MATHAIO 15

₁Foo ga tla Bafarisai le bakwadi ba ba tswang Jerusalema, ba tla kwa go Jesu ba re: ₂“Ke go reng fa barutwa ba gago ba tlola mekgwa ya ba bogologolo? Gonne fa ba ja dijo ga ba ke ba tlhapa diatla.”

₃Mme a ba fetola a re: “Ke go reng fa le lona lo tlola molao wa Modimo ka ntlha ya mekgwe ya lona? ₄Gonne Modimo o rile: ‘Tlotla rraago le mmaago,’ gape: ‘Yo o buang bosula ka ga rraagwe, le fa e le mmaagwe a a swe ruri.’ ₅Mme lona lwa re: ‘Le fa e le mang yo o tlaa rayang rraagwe, le fa e le mmaagwe a re: Se o ka bong o thusiwa ke nna ka sone, se abetswe Modimo;’ ₆a sa tlotle rraagwe le fa e le mmaagwe. Lo bo lo dirolotse lefoko la Modimo ka ntlha ya mekgwa ya lona. ₇Baitimokanyi ke lona, Isaia o boletse sentle ka ga lona a re: ₈‘Tšhaba e, e ntlotla ka dipounama; mme dipelo tsa bone di kgakala le nna. ₉Ba nkobamelela lefela, ka e a tle e re ba ruta, dithuto tsa bone e be e le dipolelo tsa batho fela.’ ”

₁₀A ipiletsa batho ba le bantsi, a ba raya a re: “Utlwang, lo tlhaloganye: ₁₁Se se tsenang ka molomo, ga se sone se se itshekololang motho; mme se se tswang ka molomo, ke sone se se itshekololang motho.”

₁₂Foo ga tla barutwa, ba mo raya ba re: “A o a itse fa e rile Bafarisai ba utlwa lefoko le, ba kgotšwa?”

₁₃A ba fetola a re: “Setlhatshana sengwe le sengwe se Rre wa legodimo o sa se tlhomang, se tlaa kumolwa ka medi. ₁₄Ba leseng; ke bagogi ba ba foufetseng. Fa sefofu se goga sefofu, di tlaa wela mmogo mo kgatamping.”

₁₅Mme Petere a mo fetola a re: “Re ranolele setshwantsho se.”

₁₆Mme a re: “A le lona le gompieno lo sa ntse lo tlhoka tlhaloganyo? ₁₇A ga lo lemoge gore tsotlhe tse di tsenang ka molomo di fetela mo mpeng, mme di ye go latlhelwa kwa ntle? ₁₈Mme dilo tse di tswang ka molomo di tswa mo pelong; mme tsone tseo di itshekolola motho. ₁₉Gonne mo pelong go tswa megopolo e e bosula, le dipolao, le dikgokafalo, le boaka, bogodu, le pateletso le dikgalo. ₂₀Dilo tse ke tsone tse di itshekololang motho; go ja ka diatla tse di sa tlhapiwang ga go ke go itshekolola motho.”

₂₁Jesu a tloga a tswa teng, a ngongwaelela kwa dintlheng tsa Ture le Sitone. ₂₂Mme bonang, mosadi wa Mokanana a tswa melelwaneng eo, a goa a re: “Nkutlwela botlhoko, Morena, Morwa Dafite; morwadiake o tshwenngwa thata ke mowa o o maswe.”

₂₃Mme a se ka a mo fetola ka lefoko lepe. Barutwa ba gagwe ba tla ba mo rapela ba re: “Mo reye a tsamaye, gonne o re tlhaeletsa kwa morago.”

₂₄Mme a ba fetola a re: “Ga ke a rongwa fa e se kwa dinkung tse di timetseng tsa ntlo ya Iseraele.”

₂₅Mosadi a tla a mo obamela a re: “Morena, a ko o nthuse.”

₂₆Mme a mo fetola a re: “Ga go a tshwanela fa go ka tsewa dijo tsa bana, tsa latlhelwa dintša.”

₂₇Mme a re: “Ee, Morena; gonne le e leng dintša di tle di je matlhotlhora a a wang mo lomating lwa bojelo lwa beng ba tsone.”

₂₈Foo Jesu a mo fetola a re: “Ija, mosadi! Tumelo ya gago e kgolo, a go go dirafalele ka fa o ratang ka teng.” Morwadie o sa le a fodisiwa fela ka lobaka loo.

₂₉Jesu a tloga a tswa teng, a tla fa gaufi le lewatle la Galilea; mme a tlhatlogela mo thabeng, a dula teng. ₃₀Ga tla kwa go ene matshutitshuti a magolo a batho, ba na le ba ba tlhotsang, le difofu, le dimumu, le digole le ba bangwe ba le bantsi, ba ba baya fa fatshe fa dinaong tsa gagwe, mme a ba fodisa. ₃₁Bontsi jwa batho jwa ba jwa tla jwa gakgamala, ka ba bona dimumu di bua, digole di itekanetse, batlhotsi ba tsamaya, le difofu di bona; mme ba galaletsa Modimo wa Iseraele.

₃₂Jesu a ipiletsa barutwa ba gagwe a re: “Ke tlhomogela batho ba bantsi ba pelo, ka jaana ba setse ba tlhotse le nna malatsi a le mararo, mme ba se na se ba se jang; ga ke rate go ba phatlalatsa ka tlala, e se re gongwe ba dimelela mo tseleng.”

₃₃Barutwa ba mo raya ba re: “Fano mo nageng fela re tlaa bo re bonye kae dinkgwe tse di lekanyeng go kgorisa bontsi jo bo kanakana?”

₃₄Jesu a ba raya a re: “Lo na le dinkgwe di le kae?” Ba re di supa le ditlhapi di se kae.

₃₅Mme a laola gore batho ba dule fa fatshe; ₃₆mme a tsaya dinkgwe tse supa, le ditlhapi, a leboga, a di ngathoganya, a di neela barutwa, mme barutwa ba di abela batho. ₃₇Ba a ja botlhe fela, ba kgora; ba ba ba sela dikabetla tse di setseng, ya nna diroto di supa di tletse. ₃₈Ba ba jeleng e ne e le banna ba ba dikete tse nne, go sa balwe basadi le banyana.

₃₉Mme a phatlalatsa matshutitshuti a batho, a tsena mo mokorong, a ya a fitlha mo melelwaneng ya Magetane.