Maina a baperesiti le Balefi
1Mme jaana ba ke bone baperesiti le Balefi ba ba tlhatlogileng le Serubabele morwa Shealatiele, le Ješua: Seraia, Jeremia, Esera; 2Amaria, Maluke, Hatuše; 3Shekania, Rehume, Meremothe; 4Ito, Genethoi, Abija; 5Mijamine, Maadia, Bilega; 6Shemaia le Joiaribe, Jetaia; 7Salu, Amoke, Hilekia, Jetaia. Bao e ne e le ditlhogo tsa baperesiti le tsa bomonnaa bone mo metlheng ya ga Ješua.
8Gape Balefi: Ješua, Binui, Katemiele, Sherebia, Juta le Matania, yo e ne e le molebedi wa ba ba lebogang, ene le bomonnawe. 9Le ene Bakebukia le Uno, bomonnaa bone, ba lebaganye nabo mo ditebelong.
Losika lwa Moperesiti mogolo Ješua
10Ješua a tsala Joiakime, Joiakime a tsala Eliašibe, Eliašibe a tsala Joiata, 11Joiata a tsala Jonathane, Jonathane a tsala Jadu.
Ditlhogo tsa makgotla a Baperesiti
12Mo metlheng ya ga Joiakime go ne go le baperesiti, ditlhogo tsa makgotla a borara: Wa ga Seraia, Meraia; 13wa ga Jeremia, Hanania; wa ga Esera, Mešulame; wa ga Amaria, Johanane; 14wa ga Maluki, Jonathane; wa ga Shebania, Josefe; 15wa ga Harime, Atena; wa ga Meraiothe, Helekai; 16wa ga Ito, Sekaria; wa ga Ginethone, Mešulame; 17wa ga Abija, Sikeri; wa ga Miniamine, wa ga Moadia, Piletai; 18wa ga Bilega, Shamua; wa ga Shemaia, Jehonathane; 19le wa ga Joiaribe, Matenai; wa ga Jetaia, Usi; 20wa ga Salai, Kalai, wa ga Amoke, Ebere; 21wa ga Hilekia, Hašabia; wa ga Jetaia, Nethanele.
Lokwalo lwa baperesiti le Balefi mo Tempeleng
22Ya re mo metlheng ya ga Eliašibe, Joiate, le Johanane, le Jatua, ba bo ba kwadilwe ditlhogo tsa makgotla a borara; baperesiti le bone jalo, mo pusong ya ga Dario wa Moperesia. 23Bomorwa Lefi, ditlhogo tsa makgotla a borara, ba kwadilwe mo lokwalong lwa ditirafalo, fela go tla go fitlha mo metlheng ya ga Johanane morwa Eliašibe.
Tiro ya baperesiti le Balefi
24Le ditlhogo tsa Balefi: Hašabia, Sherebia le Ješua morwa Katamiele, ba na le bomonnaa bone ba lebaganye nabo, go baka le go ntsha malebogo, ka fa taolong ya ga Dafite monna wa Modimo, tebelo e lebaganye le tebelo.
25Matania, le Bakebukia, Obatia, Mešulame, Talemone, Akube e ne e le balebedi ba kgoro ba tshegeditse tebelo fa dikgorong tsa matlo a dipolokelo. 26E ne e le bao mo metlheng ya ga Joiakime morwa Ješua, morwa Josatake, mo metlheng ya ga Nehemia molaodi, le ya ga Esera mokwadi.
Nehemia o kgakola dithako
27E rile ka neelo ya lorako lwa Jerusalema ba batla Balefi mo mafelong otlhe a bone, go ba lere mo Jerusalema, go tla ba dira neelo ya lorako ka boitumelo, ka malebogo le ka kopelo, ka disemebale, le ka disaletere le ka diharepe. 28Bomorwa baopedi ba phuthega, ba tswa mo lobaleng mo tikologong ya Jerusalema, le mo metsaneng ya Banetofathe; 29le kwa Bethegilegale, le kwa matlhagareng a Geba le Asemafethe; gonne baopedi ba ne ba ikagetse metsana mo tikologong ya Jerusalema. 30Baperesiti le Balefi ba iitshekisa, ba ba ba itshekisa batho, le dikgoro le lorako.
