Tumediso
1Ke nna Paulo, ke na le Timotheo, re batlhanka ba ga Keresete Jesu; re kwalela baitshepi botlhe ba ba kwa Filipi, ba ba mo go Keresete Jesu, ba na le baokami le batiakone:
2A tshegofatso e nne le lona, le kagiso e e tswang Modimong Rraetsho le Morena Jesu Keresete.
Paulo o rapelela Bakeresete ba Filipi
3Ke leboga Modimo wa me ka metlha yotlhe e ke lo gopolang ka yone. 4Ka metlha yotlhe mo merapelong yotlhe ya me ka ga lona, ke dira morapelo wa me ka boitumelo, 5ka ntlha ya bolekane jwa lona mo go tsamaiseng Mafoko a a Molemo, e sa le ka letsatsi la ntlha le go tla motlheng wa gompieno. 6Ke ntse ke ikantse mo, gore yo o simolotseng tiro e e molemo mo go lona, o tlaa e sweletsa go ya kwa motlheng wa ga Jesu Keresete; 7fela jaaka go ntshiametse, gore ke nne ke lo gopole jalo lotlhe, gonne ke na le lona mo pelong ya me, ka lotlhe lo tlhakanetse tshegofatso le nna mo dikgolegong tsa me, le mo go femeleng Mafoko a a Molemo, le mo go a tlhomamiseng. 8Gonne Modimo ke mosupi wa me, wa ka fa ke lo tlhologeletsweng lotlhe ka teng mo mautlwelong botlhoko a manana a ga Keresete Jesu.
9Ke lo rapelela mo, gore lorato lwa lona lo totafale bogolo bogolo mo kitsong le mo temogong; 10gore lo ke lo dumalane le dilo tse di molemo, gore lo ke lo nne peloephepa le botlhoka sekgopi, go ya go fitlha mo motlheng wa ga Keresete; 11ka go tladiwa maungo a tshiamo, a a leng kgalaletso le pako ya Modimo ka Jesu Keresete.
Go tshela ke Keresete
12Jaana ke rata lwa itse, bagaetsho, fa dilo tse di ntirafaletseng di dirafaletse botswelelopele jwa Mafoko a a Molemo bogolo; 13ga tsamaya dikgolego tsa me tsa bonatshega ka Keresete mo mophatong otlhe wa molaodi wa motse, le mo go botlhe ba bangwe; 14bontsi jwa bakaulengwe ba ba mo Moreneng, ka ba ikantse dikgolego tsa me, ba nna tshosologo bogolo go bua lefoko la Modimo ba se na poifo.
15Le gale bangwe boo ba rera Keresete ka bopelotshetlha le kgang; mme bangwe le bone ka pelo e ntle; 16ba bangwe ba go dira ka lorato, ka ba itse fa ke beilwe go femela Mafoko a a Molemo; 17ba bangwe ba rera Keresete ka mokgwa wa go itira lekoko, e seng ka peloephepa, ba gopotse go ntsosetsa pitlagano mo dikgolegong tsa me.
18Mme e be e le eng? E be e le go re ka mekgwa yotlhe, le fa e le ka boitimokanyo, le fa e le ka boammaaruri, Keresete o a bolelwa; mme ke itumelela gone moo; ee, ke tlaa nna ke itumela fela. 19Gonne ke a itse fa golo mo go tlaa tswa polokego ya me, ka ntlha ya merapelo ya lona le neo ya Mowa wa ga Jesu Keresete. 20Ka fa tebelelong ya me e e thata, le tsholofelo ya gore, ga nketla ke tlhabisiwa ditlhong ke sepe, fa e se gore, jaaka gale, le gompieno, Keresete o tlaa godisiwa mo mmeleng wa me, le fa e ka ne e le ka botshelo, le fa e ka ne e le ka loso. 21Gonne mo go nna, go tshela ke Keresete, mme go swa ke poelo. 22Mme fa go tshela mo nameng, fa mo e le lone loungo lwa tiro ya me, foo ga ke itse se ke ka se itshenkelang. 23Ke mo pitlaganong fa gare ga dilo tse pedi tse; ke na le keletso ya go tsamaya, ke ya go nna le Keresete; gonne mo, go molemo bogolo thata; 24le fa go ntse jalo go nna mo nameng go tlhokega bogolo ka ntlha ya lona. 25E re ka ke na le boikanyo jo, ke a itse fa ke tlaa nna, ke ba ke nna le lona lotlhe, gore lo bone botswelelopele le boitumelo mo tumelong; 26gore go ipelafatsa ga lona ka nna go totafale mo go Keresete Jesu, ka go nna ga me gape mo go lona.
27Fela, a mokgwa wa lona wa botshelo e nne o o tshwanetseng Mafoko a a Molemo a ga Keresete, gore, e tle e re le fa ke ka tla go lo bona, kgotsa ke se yo, ke be ke utlwele go tshela ga lona, fa lo eme ka tlhomamo mo moweng o le mongwe fela, lo ntse lo ganelela tumelo ya Mafoko a a Molemo ka mowa o le mongwe fela; 28lo sa boifisiwe mo go sepe ke baganetsi; mo e leng sesupo se se bonalang sa tatlhego mo go bone, mme mo go lona sa poloko, e e bileng e le e e tswang mo Modimong. 29Gonne lona lo neilwe ka ga Keresete, e seng go dumela mo go ene go le gosi, mme le gone go utlwisiwa botlhoko ka ntlha ya gagwe, 30ka lo le mo go yone ntwa e lo mponyeng ke le mo go yone, e gompieno lo bileng lo utlwa fa ke le mo go yone.
