JOŠUA 17

₁Mme e, ya nna yone kabelo ka taolo ya bola, ya lotso lwa ga Manase: gonne e ne e le ene motsalwapele wa ga Josefe. Ka ga Makire motsalwapele wa ga Manase, rraagwe Gileate, ka a le monna wa ntwa, a bona Gileate le Bašane ka ntlha ya gone moo. ₂Kabelo ya taolelo ya nna ya ba ba setseng ba bana ba ga Manase ka fa ditshikeng tsa bone; ya bana ba ga Abiesere, le ya bana ba ga Heleke, le ya bana ba ga Asieriele, le ya bana ba ga Shekeme, le ya bana ba ga Hefere, le ya bana ba ga Shemita; bao e ne e le bana ba basimane ba ga Manase morwa Josefe, ka fa ditshikeng tsa bone. ₃Selofehate morwa Hefere, morwa Gileate, morwa Makire, morwa Manase, o ne a se na bana ba basimane, fa e se ba basetsana fela; maina a bana ba gagwe ba basetsana ke a: Mahela, Noa, Hogela, Mileka le Tiresa. ₄Ba atamela fa pele ga Eleasare moperesiti le fa pele ga Jošua morwa Nune, le fa pele ga dikgosana, ba re: “Jehofa o ne a laolela Moše gore a re neye boswa mo go bomorwa rraa rona;” ke gone ka ntlha ya gone moo, a ba naya boswa mo go bomorwa raaabo ka fa taolong ya ga Jehofa. ₅Ga wela dikabelo di le some kwa go Manase, kwa ntle ga lefatshe la Gileate le Bašane, le le kwa moseja ga Joretane; ₆gonne bomorwadia Manase ba ne ba na le boswa mo go bomorwawe; lefatshe la Gileate la nna la bomorwa Manase ba bangwe ba ba setseng.

₇Molelwane wa ga Manase wa tswa mo Ašere wa ya kwa Mikemethathe o o lebaganyeng le Shekeme; molelwane wa tswelela ntlheng ya letsogo le legolo, kwa banning ba Enetapua. ₈Lefatshe la Tapua e ne e le la ga Manase; Tapua fa molelwaneng wa ga Manase e ne e le wa bana ba ga Eferaime. ₉Molelwane wa fologela kwa molatswaneng wa Kana, go pota molatswana ntlheng ya borwa; metse e, e ne e le ya ga Eferaime mo metseng ya ga Manase; mme molelwane wa Manase o ne o potile molatswana ntlheng ya botsheka, mme mafelelo a one a nna mo lewatleng. ₁₀Ntlheng ya borwa e ne e le ga Eferaime, ntlheng ya botsheka e le ga Manase, lewatle e le molelwane wa gagwe; mme ya ya go fitlha kwa Ašere ntlheng ya botsheka, le kwa go Isakare ntlheng ya botlhabatsatsi. ₁₁Mo go Isakare le Ašere, Manase o ne a na le Bethešeane le metse ya teng, le Ibeleame le metse ya gone, le banni ba Dore le metse ya teng, le banni ba Enetore le metse ya gone, le banni ba Taanake le metse ya teng; le banni ba Megito le metse ya gone, e bong dithota tse tharo. ₁₂Le fa go ntse jalo bana ba ga Manase ba ne ba sa nonofa go leleka banni ba metse eo; mme Bakanana ba ganelela go aga mo lefatsheng leo. ₁₃Ga dirala ya re bana ba Iseraele ba sena go thatafala, ba tsenya Bakanana mo tirelong ya bone, ba se ka ba ba lelekela ruri.

₁₄Bana ba ga Josefe ba bua le Jošua, ba re: “Ana go ntse jang ka o nneile kabelo ya taolelo e le nngwe fela, le kabo e le nngwe fela go nna boswa, etswa ke le tšhaba e kgolo, gonne Jehofa o ntse a ntshegofatsa?”

₁₅Jošua a ba raya a re: “E re fa o le tšhaba e kgolo, tlhatlogela kwa sekgweng, o ithemele teng mo lefatsheng la Baperise le la Barefaime; ka lefatshe la makgabana la ga Eferaime le go pitlaganetse.”

₁₆Bana ba ga Josefe ba re: “Lefatshe la makgabana ga le a re lekana; Bakanana botlhe ba ba agileng mo molapong ba na le dikara tsa tlhabano tsa tshipi, bone ba ba mo Bethešeane le metse ya teng, le bone ba ba mo molapong wa Jesereele.”

₁₇Jošua a bua le ba ntlo ya ga Josefe, e bong Eferaime le Manase, a re: “O tšhaba e kgolo, o na le thata e kgolo; kabelo ya taolelo ya gago ga e ketla e nna nngwe fela; ₁₈lefatshe la makgabana e tlaa nna la gago; gonne le fa le le sekgwa, o tlaa se rema, matso a sone a tlaa nna a gago; gonne o tlaa leleka Bakanana, le fa ba na le dikara tsa tshipi tsa tlhabano, ba bile ba le thata.”