LUKE 22

₁Jaana modiro wa senkgwe se se sa bedisiwang, o o bidiwang Tlolaganyo, wa bo o atamela. ₂Mme ditlhogo tsa baperesiti le bakwadi ba senka ka fa ba ka mmolayang ka teng; gonne ba boifa batho.

₃Satane a tsena mo go Jutase yo o bidiwang Isekariote, e le mongwe wa ba ba 12. ₄A ya a loganya le ditlhogo tsa baperesiti le dikgosana, ka fa o ka mo ba neelang ka teng. ₅Mme ba itumela; ba golagana nae gore ba tlaa mo naya madi. ₆A dumalana nabo; mme a batla lobaka lo o tlaa mo ba neelang ka lone, kwa bontsing jwa batho bo tlaa bong bo seyo teng.

₇Ga fitlha letsatsi la senkgwe se se sa bedisiwang, le Tlolaganyo e nang le go tlhajwa ka lone. ₈Mme a roma Petere le Johane a re: “Yang, lo re baakanyetse Tlolaganyo gore re e je.”

₉Ba mo raya ba re: “O rata ra e baakanya kae?”

₁₀A ba raya a re: “Bonang, e tlaa re lo sena go tsena mo motseng, lo tlaa kgatlhana le monna a rwele nkgwana ya metsi; lo mo sale morago, lo ye nae mo ntlong e o tsenang mo go yone. ₁₁Lo reye mong wa ntlo, lo re: ‘Moruti o a go botsa a re: Ntlo ya bojelo ya baeng e kae e ke tlaa jelang Tlolaganyo mo go yone le barutwa ba me?’ ₁₂O tlaa lo supetsa ntlwana e kgolwane e e kwa godimo, e e adilweng, lo baakanye teng.”

₁₃Mme ba ya ba fitlhela go ntse jaaka a ba boleletse; mme ba baakanya Tlolaganyo.

₁₄E rile nako e sena go fitlha, a dula le baaposetole ba ba 12 ba na nae. ₁₅Mme a ba raya a re: “Ke tlhologeletswe ka tlhologelelo go ja Tlolaganyo e le lona ke ise ke swe. ₁₆Gonne ke a lo raya, ga nketla ke tlhola ke e ja go tle go tsamaye e dirafale mo bogosing jwa Modimo.”

₁₇Mme a tsaya senwelo, ya re a sena go leboga, a re: “Tsholang se, lo se hupalane; ₁₈gonne ke a lo raya, ga nketla ke tlhola ke nwa loungo lwa mofine, go tle go tsamaye bogosi jwa Modimo bo tle pele.”

₁₉A tsaya senkgwe, mme ya re a sena go leboga, a se ngathoganya, a se ba naya a re: “Se ke mmele wa me o o ntshediwang lona; dirang mo, lo nkgopole ka gone.” ₂₀Senwelo le sone, a se tsaya jalo, morago ga go sena go jewa, a re: “Senwelo se, ke kgolagano e ntšha mo mading a me, e bong a a tshololelwang lona.

₂₁“Mme, bonang, seatla sa yo o nkokang se na le nna mo lomating lwa bojelo. ₂₂Gonne ruri Morwa Motho o tsamaya jaaka go ikaeletswe; mme go latlhega monna yo o okwang ke ene!”

₂₃Ba simolola go botsanya gore, e ka nna ofe wa bone yo o ka dirang selo se.

₂₄Le gone ga tsoga kgang mo go bone ya gore, ke ofe wa bone yo o kaiwang yo mogolo. ₂₅Mme a ba raya a re: “Dikgosi tsa Baditšhaba di dira ka bogoma mo go bone, le ba ba ba busang ba bidiwa Badiramolemo. ₂₆Mme lona, ga lo a nna jalo; ene yo e leng yo mogolo mo go lona, a a nne jaaka yo mmotlana; le yo e leng tlhogo, a a nne jaaka yo o direlang. ₂₇Gonne yo mogolo ke ofe? A ke yo o dutseng a ja, kgotsa ke yo o direlang? A ga se yo o dutseng a ja? Mme nna, ke ntse mo go lona jaaka yo o direlang.

₂₈“Mme lona, ke lona ba ke ntseng ke na le lona mo ditekong tsa me; ₂₉ke lo baya bogosi jaaka Rre a bo mpeile. ₃₀Gore lo je lo nwe fa lomating lwa me lwa bojelo, mo bogosing jwa me; mme lo tlaa dula mo ditulong tsa bogosi, lo atlhola ditso tse 12 tsa Iseraele.

₃₁“Simone, Simone, bona, Satane o lopile gore lo mo neelwe, gore a tle a lo fefere jaaka mabele; ₃₂mme ke go rapeletse gore tumelo ya gago e se tlhaele; le wena o re o sena go sokologa, o tle o thatafatse bakaulengwe ba gago.”

₃₃Mme a mo raya a re: “Morena, fa ke na nao ke iketleeditse go ya ntlong ya kgolegelo, le mo losong.”

₃₄Mme a re: “Ke a go bolelela Petere, koko e tona ga e ketla e lela gompieno o ise o intatole gararo, o re ga o nkitse.”

₃₅Mme a ba raya a re: “E rile ke lo roma jale, lo se na patana ya madi, le fa e le kuana, le fa e le ditlhako, a lo ile lwa tlhoka sengwe?” Ba re: “Nnyaa.”

