JOŠUA 20

₁Jehofa a bua le Jošua a re: ₂“Bua le bana ba Iseraele, o re: ‘Itaoleleng metse ya botshabelo e ke buileng le lona ka ga yone ka Moše, ₃gore mmolai wa motho yo o bolayang motho ka matsheka, a sa itse, a tle a tshabele gone; e tlaa nna botshabelo mo go lona fa motho a tshaba mmusolosi wa madi. ₄O tlaa tshabela kwa go mongwe wa metse eo, o tlaa ema fa botsenong jwa kgoro ya motse, a kakanya mafoko a gagwe mo ditsebeng tsa bagolwane ba motse; mme ba tlaa mo tsholela mo motseng, ba mo naya bonno, gore a age mo go bone. ₅Fa mmusolosi wa madi a mo konatelela, foo ba se ka ba tsenya mmolai wa motho mo seatleng sa gagwe; gonne o bolaile wa ga gabo a sa itse, a sa mo ila gale. ₆O tlaa aga mo motseng oo go tsamaya a ema fa pele ga phuthego go atlholwa, go tsamaya moperesiti yo mogolo wa motlha oo a swa; foo mmolai wa motho o ka boa, a tla mo motseng wa ga gabo, le mo ntlong ya gagwe, mo motseng o e rileng a tshaba a bo a tswa mo go one.’ ”

₇Ba lomolola Keteše mo Galilea, mo lefatsheng la makgabana la Nafetali, le Shekeme mo lefatsheng la makgabana la Eferaime, le Kiriathe-areba (ke one Heberone) mo lefatsheng la makgabana la Juta. ₈Kwa moseja ga Joretane fa Jeriko ntlheng ya botlhabatsatsi, ba tlhoma Besere o o mo nageng mo lobaleng, e le wa lotso lwa ga Rubene, le Ramothe mo Gileate e le wa lotso lwa ga Gate, le Golane mo Bašane e le wa lotso lwa ga Manase. ₉Eo, ke yone metse e e laoletsweng bana botlhe ba Iseraele le moeng yo o jakileng mo go bone, gore le fa e le mang yo o bolayang motho ka matsheka, a tle a tshabele gone, a se ka a swa ka seatla sa mmusolosi wa madi, go tsamaya a ema fa pele ga phuthego.