MATHAIO 26

₁Ga dirala, e rile Jesu a sena go wetsa dithuto tsotlhe tse, a raya barutwa ba gagwe a re: ₂“Lo a itse fa e tlaa re malatsi a le mabedi a sena go feta, go bo go tla modiro wa Tlolaganyo; mme Morwa Motho o tlaa bo a neelwa go bapolwa.”

₃Foo ditlhogo tsa baperesiti, le bagolwane ba batho, ba phuthegela kwa kgotleng ya moperesiti yo mogolo, yo o ne a bidiwa Kaiafase; ₄mme ba gakololana mmogo gore ba tshware Jesu ka maano, ba mmolaye. ₅Mme ba re: “E seng go le modiro, go ka tla ga tsoga pheretlhego mo bathong.”

₆Jaana e rile Jesu a le mo Bethania, mo ntlong ya ga Simone wa molepero, ₇ga tla mosadi kwa go ene, a tshotse sedibelwana sa alebasetara, se na le setlolo se se thata bobe go rekwa, mme a se thela mo tlhogong ya gagwe, ka a dutse a ja. ₈E rile barutwa ba bona jalo, ba gakatsega ba re: “Ana tshenyo e ke ya go reng? ₉Gonne setlolo se, se ka bo se ne se rekisitswe, sa bona madi a le mantsi, mme a newa bahumanegi.”

₁₀Jesu ka a ba lemoga, a ba raya a re: “Ana lo tshwenyetsang mosadi? Gonne o dirile tiro e e molemo mo go nna. ₁₁Gonne bahumanegi lo na nabo ka metlha yotlhe; mme nna ga ke nne le lona ka metlha yotlhe. ₁₂Gonne o rile ka a gorometsa setlolo se mo mmeleng wa me, a bo a dira jalo go mpaakanyetsa phitlho. ₁₃Ammaaruri ke a lo raya: Gongwe le gongwe mo lefatsheng lotlhe fela, kwa Mafoko a, a a Molemo, a tlaa rerwang teng, le sone se mosadi yo o se dirileng se tlaa bolelwa teng, gore e nne segopodiso ka ga gagwe.”

₁₄Foo mongwe wa ba ba 12, yo o bidiwang Jutase Isekariote, a ya ditlhogong tsa baperesiti, ₁₅a re: “Lo tlaa nnaya eng, ke tle ke mo lo neele?” Mme ba mo lekanyetsa dipapetlana tsa selefera di le 30. ₁₆Go tswa fa lobakeng loo a senka ka fa o ka mo ba neelang ka teng.

₁₇Jaana e rile ka letsatsi la ntlha la senkgwe se se sa bedisiwang, barutwa ba tla kwa go Jesu ba re: “O rata ra ya go go baakanyetsa kae, gore o jele Tlolaganyo teng?”

₁₈Mme a re: “Yang kwa motseng, kwa go molebe, lo mo reye lo re: ‘Moruti a re: Lobaka lwa me lo setse lo atametse; ke tlaa jela Tlolaganyo kwa ntlong ya gago le barutwa ba me.’ ”

₁₉Barutwa ba dira jaaka Jesu a ba kaetse; mme ba baakanya Tlolaganyo.

₂₀Jaana ya re go le ka maabanyane a bo a dutse a ja le barutwa ba ba 12. ₂₁Mme ya re ba ja, a re: “Ammaaruri ke a lo raya: Mongwe wa lona o tlaa nkoka.”

₂₂Mme ba hutsafala thata, ba simolola go mo raya mongwe le mongwe ba re: “A ke nna, Morena?”

₂₃A ba fetola a re: “Yo o tsenyang seatla sa gagwe mo sejaneng le nna, ke ene yo o tlaa nkokang. ₂₄Morwa Motho o tsamaya fela jaaka go kwadilwe ka ga gagwe; mme go bo go latlhega monna yo Morwa Motho o okwang ke ene! Go ka bo go le molemo mo monneng yoo fa a ka bo a se ka a tsalwa.”

₂₅Mme Jutase yo o mo okang, a mo fetola a re: “A ke nna, Moruti?” A mo raya a re: “O boletse.”

₂₆Ya re ba sa ja, Jesu a tsaya senkgwe, a se segofatsa, a se ngathoganya; a se naya barutwa a re: “Tsayang lo je; se ke mmele wa me.”

