JOŠUA 14

₁A, ke one maswa a bana ba Iseraele ba ne ba a tsaya mo lefatsheng la Kanana, a Eleasare moperesiti, le Jošua morwa Nune, le ditlhogo tsa makgotla a borra batho ba ditso tsa bana ba Iseraele, a ba a abetseng, ₂ka go laolwa ka bola ga boswa jwa bone, jaaka Jehofa a laotse ka Moše, ka ga ditso tse di ferang o le mongwe, le ka ga bontlhanngwe jwa lotso. ₃Gonne boswa jwa ditso tse pedi le jwa bontlhanngwe jwa lotso, Moše o ne a bo abile kwa moseja ga Joretane; mme Balefi a se ka a ba naya boswa bope mo go bone. ₄Gonne bana ba ga Josefe ba ne ba le ditso di le pedi, Manase le Eferaime; mme ba se ka ba naya Balefi kabelo epe ya lefatshe, fa e se metse ya go aga mo go yone, e na le dintlhana tsa yone, ga dikgomo le ga dithuo tsa bone. ₅Jaaka Jehofa a laotse Moše, bana ba Iseraele ba dira jalo, ba kgaoganya lefatshe.

₆Foo bana ba Juta ba atamela kwa go Jošua mo Gilegale; mme Kalebe morwa Jefune wa Mokenise a mo raya a re: “O a se itse selo se Jehofa o ne a se bua le Moše motho wa Modimo, ka ga me le ka ga gago, mo Kateše-barenea. ₇E rile Moše motlhanka wa ga Jehofa a nthoma ke tswa mo Kateše-barenea ke ya go tlhola lefatshe, ka bo ke le dinyaga di le 40; ka ba ka mo leretse lefoko jaaka go ne go le mo pelong ya me. ₈Le fa go ntse jalo bana ba ga rre ba ke ne ke tsamaile nabo ba nyerisa dipelo tsa batho; mme nna ka sala Jehofa Modimo wa me morago ka botlalo. ₉Moše a ikana ka tsatsi leo, a re: ‘Ruri lefatshe le lonao lwa gago lo le gatileng, e tlaa nna boswa jwa gago le jwa bana ba gago ka bosakhutleng, ka o setse Jehofa Modimo wa gago morago ka botlalo.’ ₁₀Jaana bona, Jehofa o ntshedisitse, jaaka a ne a bua, ka dinyaga tse di 45 tse, go tswa mo lobakeng lwa jale jaaka Jehofa a bua lefoko le le Moše, Iseraele o ntse a sepela mo nageng; mme jaana bona, gompieno ke botsofe jwa dinyaga di le 85. ₁₁Gompieno ke sa ntse ke le thata, fela jaaka mo letsatsing le Moše o ne a nthoma ka lone, jaaka thata ya me e ne e ntse jale, thata ya me e ntse fela jalo le jaana, ya go tlhabana, ya go bolola le ya go goroga. ₁₂Ke gone jaana, ka re: Nnaya thaba e Jehofa o ne a bua ka ga yone ka tsatsi leo; gonne o ne wa utlwa mo tsatsing leo jaaka Baanake ba ne ba le gone, le metse ya bone fa e le megolo e thekeleditswe; e tlaa re gongwe Jehofa a nne le nna, mme ke ba leleke, jaaka Jehofa a ne a bua.”

₁₃Jošua a mo segofatsa; a naya Kalebe morwa Jefune Heberone go nna boswa. ₁₄Jalo Heberone wa nna boswa jwa ga Kalebe morwa Jefune wa Mokenise nako e sa le eno; gonne o ne a sala Jehofa Modimo wa Iseraele morago ka botlalo. ₁₅Gale leina la Heberone e ne e le Kiriathe-areba; Areba yoo e ne e le ene motho yo mogolo mo go Baanake. Lefatshe la bona boikhutso mo ntweng.