DIANE 1

₁Diane tsa ga Solomone morwa Dafite, kgosi ya Iseraele:

₂Go itse botlhale le thuto; go lemoga mafoko a tlhaloganyo; ₃go tshola thuto ya go dira ka botlhale, ka tshiamo, le ka katlholo, le ka tekatekanyo; ₄go naya yo o sa tlhalefang matseba, le motho wa lekau kitso le pharologanyo; ₅gore motho yo o botlhale a utlwe, a totafale mo go ithuteng; le gore motho wa tlhaloganyo a ye go tshwara dikgakololo tse di itekanetseng; ₆go tlhaloganya seane, le setshwantsho; mafoko a ba ba botlhale, le dinyoba tsa bone.

₇Go boifa Jehofa ke tshimologo ya kitso, mme masilo a nyatsa botlhale le thuto.

₈Morwaaka, utlwa thuto ya ga rraago, mme o se ka wa tlogela molao wa ga mmaago, ₉gonne e tlaa nna kgopana e ntle mo tlhogong ya gago, le tlhanyaku mo thamong ya gago.

₁₀Morwaaka, fa baleofi ba go fepa, o se ka wa dumela. ₁₁Fa ba re: “A re tsamaye mmogo re ye go lalela go tsholola madi, a re bobele ba ba se nang molato ka bomo; ₁₂a re ba kometse jaaka Bobipo ba sa ntse ba utlwa, ba le boleka jaaka ba ba fologelang mo moleteng; ₁₃re tlaa fitlhela thoto yotlhe e e tlhokegang, re tlaa tlatsa matlo a rona ka thopo; ₁₄o tlaa tlhakanela kgetsi le rona; re tlaa dira le kgetsana ya madi e le nngwe fela.”

₁₅Morwaaka, o se ka wa tsamaya nabo mo tseleng; thiba lonao lwa gago, gore lo se ka lwa tsena mo tselaneng ya bone, ₁₆gonne dinao tsa bone di sianela bosula, ba itlhaganelela go tsholola madi. ₁₇Gonne, aitse lotloa lo menololelwa lefela mo ponong ya nonyane le fa e ka nna efe; ₁₈bao ba italelela a e leng madi a bone tota, ba ipobelela a e leng matshelo a bone tota. ₁₉Ditsela tsa mongwe le mongwe yo o sefatlha ka ga papadi di ntse jalo, e tle e bolaye beng ba yone.

₂₀Botlhale o kuela godimo mo mmileng; o ntsha lentswe la gagwe mo dipatlelong; ₂₁o kua mo bonnong jo bogolo jwa borakanelo; fa botsenong jwa dikgoro, o bolela mafoko a gagwe mo motseng, a re:

₂₂“Lona ba lo sa tlhalefang, lo tlaa rata botlhoka botlhale ka lobaka lo lo kaye, le basotli go ijesa monate mo go sotleng, le dieleele go ila kitso? ₂₃Sokologang ka kgalemo ya me; bonang, ke tlaa thela mowa wa me mo go lona, ke tlaa lo itsise mafoko a me. ₂₄E re ka ke biditse, mme lwa gana; ke otlolotse letsogo la me, mme ga se ka ga tlhokomela ope; ₂₅lo ntshitse kgakololo ya me yotlhe lefela, lwa ba lwa gana kgalemo ya me. ₂₆Le nna ke tlaa tshega mo motlheng wa tatlhego ya lona; ke tlaa sotla motlhang poifo ya lona e tlang; ₂₇motlhang poifo ya lona e tlang jaaka matsubutsubu a phefo, le tatlhego ya lona e tlaa jaaka setsuatsue; motlhang pitlagano e tlang mo go lona le tlalelo e e mahehe. ₂₈Foo ba tlaa mpitsa, mme ga nketla ke araba; ba tlaa mpatla ka tlhoafalo, mme ga ba ketla ba mpona. ₂₉E re ka ba idile kitso, ba se ka ba itshenkela go boifa Jehofa, ₃₀kgakololo ya me ba e ganela ruri; ba nyatsa kgalemo yotlhe ya me. ₃₁Ke gone ka moo ba tlaa jang loungo lwa tsela ya bone, ba tlaa kgora maano a ba a logileng ka bosi. ₃₂Gonne go tenega ga ba ba sa tlhalefang go tlaa ba bolaya, le boiketlo jwa dieleele bo tlaa di senya. ₃₃Yo o ntheetsang o tlaa aga ka polokego, o tlaa nna fela a sa boife bosula.”