₂₇Mme a tsaya senwelo, a leboga, a se ba naya a re: “Nwang lotlhe ga sone; ₂₈gonne se ke madi a me a kgolagano e ntšha, a a tshololelwang ba le bantsi go tla ba itshwarelwa dibe. ₂₉Ke a lo raya: Ga nketla ke tlhola ke nwa loungo lo lwa mofine, go tle go tsamaye go fitlhe letsatsi le ke tlaa lo nwang lo le loša le lona ka lone, mo bogosing jwa ga Rre.”

₃₀E rile ba sena go opela sefela, ba tswa ba ya kwa Thoteng ya Lotlhware.

₃₁Foo Jesu a ba raya a re: “Lona lotlhe lo tlaa kgotšwa ka ga me sigong jono; gonne go kwadilwe ga twe: ‘Ke tlaa itaya modisa, mme dinku tsa letsomane di tlaa falalediwa koo.’ ₃₂Mme e tlaa re ke sena go tsosiwa, ke tlaa lo etelelela pele kwa Galilea.”

₃₃Petere a fetola a re: “Le fa botlhe ba ka kgotšwa ka ga gago, nna ga nketla ke kgotšwa gope.”

₃₄Jesu a mo raya a re: “Ammaaruri ke a go raya ka re: Sigong jono fela, koko e tona e ise e lele, o tlaa bo o intatotse gararo.”

₃₅Petere a mo raya a re: “Le fa nka bo ke na le go swa nao, le fa go ntse jalo ga nketla ke go itatola.” Le barutwa botlhe ba bua fela jalo.

₃₆Foo Jesu a tla nabo kwa felong fa go tweng Gethesemane, mme a raya barutwa ba gagwe a re: “Lona lo dule fa, ka nna ke ya fale, ke ya go rapela.” ₃₇Mme a tsaya Petere le bomorwa Sebete boo babedi a ya nabo, mme a simolola go hutsafala le go huduega mo go botlhoko. ₃₈Foo a ba raya a re: “Mowa wa me o hutsafetse thata, e le mo go isang losong fela; nnang fa, lo lebelele le nna.”

₃₉Mme a ya fa pelenyana, a wela ka sefatlhogo fa fatshe, a rapela a re: “Rra we, fa go ka nna jalo, a senwelo se, se mphete, le fa go ntse jalo, e seng ka fa go rateng ga me, e leng ka fa go rateng ga gago.”

₄₀A tla barutweng, a ba fitlhela ba robetse, mme a raya Petere, a re: “Ao! A lo ne lo sa ka ke lwa lebelela le nna ka lobakanyana fela? ₄₁Lebelelang, lo rapele, gore lo se tsene mo thaelong; mowa one o tlhaga, mme nama e bokoa.”

₄₂Gape a tsamaya lwa bobedi, a rapela, a re: “Rra we, fa senwelo se, se sa ka ke sa feta fa ke sa se nwe, a go rata ga gago go dirafale.” ₄₃A ba a tla gape a ba fitlhela ba robetse, gonne matlho a bone a ne a bokaletse.

₄₄Mme a ba tlogela gape, a tsamaya, a rapela lwa boraro, a fela a ntse a bua mafoko ao fela. ₄₅Foo a tla barutweng, a ba raya a re: “Lo nne lo robale jaanong, lo ikhutse; bonang, nako e atametse, Morwa Motho o oketswe mo diatleng tsa baleofi. ₄₆Tsogang re tsamayeng; bonang, yo o nkokang o gaufi.”

₄₇Ya re a sa ntse a bua, bonang Jutase, mongwe wa ba ba 12, a tla, a na le bontsi jo bogolo jwa batho ba tshotse ditšhaka le melamu, ba tswa ditlhogong tsa baperesiti le bagolwane ba batho. ₄₈Jaana mooki o ne a ba neile sekao sa go re: “Le fa e le mang yo ke tlaa mo atlang, ke ene, lo tshwareng ene.”

₄₉Mme a siamela kwa go Jesu a re: “Dumela, Moruti,” mme a mo atla.

