DIPALO 20

₁Ka kgwedi ya ntlha phuthego yotlhe ya bana ba Iseraele, ya fitlha kwa sekakeng sa Tsine, mme batho ba nna mo Kateše; Miriame a swela teng a ba a fitlhwa teng. ₂Phuthego ya bo e se na metsi; mme ba phuthegela Moše le Arone. ₃Batho ba ganela le Moše, ba bua ba re: “A bo Modimo o ka bo o mmile ra swa jale ka bagarona ba swela fa pele ga Jehofa. ₄E bile lo lereditseng phuthego ya ga Jehofa mo nageng e, fa e bo ne ne re swela fano, rona le dikgomo tsa rona? ₅Lo re patikile ka ntlha yang go tlhatloga kwa Egepeto go re lere mo felong fano fa go bosula? Ga se felo ga dipeo, le fa e le ga difeige, le fa e le ga mafine, le fa e le digaranata, le gone ga go na metsi a a nowang.” ₆Moše le Arone ba tswa fa pele ga phuthego ba ya fa pele ga mojako wa mogope wa bophuthegelo, ba wela fa fatshe ka difatlhogo; mme kgalalelo ya ga Jehofa ya ba bonalela.

₇Jehofa a bua le Moše a re: ₈“Tsaya thobane o phuthe phuthego, wena le Arone mogoloo, lo bue le lefika fa pele ga matlho a bone, gore le ntshe metsi a lone; mme o tlaa ntshetsa metsi kwa go bone, a tswa mo lefikaeng; jalo o tlaa nosa phuthego le dikgomo tsa bone metsi.” ₉Moše a tsaya thobane fa pele ga Jehofa, a e tsaya jaaka a mo laetse.

₁₀Moše le Arone ba phuthela phuthego fa pele ga lefika, mme ene a ba raya, a re: “Utlwang jaana, batsuolodi ke lona, a re tlaa lo ntshetsa metsi mo lefikeng le?” ₁₁Moše a tsholetsa letsogo, a itaya lefika ka thobane ya gagwe gabedi; metsi a tswa a le matona thata, mme phuthego ya nwa, le dikgomo tsa bone.

₁₂Jehofa a raya Moše le Arone a re: “E re ka lo se ka lwa ntumela go intshepisa fa pele ga matlho a bana ba Iseraele, ke gone lo se ketlang lo fitlhisa phuthego e mo lefatsheng le ke le ba neileng.”

₁₃Ke one metsi a Meriba, kwa bana ba Iseraele ba neng ba ganela le Jehofa mme a itshupa a le boitshepo mo go bone.

₁₄Moše a roma barongwa ba tswa mo Kateše ba ya kwa kgosing ya Etome, a re: “Morwa rraago, e bong Iseraele, o bua jaana a re: O a e itse tapisego yotlhe e e re wetseng, ₁₅jaaka borraetsho ba kile ba fologela kwa Egepeto, mme ra aga mo Egepeto ka lobaka lo loleele, Baegepeto ba re direla maswe, rona le borraetsho; ₁₆e rile re goela kwa go Jehofa a utlwa lentswe la rona, a roma moengele a re ntsha mo Egepeto; bona, re mo Kateše motse o o kwano bokhutlong jwa molelwane wa gago. ₁₇Ke a rapela, mma re fete, re ralale lefatshe la gago; ga re ketla re ralala lotlhagare le fa e le tshimo ya mafine, le gone ga re ketla re nwa metsi a didiba; re tlaa feta ka tsela e kgolo ya kgosi fela, ga re ketla re fapogela ka fa ntlheng ya le legolo, le fa e le ka fa go la molema, go tsamaye re fapaanye molelwane wa gago.”

₁₈Etome a mo raya a re: “O se ka wa nthalala, nka tla ka go bololela ka tšhaka.” ₁₉Bana ba Iseraele ba mo raya ba re: “Re tlaa tlhatloga ka tsela e kgolo fela, mme fa re nwa metsi a gago, nna le dikgomo tsa me, foo ke tlaa go naya madi a one; ntesa fela ke ralale ka dinao, ke sa dire sepe se sele.”

₂₀Mme a re: “O se ka wa ralala.” Mme Etome a mmololela ka batho ba le bantsi, le ka letsogo le le thata. ₂₁Jalo Etome a gana go naya Iseraele tsela go ralala molelwane wa gagwe; foo Iseraele a mo fapoga.

₂₂Ba tloga ba tswa mo Kateše; mme bana ba Iseraele, e bong phuthego yotlhe ya fitlha fa thabeng ya Hore. ₂₃Jehofa a bua la Moše le Arone mo thabeng ya Hore, fa molelwaneng wa Etome a re: ₂₄“Arone o tlaa kopanngwa le ba ga gabo, gonne ga a ketla a tsena mo lefatsheng le ke le neileng bana ba Iseraele, ka lo ne lwa tsuololela lefoko la me kwa metsing a Meriba. ₂₅Tsaya Arone le Eleasare morwawe, o ba tlhatlose mo thabeng ya Hore; ₂₆o apole Arone diaparo tsa gagwe, o di apese Eleasare morwawe; Arone o tlaa kopanngwa le ba ga gabo, a bo a swela gone.” ₂₇Moše a dira jaaka Jehofa a laotse; ba palama thaba ya Hore mo ponong ya phuthego yotlhe. ₂₈Moše a apola Arone diaparo tsa gagwe, a di apesa Eleasare morwawe; Arone a swela teng mo godimo ga thaba; Moše le Eleasare ba fologa mo thabeng. ₂₉E rile phuthego yotlhe e bona fa Arone a sule, ba lelela Arone ka malatsi a le 30, e bong makgotla otlhe a Iseraele.