JOŠUA 22

₁Foo Jošua a bitsa Barubene, Bagate le bontlhanngwe jwa lotso lwa Manase, a ba raya a re: ₂“Lo ntse lo tshegeditse gotlhe mo Moše motlhanka wa ga Jehofa o go lo laoletseng, lo reeditse lentswe la me mo go tsotlhe tse ke di lo laoletseng. ₃Malatsi a mantsi a lo ntse lo sa tlogele bana ba rraeno, nako e sa le eno, lo ntse lo tshegeditse tao ya taolo ya ga Jehofa Modimo wa lona. ₄Jaana Jehofa Modimo wa lona o neile bana ba rraeno boikhutso, jaaka a buile nabo; ke gone jaana, menogang, lo yeng kwa megopeng ya lona, kwa lefatsheng la boswa jwa lona, le Moše motlhanka wa ga Jehofa o le lo neileng kwa moseja ga Joretane. ₅Go le gosi fela lo tlhokomele thata go tshegetsa taolo le molao, o Moše motlhanka wa ga Jehofa o o lo laoletseng, go rata Jehofa Modimo wa lona, le go sepela mo ditseleng tsotlhe tsa gagwe, le go tshegetsa ditaolo tsa gagwe, go ngaparela ene, le go mo direla ka pelo yotlhe ya lona, le ka mowa otlhe wa lona.” ₆Jalo Jošua a ba segofatsa, a ba naya tsela ba tsamaya; ba ya kwa megopeng ya bone. ₇Jaana ba bontlhanngwe jwa lotso lwa Manase, Moše o ne a ba neile boswa mo Bašane; bontlha e nngwe Jošua a bo naya boswa mo baneng ba ga rraabo moseja ga Joretane ka fa bophirimatsatsi. Gape e rile Jošua a ba naya tsela go boela megopeng ya bone a ba segofatsa. ₈A bua nabo a re: “Boelang kwa megopeng ya lona ka khumo e kgolo, ka matlhape a le mantsi, ka selefera, ka gouta, ka kgotlho, ka tshipi, le ka diaparo di le dintsi; lo kgaogane thopo ya baba ba lona le bana ba rraeno.”

₉Bana ba ga Rubene, le bana ba ga Gate, le ba bontlhanngwe jwa lotso lwa Manase ba hulara, ba tloga mo baneng ba Iseraele kwa Shilo o o mo lefatsheng la Kanana, ba ya kwa lefatsheng la Gileate, ba ya kwa lefatsheng la boswa jwa bone le ba le ruileng, ka fa taolong ya ga Jehofa ka seatla sa ga Moše.

₁₀E rile ba fitlha mo sebakeng sa lefatshe fa Joretane, se se mo lefatsheng la Kanana, bana ba ga Rubene, le bana ba ga Gate, le bontlhanngwe jwa lotso lwa Manase, ba aga sebeso gone fa Joretane, e le sebeso se segolo thata go bonwa. ₁₁Mme bana ba Iseraele ba utlwa go twe: “Bonang, bana ba ga Rubene, le bana ba ga Gate, le bontlhanngwe jwa lotso lwa Manase, ba agile sebeso fa tshimologong ya lefatshe la Kanana, mo sebakeng sa lefatshe fa Joretane, ka fa ntlheng e e leng ya bana ba Iseraele.” ₁₂E rile bana ba Iseraele ba utlwa, phuthego yotlhe ya bana ba Iseraele ya phuthegela kwa Shilo, go ya go ba bololela ka ntwa.

₁₃Bana ba Iseraele ba roma kwa baneng ba ga Rubene, le kwa baneng ba ga Gate, le kwa go bontlhanngwe jwa lotso lwa Manase, kwa lefatsheng la Gileate, ba roma Finease morwa Eleasare moperesiti; ₁₄a na le dikgosana di le some, kgosana nngwe fela ya kgotla ya rra lotso longwe le longwe lwa Iseraele; mongwe le mongwe wa bone e le tlhogo ya makgotla a borraabo mo ditshikeng tsa Iseraele. ₁₅Ba tla ba fitlha mo baneng ba ga Rubene, le mo baneng ba ga Gate, le mo go bontlhanngwe jwa lotso lwa Manase, mo lefatsheng la Gileate, mme ba bua nabo, ba re: ₁₆“Phuthego yotlhe ya ga Jehofa e bua jaana, ya re: ‘Tlolo ya bo e le efe e lo e dirileng fa pele ga Modimo wa Iseraele, lo fapoga gompieno, lo kgaogana le go sala Jehofa morago, fa e bo ne ne lo ikagetse sebeso, go tla lo tsuololela Jehofa ka tsatsi leno. ₁₇A tshiamololo ya ka ga Peore e re nnyefaletse, e le e re iseng re intlafatse mo go yone le gompieno, le fa go ne go tsile sebetso mo phuthegong yotlhe ya ga Jehofa, ₁₈fa e tlaa bo jaana gompieno lo fapoga, lo kgaogana le go sala Jehofa morago? Go tlaa dirala go re, ka lo tsuololela Jehofa gompieno, e tlaa re ka moso a nne bogale le phuthego yotlhe ya Iseraele. ₁₉Le fa go ntse jalo e ka re fa lefatshe la boswa jwa lona le itshekologile, foo lo kgabaganyetse kwano lefatsheng la boswa jwa ga Jehofa, le motlaagana wa ga Jehofa o agileng mo go lone, lo tseye boswa mo go rona; mme lo se ka lwa tsuololela Jehofa, le gone lo se ka lwa tsuololela rona, ka go ikagela sebeso kwa ntle ga sebeso sa ga Jehofa Modimo wa rona. ₂₀Akane morwa Sera, a ga a dira tlolo mo selong se se neeletsweng, mme bogale jwa wela phuthego yotlhe ya bana ba Iseraele? Mme motho yoo ga a ka a swa a le esi mo tshiamololong ya gagwe.’ ”

