JOŠUA 2

₁Jošua morwa Nune a ntsha batho ba le babedi mo Shitime ka bosaitsiweng, e le ditlhola, a re: “Yang go tlhola lefatshe, le Jeriko.” Ba ya; ba fitlha kwa ntlong ya seaka sengwe go twe Rahabe, ba lala gone. ₂Ga bolelelwa kgosi ya Jeriko, ga twe: “Bona, sigo jono go tsile banna ba bana ba Iseraele, ba tla go kheleisa lefatshe.” ₃Kgosi ya Jeriko ya roma kwa go Rahabe ya re: “Ntsha banna ba ba tsileng kwa go wena, ba ba tsenyeng mo ntlong ya gago; gonne ba tsile go kheleisa lefatshe lotlhe.”

₄Mme mosadi a tsaya banna ba babedi a ba fitlha; a re: “Ee, banna bao ba ne ba tlile mo go nna, mme ga ke a ka ka itse kwa ba tswang teng. ₅Ga dirala ya re e ka ne e le ka lobaka lwa fa go tswalwa kgoro, go le lefifi, banna bao ba tswela kwa ntle; mme kwa banna ba ba ileng gone ga ke itse; ba konateleleng ka bonako; gonne lo tlaa ba tshwara.”

₆Mme mosadi a bo a ba isitse kwa godimo ga ntlo, mme a ba fitlha ka lotlhaka lwa leloba, lo o ne a lo adile ka thulaganyo mo godimo ga ntlo. ₇Banna bale, ba ba konatelela ka tsela ya matsibogo a Joretane; e rile ba ba ba konatelelang ba sena go tswela kwa ntle, ba tswala kgoro.

₈E rile ba ise ba robale, mosadi a tlhatlogela kwa go bone mo godimo ga ntlo; ₉a raya banna, a re: “Ke a itse fa Jehofa a lo neile lefatshe, le go re theregiso ya lona e re wetse rotlhe, le go re banni botlhe ba lefatshe ba tlhapasela fa pele ga lona. ₁₀Gonne re utlwile ka fa Jehofa o kgadisitseng metsi a Lewatle le Lehibidu fa pele ga lona ka gone, jale ka lo tswa kwa Egepeto, le se lo se diretseng dikgosi tse pedi tsa Baamore, tse di ne di le kwa moseja wa Joretane, e bong Sihone le Oge, ba lo ba senyeditseng ruri. ₁₁E rile fela re utlwa, dipelo tsa rona tsa nyerega, ga se ka ga sala go le mowa ope mo mothong ope ka ntlha ya lona; gonne Jehofa Modimo wa lona ke ene Modimo kwa legodimong kwa godimo le mo lefatsheng fa tlase. ₁₂Ke gone jaana, a ko lo inkanele ka Jehofa go re, ka ke lo diretse ka pelonomi, le lona lo tlaa direla ba ntlo ya ga rre ka pelonomi, le go re lo tlaa nnaya sesupo sa mmaanete, ₁₃le go re lo tlaa tshedisa rre, le mme, le bana ba ga rre, ba basimane le ba basetsana, le dilo tsotlhe tse ba nang natso, lo ba lo golola matshelo a rona mo losong.”

₁₄Banna bao ba mo raya ba re: “Botshelo jwa rona bo tlaa emela jwa lona, ke go re, fa lo sa kakanye tiro e ya rona; go tlaa dirala go re, mogang Jehofa o re nayang lefatshe le, re tlaa go direla ka pelonomi le boammaaruri.”

₁₅Foo a ba tshetlolosa ka mogala ka fa fensetereng; gonne ntlo ya gagwe e ne e eme mo godimo ga lorako lwa motse, mme a bo a agile mo godimo ga lorako. ₁₆A ba raya a re: “Yang kwa thabeng, bakonatedi ba ka tla ba lo wela; lo iphitlhe gone ka malatsi a le mararo, go tsamaya bakonatedi ba bowa, morago ga moo lo ka tsamaya.”

₁₇Banna ba mo raya ba re: “Re rata ra nna re se na molato ka ga ikano e ya gago, e o e re ikanitsitseng. ₁₈Bona, e tlaa re mogang re tlang mo lefatsheng le, mogala o, wa tlhale e e bohibidu jo bo letlholo, o o gokele mo fensetereng e o re tshetlolositseng ka yone; mme borraago le mmaago, le bana ba ga rraago, le ba ntlo ya ga rraago botlhe, o ba phuthele kwano go wena mo ntlong. ₁₉Go tlaa dirala go re, le fa e le mang yo o tlaa tswang ka kgoro ya ntlo a ya mo mmileng, madi a gagwe a tlaa nna mo tlhogong ya gagwe, mme rona re tlaa bo re se na molato. Mme le fa e le mang yo o tlaa bong a na nao mo ntlong, madi a gagwe a tlaa nna mo tlhogong ya rona, fa seatla sengwe se ka bewa mo go ene. ₂₀Fa o kakanya tiro e ya rona, foo re tlaa bo re se na molato ka ga ikano ya gago e o e re ikanisitseng.” ₂₁Mosadi a re: “A go nne ka fa mafokong a lona.” A ba naya tsela, ba tsamaya; mme mogala wa bohibidu jo bo letlhololo a o gokela mo fensetereng.

₂₂Ba ya ba fitlha mo thabeng, ba tlhola teng malatsi a le mararo, ga tsamaya bakonatedi ba boa; bakonatedi ba batla mo tseleng yotlhe, mme ba se ka ba ba bona. ₂₃Foo banna ba babedi ba bowa, ba fologa mo thabeng, ba kgabaganya, ba ya ba fitlha kwa go Jošua morwa Nune, ba mmolelela gotlhe mo go ba diraletseng. ₂₄Ba raya Jošua, ba re: “Ruri Jehofa o re tsentse lefatshe lotlhe mo diatleng; gape banni botlhe ba lefatshe ba tlhapasela fela fa pele ga rona.”