₃₆A ba raya a re: “Mme jaanong, yo o nang le patana ya madi, a e tseye, le yone kuana; le yo o se nang tšhaka, a a rekise kobo ya gagwe, a reke nngwe. ₃₇Gonne ke a lo raya, selo se, se se kwadilweng, se na le go dirafala mo go nna, jaaka go twe: ‘O baletswe le batlodi;’ gonne dilo tse di kwadilweng ka ga me, di a dirafala.” ₃₈Mme ba re: “Morena, bona, ditšhaka ke tse, di pedi.” Mme a ba raya a re: “Go lekanye.”

₃₉A tswa, a ya kwa Thoteng ya Lotlhware jaaka a tlwaetse; barutwa ba gagwe le bone ba mo sala morago. ₄₀Ya re a fitlha teng, a ba raya a re: “Rapelang, gore lo se tsene mo thaelong.”

₄₁Mme a katogana nabo, e ka ne e le jaaka kwa lentswe le ka konopelwang teng; mme a khubama, a rapela ₄₂a re: “Rra, fa e le go rata ga gago, tlosa senwelo se mo go nna; le fa go ntse jalo, e seng go rata ga me, mme a go rata ga gago go dirale.” ₄₃Mme ga bonala moengele kwa go ene, a tswa legodimong, a mo thatafatsa. ₄₄Mme ka a le mo tlalelong e e mahehe, a rapela ka tlhoafalo e kgolo; mme mofufutso wa gagwe wa nna jaaka marothodi a magolo a madi, a rothela fa fatshe.

₄₅Ya re a khubamologa mo morapelong wa gagwe, a tla barutweng ba gagwe, mme a ba fitlhela ba robaditswe ke bohutsana, ₄₆mme a ba raya a re: “Lo robaletseng? Tsogang, lo rapele gore lo se tsene mo thaelong.”

₄₇Mme a re a sa ntse a bua, bonang, bontsi jwa batho, ba eteletswe pele ke mongwe yo o bidiwang Jutase, e le wa ba ba 12, a atamela Jesu go mo atla. ₄₈Mme Jesu a mo raya a re: “Jutase, a o oka Morwa Motho ka katlo?”

₄₉Ya re ba o nang nabo ba bona se se tlaa dirafalang, ba mo raya ba re: “Morena, a ke re reme ka tšhaka?” ₅₀Mme mongwe wa bone a rema motlhanka wa moperesiti yo mogolo, a mo kgaola tsebe ya ka fa letsogong le legolo.

₅₁Jesu a bua a re: “Iketleng! Go ntse!” Mme a ama tsebe ya gagwe, a e fodisa.

₅₂Jesu a raya ditlhogo tsa baperesiti, le dikgosana tsa tempele, le bagolwane ba ba mo tshologetseng, a re: “A lo tsile ka ditšhaka le melamu jaaka e kete lo tshologetse senokwane? ₅₃E ne ya re ke sa ntse ke na le lona ka malatsi otlhe mo tempeleng, ga lo a ka lwa nkotlololela mabogo; mme lono ke lobaka lwa lona, le thata ya lefifi.”

₅₄Ba mo tshwara, ba mo goga, ba mo isa kwa ntlong ya moperesiti yo mogolo. Petere a mo latela ka go mo gwalalela. ₅₅Ya re ba sena go gotsa molelo fa gare ga lolwapa, ba dutse mmogo, Petere a dula fa gare ga bone. ₅₆Mme lelata lengwe ya re le mmona a dutse fa molelong, a mo leba thata a re: “Monna yo le ene o ne a nna nae.”

₅₇Mme a itatola a re: “Mosadi, ga ke mo itse.”

₅₈Ga feta lobakanyana, mme yo mongwe le ene a mmona a re: “Le wena o mongwe wa bone.” Mme Petere a re: “Monna, ga se nna.”

₅₉Ga feta lobaka e ka ne e le lwa nako e le nngwe fela, mme yo mongwe a tlhomamisa thata a re: “Ammaaruri, monna yo le ene o ne a nna nae; ka e le Mogalilea.”

₆₀Petere a re: “Monna, ga ke itse se o se buang.” Fela ka bonako a sa ntse a bua, koko e tona ya lela. ₆₁Mme Morena a retologa, a leba Petere. Mme Petere a gakologelwa lefoko la Morena, jaaka a mo reile a re: “E tlaa re koko e tona e ise e lele gompieno, o tlaa bo o intatotse gararo.” ₆₂Mme Petere a tswela kwa ntle, a lela mo go botlhoko.

₆₃Banna ba ba tshwereng Jesu, ba mo sotla, ba mo itaaka. ₆₄Ba mo fapa matlho ba re: “Bolela, e mang yo o go tlhantseng?” ₆₅Le dilo tse dingwe di le dintsi ba di bua ka ga gagwe, ba mo kgala ka tsone.

₆₆E rile bosa bo sena go sa, bagolwane ba batho, le ditlhogo tsa baperesiti, le bakwadi, ba phuthega, ba mo goga ba mo isa mo tshekong ya bone, ba re: ₆₇“Fa o le ene Keresete re bolelele.” Mme a ba raya a re: “Fa ke lo bolelela ga lo ketla lo dumela; ₆₈le gone fa ke lo botsa ga lo ketla lo mphetola. ₆₉Go tloga fano jaana, Morwa Motho o tlaa dula ka fa letsogong le legolo la nonofo ya Modimo.”

₇₀Ba bua botlhe ba re: “A o Morwa Modimo?” A ba raya a re: “Lona lwa re, ke nna ene.”

₇₁Mme ba re: “Re sa ntse re dirang ka tshupo? Ka re mo ikutlwetse a bua ka molomo wa gagwe.”