LUKE 14

₁Ga dirala e rile go le letsatsi la Sabata, a tsena mo ntlong ya Mofarisai mongwe wa mogolwane, a ya go ja senkgwe, mme ba bo ba mo lepile. ₂Bonang, ga bo go le monna e fa pele ga gagwe a lwala pudulogo ya metsi. ₃Jesu a bua, a raya ba molao le Bafarisai a re: “A go letleletswe go fodisa ka letsatsi la Sabata, kgotsa nnyaa?”

₄Ba didimala fela. Mme a mo tsaya, a mo fodisa, a mo lesa a tsamaya. ₅A ba raya a re: “Ke ofe wa lona yo e ka reng fa a na le esela, le fa e le kgomo, fa e wetse mo sedibeng, a se ke a akofa a ya go e ntsha fela ka letsatsi la Sabata?”

₆Ba retelelwa ke go mo fetola mo dilong tse.

₇A bua setshwantsho le ba ba laleditsweng, ka a bona ka fa ba itebalebelang ditulo tse di kwa pele ka teng; a ba raya a re: ₈“E re fa mongwe a go laleditse modiro wa nyalo, o se ka wa dula mo mannong a a kwa pele, e se re kgotsa mongwe yo o tlotlegang bogolo go wena a ba a laleditswe le ene; ₉mme yo o go laleditseng nae a tla, a go raya a re: ‘Sutela monna yo;’ foo o simolole go tsaya setulo se se kwa morago ka ditlhong. ₁₀Mme e re fa o laleditswe, o ye o tseye setulo se se kwa moragorago, gore e tle e re yo o go laleditseng a tla, a go reye a re: ‘Tsala, dulela kwa pele;’ foo o tlaa dirana le tlotlo fa pele ga ba ba dutseng ba a ja nao. ₁₁Gonne mongwe le mongwe yo o ikgodisang o tlaa ngotlafadiwa; mme yo o ingotlafatsang o tlaa godisiwa.”

₁₂Le gone a raya yo o mo laleditseng a re: “E re fa o dira modiro wa motshegare le fa e le wa maitseboa, o se ka wa laletsa ditsala tsa gago, le fa e le bana ba ga rraago, le fa e le ba losika lwa gago, le fa e le bagaeno ba ba humileng; e se re kgotsa le bone, ba ba ba go bitsa, mme tuelo e go dirafalele. ₁₃Mme e re fa o dira modiro, laletsa bahumanegi, digole, batlhotsi le difofu. ₁₄O tlaa nna sego; gonne bone ga ba na se ba ka go duelang ka sone; gonne o tlaa duelwa mo go tsogeng ga basiami.”

₁₅E rile mongwe wa ba ba dutseng ba ja nae a utlwa dilo tse, a mo raya a re: “Go sego yo o tlaa jang senkgwe mo bogosing jwa Modimo.”

₁₆Mme a mo raya a re: “Monna mongwe o kile a dira modiro o mogolo wa maitseboa, a laletsa batho ba le bantsi. ₁₇Ya re ka lobaka lwa modiro go jewa, a roma motlhanka wa gagwe a ya go raya ba ba laleditsweng a re: ‘Tlang gonne dilo tsotlhe di baakantswe.’ ₁₈Mme botlhe fela ba ya seoposengwe, ba simolola go ipata. Wa ntlha a mo raya a re: ‘Ke rekile sebata sa lefatshe, mme ke tshwanetse go ya go se bona; ke a go rapela, a ke itshwarelwe, ke ipoletse.’ ₁₉Yo mongwe a re: ‘Ke rekile dikgomo tsa bojokwe ba le batlhano, mme ke ya go di leka; ke a go rapela, a ke itshwarelwe, ke ipoletse.’ ₂₀Yo mongwe a re: ‘Ke nyetse mosadi, ke gone ke sa ka keng ka ya.’

₂₁“Motlhanka yoo a boa, a bolelela morena wa gagwe dilo tse. Foo mong wa ntlo, ka a le bogale, a raya motlhanka wa gagwe a re: ‘Tsamaya ka bonako, o tswele kwa mebileng le mo diferwaneng tsa motse, mme o lere kwano mo teng bahumanegi, digole, difofu le batlhotsi.’ ₂₂Motlhanka a re: ‘Morena, se o se laotseng se dirilwe, mme bonno bo sa le teng.’ ₂₃Morena a raya motlhanka a re: ‘Tswela kwa ditseleng tse dikgolo, le kwa dikgoreng, mme o ba patelele go tsena gore ntlo ya me e tlale.’ ₂₄Gonne ke a lo raya, ga go ope wa banna bao ba ba laleditsweng yo o tlaa isang modiro wa me mo ganong.”

₂₅Jaana ga bo go tsamaya nae bontsintsi jwa batho; mme a retologa, a ba raya a re: ₂₆“Fa motho, le fa e le mang, a tla kwa go nna, mme a sa nthate bogolo go rraagwe, le mmaagwe, le mosadi wa gagwe, le bana, le bana ba ga rraagwe ba basimane, le ba basetsana, ee, le jone botshelo jwa gagwe, ga a ka ke a nna morutwa wa me. ₂₇Le fa e le mang yo o sa sikareng mokgoro o e leng wa gagwe, mme a ntshala morago, ga a ka ke a nna morutwa wa me.

₂₈“Gonne ke ofe wa lona yo e ka reng fa a rata go aga kago e e godileng, mme a se ka a dula pele a bala madi a yone, gore a tle a itse fa a na le a a lekanyeng go e swetsa. ₂₉E se re kgotsa a sena go e thaya a retelelwa ke go e swetsa; mme botlhe ba ba e bonang ba simolole go mo sotla. ₃₀Ba re: ‘Monna yo o simolotse go aga, mme a bo a sa nonofa go swetsa.’

₃₁“Kgotsa kgosi ke efe e e ka reng e ya go tlhabana le kgosi e nngwe, e e se keng e dula pele, e senka kgakololo ya gore a e nonofile, ka e na le ba ba 10 000, go ya go kgatlhantsha e e tlang kwa go yone e na le ba ba 20 000. ₃₂E tle e re fa go sa nna jalo, e re e nngwe e sa ntse e le kgakala, e rome batho ba ye go lopa mo go ka agisanyang. ₃₃Go ntse fela jalo, le fa e le mang mo go lona yo o sa tlogeleng dilo tsotlhe tse o nang natso, ga a ka ke a nna morutwa wa me.

₃₄“Le gale letswai le molemo; mme fa letswai le senyegile molodi, le a bo le ka lokwa ka eng? ₃₅Ga le na tiro, le fa e le mo tshimong, le fa e le mo thutubudung; batho ba tle ba le latlhele kwa ntle. Yo o nang le ditsebe go utlwa, a a utlwe.”