₂₁Foo bana ba ga Rubene, le bana ba ga Gate, le ba bontlhanngwe jwa lotso lwa Manase ba fetola, ba bua le ditlhogo tsa ditshika tsa Iseraele, ba re: ₂₂“Jehofa, Modimo wa medimo, Jehofa, Modimo wa medimo, o a itse, Iseraele le ene o tlaa itse; fa e le ka go tsuolola, kgotsa fa e le ka go tlola fa pele ga Jehofa, o se ka wa re rekegela gompieno; ₂₃fa re ikagetse sebeso jalo, go tla re fapoga, re kgaogana le go sala Jehofa morago, kgotsa fa e le go tla re isa mo go sone tshupelo e e fisiwang, gongwe tshupelo ya boupe, kgotsa fa e le go tla re isa mo go sone ditlhabelo tsa ditshupelo tsa kagiso, a go lopiwe ke Jehofa ka esi; ₂₄bogolo fa selo se, re se ka ra se dira ka kelotlhoko, le ka megopolo, ra re: E ka tla ya re mo lobakeng lo lo tlang bana ba lona ba ka bua le bana ba rona, ba re: ‘Lona lo a bo lo dirang ka Jehofa Modimo wa Iseraele?’ ₂₅Fa ba re: ‘Ka Jehofa a dirile Joretane molelwane fa gare ga rona le lona, e bong lona bana ba ga Rubene le bana ba ga Gate; ga lo na kabelo epe mo go Jehofa;’ foo bana ba lona ba khutlise bana ba rona jalo mo go boifeng Jehofa. ₂₆Ke gone re rileng: Jaanong a re ipaakanyeng go ikagela sebeso, e seng sa tshupelo e e fisiwang, le fa e le sa tlhabelo; ₂₇mme e be e nne sesupo gare ga rona le lona, le gare ga dikokomana tsa rona morago ga rona, gore re tle re dire tirelo ya ga Jehofa fa pele ga gagwe, ka ditshupelo tsa rona tse di fisiwang, ka ditlhabelo tsa rona, le ka ditshupelo tsa rona tsa kagiso; gore bana ba lona ba se ka ba raya bana ba rona mo lobakeng lo lo tlang, ba re: ‘Ga lo na kabelo mo go Jehofa.’ ₂₈Ke gone ka moo re rileng, go tlaa dirala go re mogang ba re rayang jalo, kgotsa ba raya dikokomana tsa rona mo lobakeng lo lo tlang, re tlaa re: ‘Bonang setshwano sa sebeso sa ga Jehofa se borraetsho ba se dirileng, e seng sa tshupelo e e fisiwang, le fa e le sa tlhabelo; ke sesupo fela gare ga rona le lona.’ ₂₉A Modimo o ka ka wa re itsa gore re se ka ra tsuololela Jehofa, ra fapoga gompieno, ra kgaogana le go sala Jehofa morago, ra aga sebeso sa tshupelo e e fisiwang, le sa tshupelo ya boupe, kgotsa sa tlhabelo, kwa ntle ga sebeso sa ga Jehofa Modimo wa rona se se fa pele ga motlaagana wa gagwe.”

₃₀E rile Finease moperesiti a na le dikgosana tsa phuthego, e bong ditlhogo tsa ditshika tsa Iseraele, tse di nang nae, ba utlwa mafoko a bana ba ga Rubene le bana ba ga Gate le bana ba ga Manase ba a buileng, ga ba kgatlha thata. ₃₁Finease morwa Eleasare moperesiti a raya bana ba ga Rubene le bana ba ga Gate, le bana ba ga Manase, a re: “Gompieno re a itse fa Jehofa a le mo gare ga rona, gonne ga lo a direla Jehofa tlolo eo; jaana lo golotse bana ba Iseraele mo seatleng sa ga Jehofa.”

₃₂Finease morwa Eleasare moperesiti, le dikgosana, ba boa mo baneng ba ga Rubene, le mo baneng ba ga Gate, kwa lefatsheng la Gileate, ba boela kwa lefatsheng la Kanana, kwa baneng ba Iseraele, ba ba ba ba leretse lefoko. ₃₃Selo seo sa kgatlha bana ba Iseraele; mme bana ba Iseraele ba baka Modimo, ba se ka ba tlhola ba bua go re ba ba bololela ka ntwa, go ya go senya lefatshe le bana ba ga Rubene le bana ba ga Gate ba agileng mo go lone.

₃₄Mme bana ba ga Rubene le bana ba ga Gate, ba raya sebeso se leina, ba re, Eta; gonne ba re: “Ke sesupo gare ga rona, fa Jehofa e le Modimo.”