₅₀Jesu a mo raya a re: “Tsala, dira se o tsileng go se dira.” Foo ba tla, ba tsenya Jesu diatla, ba mo tshwara. ₅₁Mme bonang, mongwe wa ba ba nang le Jesu, a ntsha letsogo la gagwe, a somola tšhaka, a rema motlhanka wa moperesiti ya mogolo, a mo kgaola tsebe. ₅₂Foo Jesu a mo raya a re: “Ba o somele tšhaka ya gago mo bonnong jwa yone; gonne botlhe ba ba tsayang tšhaka ba tlaa nyelela ka tšhaka. ₅₃Kgotsa a o a itlhoma, ke sa ka ke ka rapela Rre, mme e re fela jaana a rome bogolo go mephato e le 12 ya baengele go nthusa? ₅₄Foo dikwalo di ne di tlaa dirala jang, ka di re: Go tshwanetse ga nna jaana?”

₅₅Ya re ka lobaka loo Jesu a raya matshutitshuti a batho a re: “A lo tsile jaaka e kete lo tshologetse senokwane ka ditšhaka le melamu go ntshwara? Ke ntse ka nna ka dula ka malatsi otlhe mo tempeleng, ke ruta, lo se ka lwa ntshwara. ₅₆Gotlhe mo go dirafetse gore dikwalo tsa baperofeti di dirale.” Foo barutwa botlhe ba mo tlogela, ba tshaba.

₅₇Ba ba tshwereng Jesu ba mo gogela kwa goo rra Kaiafase, moperesiti yo mogolo, kwa bakwadi le bagolwane ba phuthegetseng teng. ₅₈Mme Petere a mo latela a saletse kgakala, a ya kwa kgotleng ya moperesiti yo mogolo, a tsena, a dula le maotlana, gore a bone bokhutlo. ₅₉Jaana ditlhogo tsa baperesiti, le lekgotla lotlhe, ba batla tshupo ya kako ka ga Jesu, gore ba mmolaye. ₆₀Mme ba se ka ba e bona, le fa go ne go tsile bapateletsi ba le bantsi. Kwa morago ga tla ba le babedi, ₆₁ba re: “Monna yo, o rile: ‘Ke nonofile go senya tempele ya Modimo, le go ba ke e aga ka malatsi a le mararo.’ ”

₆₂Mme moperesiti yo mogolo a ema, a mo raya a re: “A ga o fetole ka sepe? Ke eng se bao ba supang ka ga gago?” ₆₃Mme a nna a didimala fela. Moperesiti yo mogolo a mo raya a re: “Ke a go ikanisa ka Modimo o o tshedileng, ka re: O re bolelele gore a o ene Keresete, Morwa Modimo?”

₆₄Jesu a mo raya a re: “O boletse; le fa go ntse jalo ke a lo raya, kwa pele lo tlaa bona Morwa Motho a dutse ka fa letsogong le legolo la nonofo, mme a tla ka maru a legodimo.”

₆₅Foo moperesiti a ikgagola diaparo a re: “O buile tlhapatso; re sa ntse re dirang ka basupi? Bonang, jaanong lo utlwile go tlhapatsa ga gagwe; lo gopola jang?” ₆₆Ba mo fetola ka go re: “O tshwanetse go swa.”

₆₇Foo ba mo kgwela mathe mo sefatlhogong, ba mo tlhanya; ba bangwe ba mo phaila ka diatla ba re: ₆₈“Re perofesetse Keresete ke wena, o batotswe e mang?”

₆₉Jaana Petere a bo a dutse ka fa ntle mo lolwapeng; mme lelata la ya kwa go ene, la re: “Le wena o ne o na le Jesu wa Mogalilea.”

₇₀Mme a itatola fa pele ga bone botlhe a re: “Ga ke itse se o se buang.” ₇₁E rile a tswetse kwa kgorwaneng, lelata le lengwe la mmona, la raya ba ba teng, la re: “Monna yo le ene, o ne a na le Jesu wa Monasara.”

₇₂Mme gape a itatola ka ikano a re: “Ga ke mo itse, monna yoo.”

₇₃Ya re kgantele ba ba emeng teng ba tla ba raya Petere ba re: “Ruri o mongwe wa bone le wena; gonne loleme lwa gago lo a go supa.”

₇₄Foo a simolola go rogaka le go ikana a re: “Ga ke mo itse monna yoo.” Mme koko e tona ya tloga ya lela. ₇₅Mme Petere a gakologelwa lefoko le Jesu o le buileng a re: “E tlaa re koko e tona e ise e lele, o tlaa bo o intatotse gararo.” Mme a tswela kwa ntle, a lela mo go botlhoko.