1Ga dirala e rile morago ga malatsi a le mantsi, Jehofa a sena go naya Iseraele boikhutso mo babeng ba bone mo tikologong ya bone, Jošua a bile a tsofetse, a le dinyaga dintsi; 2Jošua a bitsa Baiseraele botlhe, a bitsa bagolwane ba bone, le ditlhogo tsa bone, le baatlhodi ba bone le bagogi ba bone, a ba raya a re: “Ke tsofetse, ke dinyaga di le dintsi. 3Lo bonye tsotlhe tse Jehofa Modimo wa lona o di diretseng merafe yotlhe e ka ntlha ya lona; gonne Jehofa Modimo wa lona ke ene yo o lo tlhabanetseng. 4Bonang, ke lo abetse ka taolelo merafe e, e e setseng, go nna boswa jwa ditso tsa lona, go simolola mo Joretane, go ya fela kwa lewatleng le legolo ntlheng ya bophirimatsatsi, e na le merafe yotlhe e ke e kgaotseng. 5Jehofa Modimo wa lona, ene o tlaa ba kgorometsa fa pele ga lona, o tlaa ba leleka ba tloga mo ponong ya lona; mme lo tlaa rua lefatshe la bone, jaaka Jehofa Modimo wa lona a buile le lona. 6Ke gone nnang pelokgale thata go tshegetsa le go dira tsotlhe tse di kwadilweng mo lokwalong lwa molao wa ga Moše, gore lo se ka lwa di fapoga lwa ya ka fa ntlheng ya letsogo le legolo kgotsa go la molema; 7gore lo se ka lwa tlhakatlhakana le merafe e, e e setseng mo go lona; le fa e le go umaka maina a medimo ya yone, le fa e le go ikanisa batho ka yone, le fa e le go e direla, le fa e le go e ikobela; 8mme ngapareleng Jehofa Modimo wa lona, jaaka lo dirile go tla mo tsatsing leno. 9Gonne Jehofa o lelekile merafe e megolo, e e thata, fa pele ga lona; mme ka ga lona, ga go ise go ko go eme motho ope fa pele ga lona, go tla mo tsatsing leno. 10Monna wa lona a le mongwe fela o tlaa leleka ba ba makgolo a le some; gonne Jehofa Modimo wa lona ke ene yo o lo tlhabanelang, jaaka a buile le lona. 11Ke gone lo itiseng thata, gore lo rate Jehofa Modimo wa lona. 12E tlaa re kgotsa fa gongwe lo ka boela kwa morago lwa ngaparela masalela a merafe e, e bong yone e e setseng mo go lona, lwa nyalana nabo, lwa tsena kwa go bone, le bone mo go lona; 13lo bo lo itsetse ruri fa Jehofa Modimo wa lona a se ketla a tlhola a leleka merafe e, e tloga mo ponong ya lona; e tlaa nna serai le seru mo go lona, le thupa mo ditlhakoreng tsa lona, le mitlwa mo matlhong a lona go tsamaya lo nyelela lo tloga mo lefatsheng le le molemo, le Jehofa Modimo wa lona o le lo neileng.
14“Mme bonang, gompieno ke ya le tsela ya lefatshe lotlhe; mme lo a itse mo pelong tsa lona lotlhe, le mo meweng ya lona lotlhe, fa go se na sepe se se tlhaetseng sa dilo tsotlhe tse di molemo, tse Jehofa Modimo wa lona o di buileng ka ga lona; di lo dirafaletse tsotlhe, ga go a tlhaela sepe sa tsone. 15Go tlaa dirala go re, jaaka dilo tsotlhe tse di molemo di lo dirafaletse, tse Jehofa Modimo wa lona o buileng le lona ka ga tsone, jalo fela Jehofa o tlaa lere mo go lona dilo tsotlhe tse di bosula, go tsamaya a lo senya lo tloga mo lefatsheng le le molemo le Jehofa Modimo wa lona o le lo neileng. 16Mogang lo tlolang kgolagano ya ga Jehofa Modimo wa lona, e o e lo laeletseng, lo ya lo direla medimo e sele, lo e ikobela; foo bogale jwa ga Jehofa bo tlaa lo tukela, mme lo tlaa nyelela ka bonako, lo tloga mo lefatsheng le le molemo, le o le lo neileng.”