31Foo ka lere dikgosana tsa Juta mo godimo ga lorako, ka baakanya masomo a le mabedi a matona a ba ba lebogang, mme ba tsamaya ba bopeletse; lesomo le lengwe la tsamaya ka fa ntlheng ya tsogo le legolo mo godimo ga lorako ba lebile kwa kgorong ya letshotelo. 32Morago ga bone ga tsamaya Hošaia le bontlhanngwe jwa dikgosana tsa Juta, 33le Asaria, le Esera, Mešulame, 34Juta, le Benjamine, le Shemaia le Jeremia, 35le bangwe ba bomorwa baperesiti ba tshotse dinaka; Sekaria morwa Jonathane, morwa Shemaia, morwa Matania, morwa Mikaia, morwa Sakure, morwa Asafe; 36le bomonnawe, Shemaia, le Asaraele, Milalai, le Gilalai, le Maai, le Nethanele, le Juta le Hanani, ba na le diletso tsa kopelo tsa ga Dafite monna wa Modimo; Esera mokwadi a bo a le fa pele ga bone. 37Mme ba tla ka kgoro ya motswedi, ba tlhamalala ba tlhatloga ka direpudi tsa motse wa ga Dafite, fa botlhatlogong jwa lorako, fa godimo ga ntlo ya ga Dafite, fela kwa kgorong ya metse, ntlheng ya botlhabatsatsi.
38Lesome le lengwe la bone ba ba lebogang, la ya go ba kgatlhantsha, le nna ke ba setse morago, ke na le bontlhanngwe jwa batho, re le mo godimo ga lorako, godimo ga kago e e godileng ya maiso a boubelo, go ya fela kwa lorakong lo lo atlhameng; 39le kwa godimo ga kgoro ya Eferaime, le ka kgoro e kgologolo, le ka kgoro ya ditlhapi le kago e e godileng ya ga Hananele, le kago e e godileng ya Hamea, go ya fela kwa kgorong ya dinku; mme ba fitlha ba ema mo kgorong ya balebedi.
40Jalo masomo a mabedi a bone ba ba lebogang mo ntlong ya Modimo ba ema, le nna ke na le bontlhanngwe jwa balaodi; 41le baperesiti, Eliakime, Maaseia, Miniamine, Mikaia, Elioenai, Sekaria le Hanania, ba tshotse dinaka; 42le Maaseia, le Shemaia, le Eleasare, le Usi, Johanane, le Malekia, le Elame le Esera. Baopedi ba opelela godimo, ba na le Jeserahia molebedi wa bone. 43Ba isa ditlhabelo tse dikgolo ka tsatsi leo, ba itumela, gonne Modimo o no o ba itumedisitse ka boitumelo jo bogolo; le basadi le bana ba itumela. Jalo boitumelo jwa Jerusalema jwa utlwala fela kwa kgakala.
Nehemia o letlelela batho go direla Tempele
44Ya re ka letsatsi leo ga tlhongwa batho, ba tlhomelwa dikhumo tsa matlwana, le ditshupelo tsa tsholetso, le mabutswapele, le tsa bosome, go tla ba di phuthela gone, ka fa matlhagareng a metse, le dikabelo tse di laoletsweng baperesiti le Balefi ke molao; gonne Bajuta ba ne ba itumelela baperesiti le Balefi ba ba direlang. 45Ba tshegetsa tebelo ya Modimo wa bone, le tebelo ya bontlafatso, le baopedi le balebedi ba kgoro ba dira jalo, ka fa taolong ya ga Dafite le ya ga Solomone morwawe. 46Gonne e rile mo motlheng wa ga Dafite le Asafe bogologolo, go ne go le tlhogo ya baopedi, le difela tsa pako le tsa tebogo tse di lebogang Modimo. 47Baiseraele botlhe mo motlheng wa ga Serubabele le mo motlheng wa ga Nehemia, ba ntsha dikabelo tsa baopedi le tsa balebedi ba kgoro, ka fa letsatsi lengwe le lengwe le lopang ka teng. Mme bone ba itshepisetsa Balefi; mme Balefi ba itshepisetsa bomorwa Arone.
