DIPALO 4

₁Jehofa a bua le Moše le Arone, a re: ₂“Dirang palo ya bomorwa Kohathe mo go bomorwa Lefi, ka ditshika tsa bone, ka dikgotla tsa borra ba bone, ₃go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50; botlhe ba ba tsenang mo tirelong ba ya go dira tiro ya mogope wa bophuthegelo. ₄E ke yone tirelo ya bomorwa Kohathe mo mogopeng wa bophuthegelo, mo dilong tse di boitshepo jo bo itshepileng: ₅Fa thibelelo e tloga, Arone a a tsene le bomorwawe, ba pagolole sesiro sa sebipo, ba bipe letlole la tshupo ka sone. ₆A ba beye mo go lone sekhurumetso sa matlalo a manyebi, ba e apese letsela la bobududu fela, mme ba tsenye disikaro tsa lone. ₇Mo lomating lwa bojelo lwa senkgwe sa tshupelo, a ba ale letsela le le bobududu, ba itse go baya mo go lone dijana, dintshwana, megotswana, dinwelo tse go thelwang ka tsone; le senkgwe sa metlha yotlhe a se nne mo go lone. ₈A ba ale mo godimo ga tsone letsela le le bohibidu jo bo letlhololo, ba le apese sekhurumetso sa matlalo a manyebi, ba tsenye disikaro tsa lone.

₉“A ba tseye letsela le le bobududu, ba apese setlhomo sa dipone ka lone, le dilampa tsa sone, dipoma tsa sone, dipomelo tsa sone, le dilwana tsa sone tsa lookwane tse ba se direlang ka tsone. ₁₀A ba tsenye sone le dilo tsotlhe tsa sone mo teng ga sekhurumetso sa matlalo a manyebi, ba se beye mo sefateng.

₁₁“Mo sebesong sa gouta a ba ale letsela le le bobududu, ba se apese matlalo a manyebi, ba tsenye disikaro tsa sone. ₁₂A ba tseye dilwana tsotlhe tsa tirelo, tse ba direlang ka tsone mo felong ga boitshepo, ba di tsenye mo letseleng le le bobududu, ba di apese sekhurumetso sa matlalo a manyebi, ba di beye mo sefateng. ₁₃Ba ole molora mo sebesong, ba apese sebeso letsela le le bohibidu jo bo mokgona; ₁₄ba beye mo go sone dilwana tsotlhe tsa sone, tse ba direlang ka tsone fa go sone, diolela molelo, le dikgoge tsa nama, le digopa melora, le megotswana le dilwana tsotlhe tsa sebeso; ba beye sekhurumetso sa matlalo a manyebi mo go sone ba se tsenye disikaro tsa sone. ₁₅E tlaa re Arone le bomorwawe ba sena go wetsa go bipa felo ga boitshepo, le dilwana tsotlhe tse di nnang mo felong ga boitshepo, jaaka fa ba bothibelelo ba bothologa; morago ga mo, a bomorwa Kohathe ba go rwale; mme ba se ka ba ama felo ga boitshepo, ba ka tla ba swa. Dilo tse ke tsone morwalo wa bomorwa Kohathe tsa mogope wa bophuthegelo.

₁₆“Tebelo ya ga Eleasare morwa Arone moperesiti, e nne lookwane lwa dipone, maswalo a a nkgang monate, tshupelo ya boupe ya metlha yotlhe, lookwane lo lo tlolwang, ke gore, tebelo ya motlaagana otlhe fela, le ya dilo tsotlhe tse di mo go one, le felo ga boitshepo, le dilwana tse di nnang gone.”

₁₇Jehofa a bua le Moše le Arone, a re: ₁₈“Lo se ka lwa kgaola lotso lwa ditshika tsa Bakohathe mo go Balefi; ₁₉mme lo ba direle jaana, gore ba tshele, ba se ka ba a swa, mogang ba atamelang kwa dilong tse di boitshepo jo bo itshepileng. A Arone a tsene le bomorwawe, mme ba kaele mongwe le mongwe wa bone tiro ya gagwe le morwalo wa gagwe. ₂₀Ba se ka ba tsena ba ya go bona felo ga boitshepo, le fa e le ka ponyo e le nngwe fela, ba ka tla ba swa.”

