya gagwe.

₁₈Moikepi o ipapalela tuelo ya tsietso, mme yo o jalang tshiamo o na le tuelo e e tlhomameng.

₁₉Yo o nitameng mo tshiamong o tlaa fitlha kwa botshelong. Mme yo o latelelang bosula o dira jalo go tla a inaya loso.

₂₀Ba ba lesoko mo pelong ke difedisa pelo mo go Jehofa, mme ba ba itekanetseng mo tseleng ya bone, ke natefelo ya gagwe.

₂₁Le fa seatla se tshwaragana le seatla, motho yo o bosula ga a ketla a tlhoka petso, mme losika lwa mosiami lo tlaa gololwa.

₂₂Jaaka lenyena la gouta mo nkong ya kolobe, mosadi yo montle, yo o se nang pharologanyo, o ntse fela jalo.

₂₃Keletso ya mosiami ke molemo fela, mme tebelelo ya moikepi ke bogale jo bogolo.

₂₄Go na le mo go gasegang, mme go totafale bogolo, mme go bile go na le gonoga bogolo go tshwanelo, mme go ise lehumeng fela.

₂₅Motho yo o fang ka pelontle o tlaa nontshiwa, le yo o nosang le ene ka esi o tlaa nosiwa.

₂₆Yo o gonang ka mabele, batho ba tlaa mo hutsa, mme tshegofatso e tlaa nna mo tlhogong ya yo o a rekisang.

₂₇Motho yo o batlang molemo ka tlhoafalo o batla botsalano, mme yo o senkang bosenyi, bo tlaa tla mo go ene.

₂₈Yo o ikanyang khumo ya gagwe o tlaa wa, mme mosiami o tlaa kgaba jaaka lekakaba le letala.

₂₉Yo o tshwenyang ntlo ya gagwe o tlaa ja phefo boswa, le lesilo le tlaa nna motlhanka wa yo o pelo e e botlhale.

₃₀Loungo lwa mosiami ke setlhare sa botshelo, mme le yo o botlhale o tle a gape mewa ya batho.

₃₁Bonang, mosiami o tlaa duelwa mo lefatsheng, bogolo jang moikepi le moleofi!