Bana ba ga Arone
1Jaana e rile ka letsatsi le Jehofa o buileng le Moše ka lone mo thabeng ya Sinai, ya bo e le tsone dikokomana tsa ga Arone le Moše. 2Mme a ke one maina a bomorwa Arone: Natabe motsalwapele, Abihu, Eleasare le Ithamare. 3A ke maina a bomorwa Arone, baperesiti ba ba tloditsweng, ba o ne a ba lomololela go tla ba direla mo tirong ya boperesiti. 4Natabe le Abihu ba swela fa pele ga Jehofa, jale ka ba isa molelo wa seeng fa pele ga Jehofa, mo nageng ya Sinai, ba bo ba se na bana: Eleasare le Ithamare ba direla mo tirong ya boperesiti mo ponong ya ga Arone rraabo.
Balefi ba tlhomiwa go direla baperesiti
5Jehofa a bua le Moše a re: 6“Atametsa lotso lwa ga Lefi, o ba beye fa pele ga Arone moperesiti, gore ba mo direle. 7Ba tshegetse tebelo ya gagwe, le tebelo ya phuthego yotlhe fa pele ga mogope wa bophuthegelo, go dira tiro ya motlaagana. 8A ba lebele dilo tsotlhe tse di nnang mo mogopeng wa bophuthegelo, tebelo ya bana ba Iseraele, go dira tiro ya motlaagana. 9Balefi o ba neye Arone le bomorwawe; o ba neetswe ruri ba tswa mo baneng ba Iseraele. 10O tlhome Arone le bomorwawe; ba tlaa tshegetsa boperesiti jwa bone, mme moeng yo o atmelang a a bolawe.”
11Jehofa a bua le Moše, a re: 12“Nna, bona, ke tshotse Balefi mo baneng ba Iseraele mo boemong jwa batsalwapele botlhe ba go itibolwang ka bone mo baneng ba Iseraele; Balefi ba tlaa nna ba me, 13gonne batsalwapele botlhe ke ba me; e rile ka letsatsi le ke bolaileng batsalwapele botlhe ba lefatshe la Egepeto ka lone ka iitshepisetsa batsalwapele botlhe ba Iseraele, ba batho le ba dikgomo, ba tlaa nna ba me fela; ke nna Jehofa.”
Palo ya Balefi
14Jehofa a bua le Moše mo nageng ya Sinai, a re: 15“Bala bana ba ga Lefi ka dikgotla tsa borra ba bone; bala lonna lotlhe, go simolola ka ba ba kgwedi e nngwe fela, go ya kwa go bomogoloa bone.” 16Moše a ba bala ka fa lefokong la ga Jehofa, jaaka a laotswe. 17Ba e neng e le bomorwa Lefi ka maina a bone ke ba: Gerešone, Kohathe le Merari. 18A ke maina a bomorwa Gerešone ka ditshika tsa bone: Libini le Shimei. 19Bomorwa Kohathe ka ditshika tsa bone, Amerame, Isehare, Heberone, le Usiele. 20Bomorwa Merari ka ditshika tsa bone: Maheli le Muši. Tse ke ditshika tsa Balefi ka fa dikgotleng tsa borra ba bone.
21Losika lwa Balibini lo ne lo tswa mo go Gerešone, le losika lwa Bašimei; tse ke tsone ditshika tsa Bagerešone. 22Ba ba badilweng mo go bone ka fa palong ya lonna lotlhe, go simolola ka ba ba kgwedi e nngwe fela go ya kwa go bomogoloa bone, e bong bone ba ba badilweng mo go bone, e ne e le 7 500. 23Ditshika tsa Bagerešone a ba tlhome megope ya bone fa morago ga motlaagana ntlheng ya bophirimatsatsi. 24Kgosana ya ntlo ya borraabo Bagerešone a e nne Eliasafe morwa Laele. 25Tebelo ya bomorwa Gerešone mo mogopeng wa bophuthegelo a e nne motlaagana, le one mogope, sekhurumetso sa one, le sebipo sa mojako wa mogope wa bophuthegelo; 26le matsela a a lepeletseng, lolwapa lo lo fa motlaaganeng, le fa sebesong mo tikologong, le megala ya one ya tirelo yotlhe ya one.