₂₁Jehofa a bua le Moše, a re: ₂₂“O bo o dire palo le ya bomorwa Gerešone, ka dikgotla tsa borra ba bone, ka ditshika tsa bone, ₂₃go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50, o ba bale: botlhe ba ba tsenang ba ya go lebelela tirelo, go dira tiro ya mogope wa bophuthegelo. ₂₄E ke tiro ya ditshika tsa Bagerešone, mo go direleng le mo go rwaleng merwalo. ₂₅A ba rwale matsela a a lepelelang a motlaagana, le mogope wa bophuthegelo, sekhurumetso sa one, le sekhurumetso sa matlalo a manyebi se se kwa godimo ga sone, le sebipo sa mojako wa mogope wa bophuthegelo, ₂₆le dilepelelo tsa lolwapa, le sebipo sa setswalo sa kgoro ya lolwapa, lo lo ka fa motlaaganeng, le fa sebesong, mo tikologong ya sone, le megala ya lone, le dilo tsotlhe tsa tirelo ya bone, ba tlaa dira tsotlhe tse di tlhokegang go direlwa dilo tse. ₂₇Tirelo yotlhe ya bomorwa Bagerešone e tlaa nna mo taolong ya ga Arone le bomorwawe, mo go rwaleng ga bone gotlhe fela, le mo tirelong yotlhe ya bone; mme bone ba ba mo tebelong lo tlaa ba kaela merwalo yotlhe ya bone. ₂₈E ke yone tirelo ya ditshika tsa bomorwa Bagerešone mo mogopeng wa bophuthegelo; tebelo ya bone e nne mo seatleng sa ga Ithamare morwa Arone moperesiti.

₂₉“Ka ga bomorwa Merari, o ba bale ka ditshika tsa bone, ka dikgotla tsa borra ba bone. ₃₀O ba bale go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50, mongwe le mongwe yo o tsenang mo tirelong, a dira tiro ya mogope wa bophuthegelo. ₃₁E ke yone tebelo ya morwalo wa bone, ka fa tirelong yotlhe ya bone mo mogopeng wa bophuthegelo; dimati tsa motlaagana le merapalego ya one, maotwana a one, le ditlhako tsa one; ₃₂le maotwana a lolwapa mo tikologong, ditlhako tsa one, le dimapo tsa one, megala ya one, le dilo tsotlhe tsa one ka tirelo yotlhe ya one; lo bale ka maina dilo tsa tebelo ya morwalo wa bone. ₃₃E ke yone tirelo ya ditshika tsa bomorwa Merari, ka fa tirelong yotlhe ya bone, mo mogopeng wa bophuthegelo, e le mo seatleng sa ga Ithamare morwa Arone moperesiti.”

₃₄Moše le Arone le dikgosana tsa phuthego ba bala bomorwa Bakohathe ka ditshika tsa bone, le ka dikgotla tsa borra ba bone. ₃₅Go simolola ka ba ba dinyaga di 30 go ya kwa bomogoloa bone, kwa go ba ba dinyaga di 50, mongwe le mongwe yo o neng a tsena mo tirelong, a ya go dira mo mogopeng wa bophuthegelo; ₃₆ba ba badilweng mo go bone ka ditshika tsa bone, e ne e le 2 750. ₃₇Ba ke bone ba ba badilweng ba ditshika tsa Bakohathe, botlhe ba ba direlang mo mogopeng wa bophuthegelo, ba Moše le Arone ba ba badileng ka fa taolong ya ga Jehofa ka seatla sa ga Moše.

₃₈Bone ba ba badilweng ba bomorwa Gerešone, ka ditshika tsa bone, le ka dikgotla tsa borra ba bone, ₃₉go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50, mongwe le mongwe yo o tsenang mo tirelong, a ya go dira mo mogopeng wa bophuthegelo, ₄₀e bong bone ba ba badilweng mo go bone ka ditshika tsa bone, le ka dikgotla tsa borra ba bone, e ne e le 2 630. ₄₁Ba ke bone ba ba badilweng ba ditshika tsa bomorwa Gerešone, botlhe ba ba neng ba direla mo mogopeng wa bephuthegelo, ba Moše le Arone ba ba badileng ka fa taolong ya ga Jehofa.

₄₂Ba ba badilweng ba ditshika tsa bomorwa Merari, ka ditshika tsa bone, ka dikgotla tsa borra ba bone, ₄₃go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50, mongwe le mongwe yo tsenang mo tirelong a ya go dira mo mogopeng wa bophuthegelo, ₄₄e bong bone ba ba badilweng mo go bone, ka ditshika tsa bone, e ne e le 3 200. ₄₅Ba ke bone ba ba badilweng ba ditshika tsa bomorwa Merari, ba Moše le Arone ba ba badileng ka fa taolong ya ga Jehofa ka seatla sa ga Moše.

₄₆Botlhe ba Balefi ba ba badilweng, ba Moše le Arone le dikgosana tsa Iseraele ba ba badileng, ka ditshika tsa bone, le ka dikgotla tsa borra ba bone, ₄₇go simolola ka ba ba dinyaga di 30 go ya kwa go bomogoloa bone, kwa go ba ba dinyaga di 50, mongwe le mongwe yo o ne a tsena a ya go dira tiro ya tirelo, le tiro ya go rwala mo mogopeng wa bophuthegelo, ₄₈e bong bone ba ba badilweng mo go bone, e ne e le 8 580. ₄₉Ba ne ba balwa ka seatla sa ga Moše ka fa taolong ya ga Jehofa, mongwe le mongwe ka fa tirelong ya gagwe le ka fa morwalong wa gagwe. Ba badilwe jalo ke ene, jaaka Jehofa a laotse Moše.