JOŠUA 15

₁Kabelo ya taolelo ya lotso lwa bana ba ga Juta ka fa ditshikeng tsa bone, ya ya go fitlha kwa molelwaneng wa Etome, e bong kwa nageng ya Tsine ntlheng ya borwa, kwa bofelelong jwa ntlha ya borwa. ₂Molelwane wa bone wa ntlha ya borwa o ne o tswa bofelelong jwa Lewatle la Letswai, kwa sekgonong bolebana le ntlha ya borwa. ₃Wa bo o isa bopota mokong wa Akerabime ntlheng ya borwa, wa kgabaganyetsa kwa Tsine, wa tlhatloga bopota Kateše-barenea ka fa ntlheng ya borwa, wa feta ka Heserone, wa tlhatlogela kwa Atare, wa menogela kwa Kareka; ₄wa kgabaganyetsa kwa Asemone, wa tswa ka molatswana wa Egepeto; mme mafelelo a molelwane e ne e le mo lewatleng; o, e tlaa nna one molelwane wa lona ntlheng ya borwa.

₅Molelwane wa ntlha ya ka fa botlhabatsatsi e ne e le Lewatle la Letswai go ya fela kwa bokhutlong jwa Joretane. Molelwane wa ntlha ya botsheka o ne o tswa kwa sekgonong sa lewatle kwa bokhutlong jwa Joretane. ₆Molelwane wa tlhatlogela kwa Bethehogela, wa feta bopota Betharaba ka fa ntlheng ya botsheka; molelwane wa tlhatlogela kwa letlapeng la ga Bohane morwa Rubene. ₇Molelwane wa tlhatlogela kwa Debire, go tswa mo molapong wa Akore, wa ya jalo ntlheng ya botsheka, o lebile Gilegale, o o lebaganyeng le mokong wa Adumime, o o potileng noka ntlheng ya borwa; mme molelwane wa feta wa ya kwa metsing a Enešemeše, mme mafelelo a one a ne a le mo Enerogele. ₈Molelwane wa tlhatloga le mogogoro wa morwa Hinome go ya kwa lotlhakoreng lwa Mojebuse ntlheng ya borwa (ke one Jerusalema); molelwane wa tlhatlogela kwa godimo ga thaba e e emeng bolebagana le mogogoro wa morwa Hinome ntlheng ya bophirimatsatsi, ke go re kwa bofelong jwa mogogoro wa Refaime ntlheng ya botsheka. ₉Molelwane wa ralwa kwa godimo ga thaba, wa ralelwa kwa motsweding wa metsi a Nefetoa, wa tswela kwa metseng ya thabana ya Eferone; molelwane wa ralelwa kwa Baala (ke one Kiriathe-jearime). ₁₀Kwa Baala molelwane wa menogela ntlheng ya bophirimatsatsi go ya thabeng ya Seire, wa fetela kwa lotlhakoreng lwa thaba ya Jearime ntlheng ya botsheka (ke one Kesalone), wa fologela kwa Bethešemeše, wa feta ka fa Timena. ₁₁Molelwane wa tswela kwa lotlhakoreng lwa Ekerone ntlheng ya botsheka; molelwane wa ralelwa kwa Shikerone, wa fetela kwa thabaneng ya Baala, mme wa tswa fa Jabeneele; mafelelo a molelwane a ne a le mo lewatleng. ₁₂Molelwane wa ka fa bophirimatsatsi wa nna kwa lewatleng le legolo le losi lwa lone. Ke one molelwane wa bana ba ga Juta mo tikologong ka fa ditshikeng tsa bone.

₁₃A naya Kalebe morwa Jefune kabelo mo baneng ba Juta ka fa Jehofa o laotseng Jošua ka gone, e bong Kiriathe-areba, yo o eng ene Areba, rraagwe Anake (ke ene Heberone). ₁₄Kalebe a leleka gone bomorwa Anake ba bararo, Shešai, le Ahimane, le Talemai, bana ba ga Anake. ₁₅Mme a tlhatloga teng a ya go tlhasela banni ba Debire; gale leina la Debire e ne e le Kiriathe-sefere. ₁₆Kalebe a re: “Yo o kgemethang Kiriathe-sefere, a go thopa, ke tlaa mo naya morwadiake Akesa go nna mosadi.” ₁₇Otheniele, morwa Kenase, monnaa Kalebe, a o thopa; mme a mo naya morwadie Akesa go nna mosadi. ₁₈Ga dirala ya re mosadi a tla kwa go ene, a mo tlhotlheletsa gore a lope rraagwe naga nngwe; mosadi a pagologa mo eseleng ya gagwe; Kalebe a mo raya a re: “O eletsang?”

