MAREKO 1

₁Tshimologo ya Mafoko a a Molemo a ga Jesu Keresete, Morwa Modimo. ₂Fela jaaka go kwadilwe mo go Isaia moperofeti ga twe:

₄Johane a tla, ene yo o neng a kolobetsa kwa nageng, a ba a rera kolobetso ya boikwatlhao jwa go itshwarela dibe. ₅Mme ga tshologela kwa go ene ba lefatshe lotlhe la Jutea, le botlhe ba Jerusalema; ba kolobediwa ke ene mo nokeng ya Joretane, ba ipolela dibe tsa bone.

₆Mme Johane, diaparo tsa gagwe e ne e le tsa boboa jwa kamela, a bile a itlamile ka moitlamo wa letlalo mo lothekeng lwa gagwe, mme a ja tsie le dinotshe tsa naga. ₇Mme a rera a re: “Morago ga me go tla mongwe yo o nonofileng bogolo go nna, yo kgole ya setlhako sa gagwe ke sa tshwanelang go inama ke e hunolola. ₈Nna ke lo kolobetsa ka metsi; mme ene o tlaa lo kolobetsa ka Mowa o o Boitshepo.”

₉Mme ya re mo metlheng eo, Jesu a tswa Nasaretha wa Galilea, mme a kolobediwa ke Johane mo Joretane. ₁₀Mme ya re fela a tlhatloga mo metsing, a bona magodimo a fatogile, le Mowa o ntse jaaka lephoi o fologela mo go ene. ₁₁Mme lentswe la tswa mo magodimong la re: “O morwaake yo o rategang, ke itumela thata mo go wena.”

₁₂Mme Mowa wa akofa wa mo kgokgweeletsa kwa nageng. ₁₃Mme a nna mo nageng malatsi a le 40 a raelwa ke Satane; a nna teng le diphologolo; mme baengele ba mo direla.

₁₄Jaana e rile Johane a sena go golegwa, Jesu a tla mo Galilea, a rera Mafoko a a Molemo a Modimo, ₁₅a re: “Lobaka lo fitlhile, e bile bogosi jwa Modimo bo atametse; ikwatlhayeng, lo dumele Mafoko a a Molemo.”

₁₆Ya re a tsamaya fa lewatleng la Galilea, a bona Simone le monnawe Anterea ba konopela lotloa mo lewatleng; gonne ba ne ba le batshwari ba ditlhapi. ₁₇Mme Jesu a ba raya a re: “Tlang lo ntshale morago, mme ke tlaa lo dira go tla lo nna batshwari ba batho.” ₁₈Ba akofa ba tlogela ditloa, ba mo sala morago.

₁₉Ya re a ya fa pelenyana, a bona Jakobe morwa Sebete, le Johane monnawe, ba le bone ba bileng ba le mo mokorong ba tlhamaganya ditloa. ₂₀A akofa a ba bitsa; mme ba tlogela Sebete rraabo mo mokorong, le batlhanka ba ba thapilweng ka tuelo, mme ba mo sala morago.

₂₁Ba ya ba fitlha mo Kaperenaume; mme ka letsatsi la Sabata a tsena mo ntlong ya thuto, mme a ruta. ₂₂Mme batho ba gakgamadiwa ke thuto ya gagwe; gonne o ne a ba ruta jaaka mongwe yo o nang le taolo, e seng jaaka bakwadi.

₂₃Mme ga tshoganwa ka go bile go le monna mongwe mo ntlong ya bone ya thuto, a na le mowa o o maswe; ₂₄mme a goa, a re: “Re dirang ka wena, wena Jesu wa Nasaretha? A o tsile go re senya? Ke a go itse yo o leng ene, o Moitshepi wa Modimo.”

₂₅Mme Jesu a o kgalemela a re: “Didimala, mme o tswe mo go ene!” ₂₆Mowa o o maswe wa tswa mo go ene o mo fafamosa, o goa ka lentswe le legolo.

₂₇Ba gakgamala botlhe, ba ba ba tla ba botsanya ba re: “Ana selo se ke eng? A thuto e ntšha! O laola ka thata le e leng mewa e e maswe, mme e mo utlwe.”

₂₈Mme tumedi ya gagwe ya akofa ya ya le lefatshe lotlhe la Galilea le mo tikologong ya lone.

₂₉E rile fela ba sena go tswa mo ntlong ya thuto, ba ya go tsena mo ntlong ya ga Simone le Anterea, ba na le Jakobe le Johane. ₃₀Jaana mogwagadia Simone, wa mosadi, a bo a bobola botlhoko jwa letshoroma; mme ba akofa ba mo mmolelela. ₃₁Mme a tla a mo tshwara ka seatla, a mo kakatlolola; mme letshoroma la mo tlogela, mme mosadi a ba direla.

₃₂E rile go le maitseboa letsatsi le kotlomela, ba lere kwa go ene botlhe ba ba bobolang, le ba ba tsenyweng ke mewa e e bosula. ₃₃Motse otlhe wa bo o phuthegile o kokoanye fa mojakong. ₃₄Mme a fodisa batho ba le bantsi ba ba lwalang malwetse a le mantsi, a kgoromeletsa ntle mewa e e bosula e le mentsi; mme a se ka a leseletsa mewa e e bosula go bua, ka gobo e ne e mo itse.

₃₅Ya re ka moso ka makuku a mantsho, a tsoga, a tswa, a ya kwa nageng mo bojosing, mme a rapela teng. ₃₆Mme Simone le ba o nang nabo ba mo latela. ₃₇Ba mo fitlhela, ba mo raya ba re: “Batho botlhe ba a go batla.”

₃₈Ene a ba raya a re: “A re yeng go sele, re ye metseng e mengwe e e kwa pele, gore ke tle ke rere Mafoko a a Molemo le gone mo go yone; gonne ke sone se ke tswetseng go se dira.”

₃₉Mme a tsamaya le lefatshe lotlhe la Galilea, a etla a tsena mo matlong a bone a thuto, a rera, a kgoromeletsa mewa e e bosula ntle.

₄₀Ga tla molepero kwa go ene, a mo khubamela; a mo raya a re: “Fa o rata o na le thata ya go mphepafatsa.”

₄₁Ya re ka a tlhomoga pelo, a otlolola letsogo, a mo ama, a mo raya a re: “Ke a rata, phepafadiwa.” ₄₂Mme lepero la mo tlogela ka bofefo, a ba a phepafala. ₄₃A mo laya thata, a akofa a mo tsamaisa, ₄₄a mo raya a re: “Bona, o se ka wa bolelela ope sepe, mme o tsamaye fela, o ye go itshupetsa moperesiti, o isetse go phepafadiwa ga gago tshupelo ka dilo tse Moše o di laotseng go nna tshupo mo go bone.”

₄₅Mme ene a tswa, a simolola go kakanya thata, le go utlwatsa tiro e mo ntlheng tsotlhe, Jesu a ba a tla a retelelwa ke go tsena mo motseng ka go bonwa, mme a nna kwa ntle mo mafelong a a kwa bojosing; ba mo tshologela ba tswa ntlheng tsotlhe fela.