LEFITIKO 18

₁Jehofa a bua le Moše, a re: ₂“Bua le bana ba Iseraele o ba reye o re: Ke nna Jehofa Modimo wa lona. ₃Lo se ka lwa dira ka fa ditirong tsa lefatshe la Egepeto, le lo kileng lwa nna mo go lone; le fa e le ka fa ditirong tsa lefatshe la Kanana le ke lo isang kwa go lone, lo se ka lwa dira, le gone lo se ka lwa sepela mo melaong ya bone. ₄Lo tlaa dira dikatlholo tsa me, le melao ya me lo tlaa e boloka, go sepela mo go yone; ke nna Jehofa Modimo wa lona. ₅Ke gone lo tlaa boloka melao ya me, le dikatlholo tsa me, tse e tlaa reng fa motho a di dira, o tlaa tshela ka tsone; ke nna Jehofa.

₆“Ga go na ope wa lona yo o tlaa atamelang kwa go mongwe yo o gaufi nae ka go tsalwa, go tla a bipolola bosaikatega jwa gagwe; ke nna Jehofa. ₇Bosaikatega jwa ga rraago, e bong bosaikatega jwa ga mmaago, o se ka wa bo bipolola, ke mmaago; o se ka wa bipolola bosaikatega jwa gagwe. ₈Bosaikatega jwa ga mogatsa rraago, o se ka wa bo bipolola; ke bosaikatega jwa ga rraago. ₉Bosaikatega jwa ga kgaitsadio, morwadia rraago, kgotsa morwadia mmaago, le fa ba tsaletswe mo gae kgotsa ba tsaletswe kwa kgakala, bosaikatega jwa bone, o se ka wa bo bipolola. ₁₀Bosaikatega jwa ga morwadia morwao, kgotsa jwa ga morwadia morwadio, bosaikatega jwa bone o se ka wa bo bipolola, gonne bosaikatega jwa bone ke jwa gago tota. ₁₁Bosaikatega jwa ga morwadia mogatsa rraago, yo o tsetsweng ke rraago, ka e le kgaitsadio, o se ka wa bipolola bosaikatega jwa gagwe. ₁₂O se ka wa bipolola bosaikatega jwa ga kgaitsadia rraago; ke mosadi yo o gaufi le rraago ka go tsalwa. ₁₃O se ka wa bipolola bosaikatega jwa ga ngwanaarraagwe maago; ke mosadi yo o gaufi le maago ka go tsalwa. ₁₄O se ka wa bipolola bosaikatega jwa ga rangwanaago; o se ka wa atamela mosadi wa gagwe, ke mogatsa rangwanaago. ₁₅O se ka wa bipolola bosaikatega jwa ngwetsi wa gago, ke mogatsa morwao, o se ka wa bipolola bosaikatega jwa gagwe. ₁₆O se ka wa bipolola bosaikatega jwa ga mogatsa morwa rraago; ke bosaikatega jwa ga morwa rraago. ₁₇O se ka wa bipolola bosaikatega jwa mosadi le morwadie; o se ka wa tsaya morwadia morwawe, kgotsa morwadia morwadie, go bipolola bosaikatega jwa gagwe, ke basadi ba ba gaufi ka go tsalwa; ke tshiamololo. ₁₈O se ka wa re o tsaya mosadi wa mo tsaya le ngwana yo mongwe wa ga rraagwe; go nna lefufa nae, go bipolola bosaikatega jwa gagwe, go mo pataganya le yo mongwe a sa ntse a tshedile.

₁₉“O se ka wa atamela mosadi go bipolola bosaikatega jwa gagwe fa a itshekologile ka medibela ya gagwe. ₂₀O se ka wa lala le mosadi wa mongwe ka wena, go iitshekolola ka ene. ₂₁O se ka wa ntsha ope wa losika lwa gago go ya go mo ralaletsa Moleke molelo; le gone o se ka wa tlhapatsa leina la Modimo wa gago; ke nna Jehofa. ₂₂O se ka wa lala le banna, go ba etsa basadi; ke makgapha. ₂₃O se ka wa lala le setshedi sepe go iitshekolola ka sone, le gone a go se nne mosadi ope yo o tlaa emang fa pele ga setshedi gore a lale naso; ke maferetsoko.

₂₄“Lo se ka lwa iitshekolola ka sepe sa dilo tse, gonne merafe e ke e lelekileng fa pele ga lona e itshekolotswe ka dilo tsotlhe tse. ₂₅Le lefatshe le itshekolotswe, ke gone ka moo tshiamololo ya lone ke bo busetsang mo go lone, mme lefatshe le tlhatsa banni ba lone. ₂₆Ke gone lona lo bolokeng melao ya me, le dikatlholo tsa me, lo se ka lwa dira sepe sa dilo tse, tse di makgapha; le fa e le yo o tsaletsweng mo gae, kgotsa moeng yo o jakileng mo go lona. ₂₇Gonne dilo tsotlhe tse di makgapha tse, banna ba lefatshe ba ba neng ba le pele ga lona ba di dirile, ka moo lefatshe le itshekolotswe, ₂₈gore lefatshe le se ka la lo tlhatsa le lona, fa lo le itshekolotse, jaaka le tlhatsitse morafe o o neng o le gone pele ga lona. ₂₉Gonne le fa e le mang yo o tlaa dirang sengwe sa dilo tse di makgapha tse, e bong bone batho ba ba di dirang ba tlaa kgaolwa mo bathong ba ga bone.

₃₀“Ke gone ka moo lo tlaa bolokang tao ya me, gore lo se dire sepe sa mekgwa e e makgapha e, e e neng e dirwa pele ga lona, le gore lo se iitshekolole ka yone, ke nna Jehofa Modimo wa lona.”