₁₉Mosadi a mo raya, a re: “Nnaya lesego; e re ka o mpeile mo lefatsheng la Borwa, o bo o nneye le metswedi ya metsi.” Mme a mo naya metswedi ya godimo le metswedi ya tlase.

₂₀Jo ke jone boswa jwa lotso lwa bana ba ga Juta ka fa ditshikeng tsa bone. ₂₁Metse ya bofelo ya lotso lwa bana ba Juta go isa ntlheng ya molelwane wa Etome, ntlheng ya Borwa, e ne e le Kabeseele, le Etere, le Jagure; ₂₂le Kina, le Dimona, le Atata; ₂₃le Keteše, le Hasore le Ithenane; ₂₄Sife, le Teleme le Bealothe; ₂₅le Hasore-hatata, le Keriothe-heserone (ke one Hasore); ₂₆Amame, Shema le Molata; ₂₇le Hasare-gata, le Hešemone le Bethepelete; ₂₈le Hasare-šuale, Beerešeba, le Bisiothia; ₂₉Baala, Iime le Eseme; ₃₀le Eletolate, le Kisile le Horema; ₃₁le Sikelage, le Matemana le Sanesana; ₃₂le Lebaothe, Shilehime, le Aine le Rimone; metse yotlhe e le 29, e na le metsana ya yone.

₃₃Mo fatsheng le le kwa sehuting, Ešetaole, le Sora le Ašena; ₃₄le Sanoa, le Eneganime, Tapua le Ename; ₃₅Jaremuthe, le Adulame, le Soko le Aseka; ₃₆le Shaaraime, le Adithaime, le Getera, Geterothaime, metse e le 14, e na le metsana ya yona.

₃₇Senane, le Hataša, le Migatalegate; ₃₈le Dileane, le Misepe, le Joketheele; ₃₉Lakiše, le Bosekathe, le Egelone; ₄₀le Kabone, le Lahemame, le Kithiliše; ₄₁le Geterothe, le Bethetagone, le Naama le Maketa; metse e le 16, e na le metsana ya yone.

₄₂Libena, le Ethere, le Ašane; ₄₃le Ifeta, le Ašena, le Nesibe; ₄₄le Keila, le Akesibe, le Mareša; metse e e ferang o le mongwe, e na le metsana ya yone.

₄₅Ekerone, o na le metse ya teng le metsana ya gone; ₄₆go tswa mo Ekerone go ya fela kwa lewatleng, yotlhe e e bapileng le Ašetote, e na le metsana ya yone.

₄₇Ašetote, metse ya teng le metsana ya gone; Gasa, metse ya gone le metsana ya gone; go ya kwa molatswaneng wa Egepeto, le kwa lewatleng le legolo, le losi lwa lone.

₄₈Le mo lefatsheng la makgabana, Shamire, le Jatire, le Soko; ₄₉le Danna, le Kiriathe-Sanna (ke one Debire); ₅₀le Anabe, le Ešetemo, le Anime; ₅₁le Gošene, le Holone, le Gilo; metse e le 11 e na le metsana ya yone.

₅₂Arabe, le Duma, le Ešane; ₅₃le Janime, le Bethetapua, le Afeka; ₅₄le Humeta, le Kiriathe-areba (ke one Heberone), le Siore; metse e e 9 e na le metsana ya yone.

₅₅Maone, le Karemele, le Sife, le Juta ₅₆le Jesereele, le Joketeame, le Sanoa; ₅₇Kaine, Gibea, le Timena; metse e le some e na le metsana ya yone.

₅₈Halehule, Bethesure le Getore; ₅₉le Maarathe, Bethanothe le Eletekone; metse e le merataro e na le metsana ya yone.

₆₀Kiriathe-baale (ke one Kiriathe-jearime) le Raba; metse e le mebedi e na le metsana ya yone.

₆₁Mo nageng, Betharaba, Midine le Sekaka; ₆₂le Nibešane, motse wa Letswai, le Enegedi; metse e le merataro, e na le metsana ya yone.

₆₃Me ka ga Bajebuse, banni ba Jerusalema, ba bana ba Juta ba ne ba retelelwa ke go ba leleka: Bajebuse ba aga le bana ba Juta mo Jerusalema, nako e sa le eno.