27Losika lwa Baamerame lo lo duleng mo go Kohathe, le losika lwa Baisehare, le losika lwa Baheberone, le losika lwa Bausiele; tse ke tsone ditshika tsa Bakohathe. 28Ka fa palong ya lonna lotlhe go simolola ka ba ba kgwedi nngwe fela go ya kwa go bomogoloa bone, go ne go le 8 600, ba lebetse felo ga botshepo. 29Ditshika tsa bomorwa Kohathe a ba tlhome nlheng ya borwa ya motlaagana. 30Kgosana ya kgotla ya borraabo ba ditshika tsa Bakohathe a e nne Elisafane morwa Usiele. 31Tebelo ya bone a e nne letlole, lomati, setlhomo sa dipone, dibeso, dilwana tsa felo ga boitshepo tse ba direlang ka tsone, sebipo le tirelo yotlhe ya gone.
32Eleasare morwa Arone moperesiti a e nne ene kgosona ya dikgosana tsa Balefi, a nne molebedi wa bone ba ba lebetseng felo ga boitshepo.
33Losika lwa Bamaheli lo dule mo go Merari, le losika lwa Bamuši; tse ke tone ditshika tsa ga Merari. 34Ba ba badilweng mo go bone ka fa palong ya lonna lotlhe, go simolola ka ba ba kgwedi nngwe fela go ya kwa go bomogoloa bone, e ne e le 6 200. 35Kgosana ya ntlo ya borraabo ba ditshika tsa ga Merari e ne e le Suriele morwa Abihaile; bone ba tlhome ka fa ntlheng ya botsheka ya motlaagana. 36Tebelo e e laotsweng ya bomorwa Merari e nne dimati tsa motlaagana, le merapalego ya one, maotwana a one, ditlhako tsa one, dilo tsotlhe tsa one, le tirelo yotlhe ya one; 37le maotwana a lolwapa mo tikologong ya lone, le ditlhako tsa one, dimapo tsa one le megala ya one.
38Ba ba tlhomang fa pele ga motlaagana ntlheng ya botlhabatsatsi, fa pele ga mogope wa bophuthegelo bolebagana le botlhabatsatsi, a e nne Moše, le Arone le bomorwawe, ba tshegeditse tebelo ya felo ga boitshepo, e bong tebelo ya bana ba Iseraele; moeng yo o tlaa atamelang a a bolawe. 39Balefi botlhe ba ba badilweng, ba Moše le Arone ba ba badileng ka taolo ya ga Jehofa, ka ditshika tsa bone, lonna lotlhe go simolola ka ba ba kgwedi nngwe fela go ya kwa go bomogoloa bone, e ne e le 22 000.
Balefi ba tsaya boemo jwa batsalwapele ba Baiseraele
40Jehofa a raya Moše, a re: “Bala lonna lwa batsalwapele botlhe ba bana ba Iseraele, go simolola ka ba ba kgwedi nngwe fela go ya kwa go bomogoloa, bone, mme o dire palo ya maina a bone. 41O ntseele Balefi, (ke nna Jehofa) mo boemong jwa batsalwapele botlhe mo baneng ba Iseraele, le dikgomo tsa Balefi mo boemong jwa ditsalwapele tsotlhe mo dikgomong tsa bana ba Iseraele.” 42Moše a bala batsalwapele botlhe mo baneng ba Iseraele, jaaka Jehofa a mo laotse. 43Lonna lotlhe lwa batsalwapele ka fa palong ya maina, go simolola ka ba ba kgwedi nngwe fela go ya kwa go bomogoloa bone; ba ba badilweng mo go bone e ne e le 22 273.
44Jehofa a bua le Moše, a re: 45“Tsaya Balefi mo boemong jwa batsalwapele botlhe mo baneng ba Iseraele le dikgomo tsa Balefi mo boemong jwa dikgomo tsa bone; Balefi ba tlaa nna ba me; ke nna Jehofa. 46Ka ga ba ba 273, ba batsalwapele ba bana ba Iseraele, ba ba fetang palo ya Balefi, o tlaa ba rekolola. 47O tseele mongwe le mongwe dipapetlana tsa selefera di le tlhano; o di tseye ka fa selekanyong sa felo ga boitshepo. 48Madi a a rekolotseng ba ba setlholo ba bone, ba palo ya bone e fetileng, o a neye Arone le bomorwawe.” 49Mme Moše a tsaya madi a thekololo mo go bone ba ba setlholo, ba palo ya bone e fetileng ba ba rekolotsweng ke Balefi. 50Mo go batsalwapele ba bana ba Iseraele o ne a tsaya madi, a le dišekele di le 1 365 ka fa šekeleng sa felo ga boitshepo. 51Madi a thekololo Moše a a naya Arone le bomorwawe, ka fa lefokong la ga Jehofa, jaaka Jehofa a laotse Moše.
