MAREKO 13

₁E rile a tswa mo tempeleng, mongwe wa barutwa ba gagwe a mo raya a re: “Moruti, bona maje a, ka fa a ntseng ka teng, le dikago tse ka fa di ntseng ka teng.”

₂Jesu a mo raya a re: “A o a di bona dikago tse dikgolo tse? Ga go ketla go tlogelwa fa lentswe lepe le tlhatlaganye le le lengwe, le le se ketlang le dingwa.”

₃Ya re a dutse mo Thoteng ya Lotlhware, bolebana le tempele, bo Petere le Jakobe le Johane le Anterea ba mmoletsa kwa thoko ba re: ₄“Re bolelele gore dilo tse di tlaa dirafala leng, le sesupo e tlaa nna eng sa fa dilo tsotlhe tse di tloga di dirafala?”

₅Jesu a simolola go ba raya a re: “Lo itise gore motho ope a se ka a lo timetsa. ₆Bantsi ba ba tlaa tlang ka leina la me, ba ikaya ba re: ‘Ke nna ene;’ mme ba tlaa timetsa batho ba le bantsi. ₇Mme lo tlaa re lo utlwela dintwa, le medumo ya dintwa, lo ise ka lwa fuduega; dilo tse di na le go dirafala fela; mme e tlaa bo e ise e nne bokhutlo. ₈Gonne morafe o tlaa tsogologela morafe, le bogosi bogosi; go tlaa nna dithoromo tsa lefatshe mo mafelong mangwe le mangwe; go tlaa nna meswele; mme dilo tse e be e le tshimologo ya metlotsedi.

₉“Lo itise, gonne ba tlaa lo neela mo makgotleng; lo tlaa bediwa mo matlong a thuto; lo tlaa ema fa pele ga balaodi le dikgosi ka ntlha ya me, go nna tshupo mo go bone. ₁₀Mme Mafoko a a Molemo a na le go rerelwa merafe yotlhe pele. ₁₁Mme e tlaa re ba lo gogela kwa ditshekong, ba lo neela balaodi, lo se ka lwa tlhobaelela pele se lo tlaa se buang; fela se lo tlaa se newang mo nakong eo, lo bue sone fela, gonne e tlaa bo e se lona ba lo buang, e tlaa bo e le Mowa o o Boitshepo. ₁₂Mme morwa rramotho o tlaa neela morwa rraagwe go bolawa, le rra motho ngwana wa gagwe; le bana ba tlaa tsogolegela batsadi ba bone, ba dira gore ba bolawe. ₁₃Lo tlaa ilwa ke batho botlhe ka ntlha ya leina la me; mme yo o itshokelang bokhutlong, yoo o tlaa bolokwa.

₁₄“E tlaa re lo bona yo o makgapha a a swafatsang a eme fa o sa tshwanelang go ema teng, yo o balang a a tlhaloganye, foo ba ba mo Jutea ba tshabele kwa dithabeng; ₁₅le ene yo o fa godimo ga ntlo a se fologe, le fa e le go tsena mo teng, go tsaya sengwe mo ntlong ya gagwe; ₁₆mme yo o kwa nageng a se ka a boela kobo ya gagwe. ₁₇Go tlaa bo go latlhega bone ba ba baimana, le ba ba amusang mo metlheng eo! ₁₈Mme lo rapele gore go se ka ga nna go le mariga. ₁₉Gonne metlha eo e tlaa nna ya pitlagano, jaaka go ise go ke go bonwe gope, e sa le ka tshimologo ya tlholego e Modimo o e tlhodileng, le gompieno le gone ga go ketla go tlhola go bonwa gope. ₂₀Mme fa Morena a ko a se ka a khutshwafatsa metlha eo, e ka bo ne ne fano motho ope a se nka a bolokwa; mme a khutshwafatsa metlha ka ntlha ya baitshenkedwi ba o ba itshenketseng.

₂₁“Foo fa motho mongwe a ka lo raya a re: ‘Bonang, Keresete ke yo;’ kgotsa, ‘Bonang, o fale;’ lo se ka lwa dumela. ₂₂Gonne go tlaa tsoga boKeresete ba e seng bone, le baperofeti ba e seng bone, mme ba tlaa ntsha ditshupo le dikgakgamatso, gore ba tle ba timetse baitshenkedwi fa go ka nna jalo. ₂₃Mme lona lo itise; bonang, ke lo boleletse dilo tsotlhe go sa le gale.

₂₄“E tlaa re mo metlheng eo, morago ga pitlagano eo, letsatsi le tlaa fifala, kgwedi le yone ga e ketla e ntsha lesedi la yone; ₂₅le dinaledi di tlaa bo di wa kwa legodimong, le dinonofo tse di mo magodimong di tlaa reketlisiwa. ₂₆Ke gone ba tlaa bonang Morwa Motho a tla mo marung ka nonofo e kgolo le kgalalelo. ₂₇Foo o tlaa roma baengele ba gagwe, mme ba tlaa phutha baitshenkedwi ba gagwe kwa diphefong tsoo nne, go tswa bofelelong jwa lefatshe go ya bofelelong jwa legodimo.

₂₈“Jaana ithuteng ka setlhare sa mofeige setshwantsho sa sone; e re fa kala ya sone e setse e le nana, mme e kukunya makakaba, lo a itse fa selemo se atametse. ₂₉Le lona fela jalo, e tlaa re lo bona dilo tse di dirafala, lo bo lo itse fa a le gaufi, a le fela fa mejakong. ₃₀Ammaaruri ke a lo raya, losika lo ga lo ketla lo feta, go tle go tsamaye dilo tsotlhe tse, di dirafale pele. ₃₁Legodimo le tlaa feta le lefatshe; mme mafoko a me ga a ketla a feta.

₃₂“Mme ka ga letsatsi leo kgotsa nako eo, ga go itse ope, le fa e le baengele ba ba kwa legodimong, le fa e le Morwa, fa e se Rara fela. ₃₃Itiseng, lo lebelele lo rapele, gonne ga lo itse lobaka gore ke lofe. ₃₄Go tshwana jaaka fa monna a ile go jaka kwa lefatsheng le sele, e re ka a tlogetse ntlo ya gagwe, a bile a neetse batlhanka ba gagwe thata, le mongwe le mongwe tiro ya gagwe, le gone a laola molebedi wa kgoro gore a lebelele. ₃₅Ke gone, lebelelang, gonne ga lo itse gore morena wa ntlo o tlaa tla leng, kgotsa ka maabanyane, kgotsa bosigogare, kgotsa ka makuku, kgotsa a ka bosigo boo sa; ₃₆e se re kgotsa fa a ka tla ka tshoganetso a lo fitlhela lo robetse. ₃₇Mme se ke se rayang lona, ke se raya botlhe fela ka re: ‘Lebelelang.’ ”