MAREKO 11

₁E rile ba setse ba atametse Jerusalema, ba le kwa Bethefage le Bethania, fa Thoteng ya Lotlhware, a roma barutwa ba gagwe ba le babedi. ₂A ba raya a re: “Yang mo motsaneng o lo lebaganyeng nao; lo tlaa re lo tsena mo go one lo akofe lo fitlhele eselana e golegilwe, e e iseng e ke e palangwe ke ope; lo e golole, lo e lere kwano. ₃Mme e re fa mongwe a lo raya a re: ‘Lo dirang jaana?’ Lo re: ‘Morena o a e batla, mme o tlaa ba a akofa a e busetsa kwano.’ ”

₄Ba tsamaya ba ya ba fitlhela eselana e golegilwe fa mojako, ka fa ntle, mo mmileng o o paa fela; mme ba e golola. ₅Bangwe ba batho ba ba emeng teng, ba ba raya ba re: “Lo dirang lo golola eselana?”

₆Ba bua nabo fela jaaka Jesu a ne a buile, mme ba ba lesa ba tsamaya. ₇Mme ba isa eselana kwa go Jesu, ba baya diaparo tsa bone mo go yone, mme a e palama. ₈Batho ba le bantsi ba ala diaparo tsa bone mo tseleng, ba bangwe ba ala dikala tse ba tswang go di kgaola mo nageng. ₉Ba ba eteletseng pele, le ba ba setseng morago, ba thela lošalaba, ba re: “Hosana, go bakwe yo o tlang ka leina la Morena; ₁₀a go bakwe bogosi jo bo tlang, bogosi jwa ga rraetsho Dafite; Hosana mo bogodimodimong.”

₁₁Mme a tsena mo Jerusalema, mo tempeleng; mme a re a sena go kobakoba dilo tsotlhe, ka go setse go le maitseboa thata, a tswa a ya kwa Bethania a na le ba ba 12.

₁₂Ya re ka moso, ba sena go tswa mo Bethania, a bolawa ke tlala. ₁₃Ya re a bonela mofeige kgakala, o na le makakaba, a ya kwa go one, a re e tlaa re gongwe a bone sengwe mo go one, mme a re a fitlha fa go one a se ka a fitlhela sepe fa e se makakaba fela, gonne e ne e ise e nne lobaka lwa difeige. ₁₄Mme a o raya a re: “Motho ope a se ka a tlhola a ja loungo mo go wena gope.” Barutwa ba gagwe ba mo utlwa.

₁₅Mme ba fitlha mo Jerusalema; mme a tsena mo tempeleng, a simolola go kgoromeletsa kwa ntle ba ba rekisang, le ba ba rekang mo tempeleng, a pitikolola dimati tsa ba ba ananyang madi, le ditulo tsa ba ba rekisang maphoi; ₁₆a se ka a leseletsa motho ope go ralala tempele a tshotse sejana. ₁₇Mme a ruta, a ba raya a re: “A ga go a kwalwa ga twe: ‘Ntlo ya me e tlaa bidiwa Ntlo ya thapelelo ya merafe yotlhe’? Mme lona lo e ntshitse mongobo wa dinokwane.”

₁₈Ditlhogo tsa baperesiti le bakwadi ba go utlwa, mme ba senka ka fa ba ka mo senyang ka teng, gonne ba mmoifa, ka batho botlhe ba gakgamaletse thuto ya gagwe.

₁₉E ne e tle e re go le maitseboa a tswe mo motseng.

₂₀Ya re ka moso ba feta, ba fitlhela mofeige o omeletse go ya le kwa meding. ₂₁Mme Petere ka a gakologelwa, a mo raya a re: “Moruti bona, mofeige o o letseng o o hutsitse o bile o omeletse.”

₂₂Mme Jesu a ba raya a re: “Nnang le tumelo mo Modimong. ₂₃Ammaaruri ke a lo raya, le yo o tlaa rayang thaba e, a re: ‘Manologa o thabuegele mo lewatleng;’ fa a sa belaele mo pelong ya gagwe, a dumela fa se o se buang se tlaa dirala; o tlaa se bona. ₂₄Ke gone ke lo rayang ke re, dilo tsotlhe tse lo di rapelelang lo di lopa, lo dumela fa lo di amogetse, mme lo tlaa di bona. ₂₅E tle e ne e re lo ema lo rapela, fa mongwe a le molato le lona lo mo itshwarele; gore Rraeno yo o kwa legodimong le ene a lo itshwarele ditlolo tsa lona. ( ₂₆Fa lona lo sa itshwarele, le gone Rraeno yo o kwa legodimong ga a ketla a lo itshwarela ditlolo tsa lona.)”

₂₇Mme ba ba ba tla gape mo Jerusalema; ya re a tsamayatsamaya mo tempeleng ga tla kwa go ene ditlhogo tsa baperesiti, le bakwadi, le bagolwane; ₂₈ba mo raya ba re: “Dilo tse o di dira ka taolo efe? Le yo o go neileng taolo ya go dira dilo tse ke mang?”

₂₉Jesu a ba raya a re: “Ke tlaa lo botsa potso nngwe, lo mphetole, mme ke tlaa lo bolelela taolo e ke dirang dilo tse ka yone. ₃₀Kana kolobetso ya ga Johane, a e ne e tswa legodimong kgotsa mo bathong? Mphetolang.”

₃₁Ba tseisanya kgang ba re: “E tlaa re fa re re: ‘E tswa legodimong,’ ene a re reye a re: ‘Mme lo ne lo sa mo dumeleleng?’ ₃₂Fa re ka re: ‘E tswa mo bathong’ ” – ba ne ba boifa batho; gonne ruri batho botlhe ba kaya Johane fa e ne e le moperofeti. ₃₃Mme ba fetola Jesu ba re: “Ga re itse.” Jesu a ba raya a re: “Le nna ga ke lo bolelele taolo e ke dirang dilo tse ka yone.”