NAHUME 2

₁Yo o phatlakanyang o tsile

fa pele ga sefatlhogo sa gago;

disa kago ya gago ya phemelo,

lebela tsela, o ithatafatse lotheka,

o thatafatse nonofo ya gago segolo.

₂Gonne Jehofa o bile o busetsa

Jakobe tlotlomalo

jaaka tlotlomalo ya ga Iseraele;

gonne batsholodi ba ba tsholotse,

ba sentse dikala tsa bone

tsa mafine.

₃Thebe ya diganka tsa gagwe

e hubiditswe,

banna ba ba dinatla ba gagwe

ba apere bohibidu jo bo letlhololo;

dikara di šadiega ka tshipi ya setale

mo motlheng wa ipaakanyo

ya gagwe,

le marumo a otwa

mo go boitshegang.

₄Dikara di taboga ka mokgwaso

mo mebileng,

di thulana mo ditseleng tsa meheru;

ponalo ya tsone

e ntse jaaka ditime,

di taboga jaaka dikgadima.

₅O gakologelwa ba gagwe

ba ba itsegeng;

ba kgokgoetsega mo go tsamaeleng

gongwe ga bone;

ba itlhaganelela lorako lwa one,

mme sesiro sa phemelo

se baakantswe.

₆Dikgoro tsa noka di budilwe,

ntlo ya kgosi e rutlologile.

₇Husabe o bipolotswe,

wa tlosiwa,

malata a gagwe a kuruetsa

e kete ka kodu ya matseba,

ba ititaya dihuba.

₈Ninefe o sa le a nna

jaaka lekadiba la metsi

bogologolo;

le fa go ntse jalo ba a tshaba;

ba kua, ba re: “Emang! Emang!

Mme go bo go se ope

yo o šebang kwa morago.

₉Tsayang thopo ya selefera,

tsayang thopo ya gouta!

Gonne ga go na bokhutlo

jwa thopo e e beilweng,

le ya kgalalelo ya dilwana tsotlhe

tse di eletsegang tsa ntlo.

₁₀O lolea fela, o loforotlho,

o kgakgabetse,

le pelo ya tlhapologa,

le mangole a itaana,

le tlalelo e e mahehe

e mo dithekeng tsotlhe,

le difatlhogo tsa lona di khwatile.

₁₁O kae mongobo wa ditau,

le bojelo jwa ditawana,

kwa tau e tona le tau e namagadi

di ntseng di tsamaya teng,

le tawana ya tau,

mme go ne go se na ope

yo o di boifisang?

₁₂Tau e ne ya gagola

mo go lekanyeng bana ba yone,

ya betelela ditau tsa ga yone

tse dinamagadi,

ya olela thopo

mo dikgageng tsa yone,

le tse di gagotsweng

mo mengobong ya yone,

ga ba ga tlala.