MATHAIO 23

₁Foo Jesu a bua le matshutitshuti a batho, le barutwa ba gagwe, ₂a re: “Bakwadi le Bafarisai ba dutse mo setulong sa ga Moše. ₃Ke gone tsotlhe tse ba di lo rayang, lo di dire, lo di tlhokomele; mme lo se ka lwa dira ka fa ditirong tsa bone; gonne ba tle ba bue, mme ba se ke ba dire. ₄Ee, ba tle ba bofe merwalo e e bokete, e e botlhoko go rwalwa, mme ba e beye mo magetleng a batho; mme bone ka bosi ga ba ke ba e tshikinya, le fa e le ka monwana wa bone. ₅Ditiro tsotlhe tsa bone ba di dira gore di bonwe ke batho, ba atlhamolose difelaketere tsa bone, ba golole makantsa a diaparo tsa bone. ₆Ba rate bonno jo bo kwa pele mo medirong, le ditulo tse di kwa pele mo matlong a thuto; ₇le ditumediso mo marekelong, le go bidiwa ke batho, ba re: ‘Rabi.’ ₈Mme lona, lo se ka lwa bidiwa Rabi, gonne Moruti wa lona o mongwe fela, mme lona lotlhe lo bomorwa Rraalona. ₉Lo se ka lwa bitsa ope rraeno mo lefatsheng; gonne Rraeno o mongwe fela yo o kwa legodimong. ₁₀Le gone lo se ka lwa bidiwa Beng, gonne Mong wa lona o mongwe fela, e bong Keresete. ₁₁Yo o leng mogolo bogolo mo go lona o tlaa nna modiredi wa lona. ₁₂Le fa e le mang yo o tlaa ikgodisang, o tlaa ngotlafadiwa; mme yo o ingotlafatsang o tlaa godisiwa.

₁₃“A bo go latlhega lona bakwadi le Bafarisai, baitimokanyi! Gonne lo tswaletse batho bogosi jwa legodimo; gonne, lona ga lo tsene, le ba ba reng ba a tsena, ga lo ba letlelele go tsena. ₁₄A bo go latlhega lona bakwadi le Bafarisai, baitimokanyi! Lo suputsa matlo a batlholagadi, mme ya re lo ntse lo dira jalo lo golole merapelo e le seipato fela. Ke gone lo tlaa bonang tshekiso e kgolo bogolo.

₁₅“A bo go latlhega lona bakwadi le Bafarisai, baitimokanyi! Gonne lo dikologa lewatle le lefatshe, gore lo tle lo ikgapele motho a le mongwe fela wa tšhaba; mme e re a sena go fetolwa jalo, lo mo ntshe ngwana wa molete wa molelo, yo o bileng a gaisa lona sebedi.

₁₆“A bo go latlhega lona bagogi ba lo foufetseng, ba lo reng: ‘Le fa e le mang yo o ikanang ka tempele ga se sepe; mme le fa e le mang yo o ikanang ka gouta ya tempele, o golegilwe ke go ikana ga gagwe.’ ₁₇Masilo le difofu ke lona; se segolo ke eng? A gouta, kgotsa tempele, e e leng yone e e itshepisitseng gouta? ₁₈Gape, lo a tle lo re: ‘Le fa e le mang yo o ikanang ka sebeso o a bo a se molato; mme le fa e le mang yo o ikanang ka tshupelo e e mo go sone o golegilwe ke go ikana ga gagwe.’ ₁₉Difofu ke lona; se segolo ke eng? A tshupelo, kgotsa sebeso se se itshepisang tshupelo? ₂₀Ke gone yo o ikanang ka sebeso, o ikana ka sone, le ka dilo tsotlhe tse di mo go sone. ₂₁Le yo o ikanang ka tempele, o ikana ka yone le ka one o o agileng mo go yone. ₂₂Le yo o ikanang ka legodimo, o ikana ka setulo sa Modimo sa bogosi, le ka one o o dutseng mo go sone.

₂₃“A bo go latlhega lona bakwadi le Bafarisai, baitimokanyi! Lo tle lo kgethe sa bosome sa ditlhatshana tsa rothwe le thoma le mosukujwane, mme lo tlogetse dilo tsa molao tse di boima bogolo di sa dirwa, e bong tshiamiso le kutlwelobotlhoko, le boikanngo; tse lo ne lo tshwanetse go di dira, le tse dingwe lo sa di lese di sa dirwa. ₂₄Bagogi ba ba foufetseng ke lona, lo tlhotlha lo ntsha montsana, mme kamela lo e metse fela.

₂₅“A bo go latlhega lona bakwadi le Bafarisai, baitimokanyi! Gonne lo a tle lo tlhatswe bokafantle jwa senwelo le sejana, mme mo teng go bo go tletse tse di tswang patikong le tlhapelong. ₂₆Mofarisai wa sefofu ke wena, tlhatswa pele bokafateng jwa senwelo le sejana, gore bokafantle jwa sone le jone bo nne bontle.

₂₇“A bo go latlhega lona bakwadi le Bafarisai, baitimokanyi! Gonne lo tshwana le diphupu tse di sweufaditsweng, tse di bonalang di le dintle ka fa ntle, mme mo teng di tletse marapo a baswi, le boitshekologo jotlhe fela. ₂₈Fela jalo le lona, ka fa ntle lo bonala mo bathong jaaka e ketse lo siame, mme mo teng lo bo lo tletse boitimokanyo, le boikepo.

₂₉“A bo go latlhega lona bakwadi le Bafarisai, baitimokanyi! Gonne lo aga diphupu tsa baperofeti, lo kgabisa difikantswe tsa basiami, ₃₀mme lo re: ‘Fa re ka bo re ne re le teng mo metlheng ya borraetsho, re ka bo re se ka ra dumalana nabo mo go bolayeng baperofeti.’ ₃₁Jalo lo bo lo itshupa fa lo le bana ba batho ba ba bolaileng baperofeti. ₃₂Ke gone tlaleletsang borraeno seelo sa molato wa bone! ₃₃Dinoga ke lona, le lotsalo lwa dišaušawane, lo tlaa falola jang mo tshekisong ya molete? ₃₄Ke gone bonang, ke roma baperofeti, le babotlhale le bakwadi, kwa go lona. Bangwe ba bone lo tlaa ba bolaya lo ba bapola; bangwe ba bone lo tlaa ba seola mo matlong a lona a thuto, lo ba bogisa go tswa motseng go ya motseng o mongwe, ₃₅gore go wele mo go lona molato otlhe wa madi a basiami a a tsholotsweng mo lefatsheng, go simolola ka madi a ga Abele mosiami, go tla mading a ga Sakaria morwa Barakia, yo lo mmolaetseng fa gare ga felo ga boitshepo le sebeso. ₃₆Ammaaruri ke a lo raya: Dilo tsotlhe tse di tlaa wela losika lo.

₃₇“Jerusalema we! Jerusalema we! Yo o bolayang baperofeti, a kgobotletse ba ba romilweng kwa go ene! Ke ratile gantsintsi jang go phutha bana ba gago, fela jaaka koko e tle e phuthe mamphorwana a yone mo diphukeng tsa yone, mme lo ganne! ₃₈Bonang, ntlo ya lona lo e tlogeletswe e ropefetse fela. ₃₉Gonne ke a lo raya: Ga lo ketla lo tlhola lo mpona, go tle go tsamaye lo re: ‘A go bakwe ene yo o tlang mo leineng la Morena.’ ”