JOŠUA 11

₁Ga dirala ya re Jabine kgosi ya Hasore a go utlwela, a roma kwa go Jobabe kgosi ya Matone, le kwa kgosing ya Shimerone, le kwa kgosing ya Akešafe, ₂le kwa dikgosing tse di neng di le ntlheng ya botsheka mo lefatsheng la makgabana, le mo Areba o o potileng Kinerothe ntlheng ya borwa, le mo lefatsheng le le kwa sekhuting, le mo maroteng a Dore, ka fa bophirimatsatsi, ₃kwa go Bakanana, ba botlhabatsatsi le ba bophirimatsatsi, le go Baamore le Bahite, le Baperise, le Bajebuse, mo lefatsheng la makgabana, le kwa go Bahife fa tlase ga Heremone mo lefatsheng la Misepa. ₄Ba bolola, bone le dintwa tsotlhe tsa bone, batho ba le bantsi fela jaaka mošawa o o fa losing lwa lewatle ka bontsi, ba na le dipitse le dikara tsa tlhabano di le dintsi thata. ₅Dikgosi tse tsotlhe tsa kopana; tsa fitlha tsa thibelela mmogo fa metsing a Merome, di tla go tlhabana le Iseraele.

₆Jehofa a raya Jošua, a re: “O se ka wa boifa ka ntlha ya bone, gonne e tlaa re ka moso go riana, ke tlaa ba neela fa pele ga Baiseraele ba bolailwe botlhe; o rafole dipitse tsa bona mesifa; o fise dakara tsa bone tsa tlhabano ka molelo.” ₇Jalo Jošua, a na le batho botlhe ba tlhabano, a bolola, a tla mo go bone ka tshoganetso fa metsing a Merome, mme a ba phagelela. ₈Jehofa a ba tsenya mo seatleng sa Iseraele, ba ba kgemetha, ba ba alola ba ya go fitlha kwa Sitone o mogolo, le kwa Miserefothe-maime, le kwa molapong wa Misepe ntlheng ya botlhabatsatsi; ba ba kgemetha, ba se ka ba ba tlogelela ope. ₉Jošua a ba direla jaaka Jehofa a mo laotse; a rafola dipitse tsa bone mesifa, a fisa dikara tsa bone tsa tlhabano ka molelo.

₁₀Jošua a menogela kwa morago ka baka loo, a thopa Hasore, a bolaya kgosi ya teng ka tšhaka; gonne e rile gale Hasore ya bo e le tlogo ya magosi ao otlhe. ₁₁Ba kgemetha mewa yotlhe e e neng e le mo go one ka bojetla jwa tšhaka ba e senyetsa ruri; go se ka ga sala ope yo o hemang mowa; a fisa Hasore ka molelo.

₁₂Le metse yotlhe ya dikgosi tseo, le dikgosi tsa yone, Jošua a di tsaya a di kgemetha ka bojetla jwa tšhaka, a di senyetsa ruri, jaaka Moše motlhanka wa ga Jehofa a laotse. ₁₃Mme ka ga metse e e neng e eme mo dithotaneng tsa one, Baiserele ba se ka ba fisa ope wa yone, fa e se Hasore osi; one Jošua a o fisa. ₁₄Thopo yotlhe ya metse eo, le matlhape, bana ba Iseraele ba di itseela thopo; mme batho, ba ba kgemetha botlhe ka bojetla jwa tšhaka, ga tsamaya ba ba senya, le gone ba seka ba tlogela ope yo o hemang mowa. ₁₅Jaaka Jehofa a laotse Moše motlhanka wa gagwe, Moše a laola Jošua jalo; Jošua a dira jalo; a se ka a tlogela sepe se sa dirwa sa dilo tsotlhe tse Jehofa o di laoletseng Moše.

₁₆Jalo Jošua a thopa lefatshe lotlhe leo, lefatshe la makgabana, le ntlheng ya borwa gotlhe, le lefatshe lotlhe la Gošene, le le le kwa sekhuting, le Areba, le lefatshe la makgabana a Iseraele; le le le kwa sekhuting sa lone; ₁₇go tswa thabeng ya Halake, e e kwa Seire, go ya fela kwa Baalagate mo molapong wa Lebanone fa tlase ga Heremone, mme a thopa dikgosi tsotlhe tsa one, a di kgemetha, a di otlela fela. ₁₈Jošua a nna a tlhabana le dikgosi tseo tsotlhe fela ka lobaka lo loleele. ₁₉Go ne go se na motse ope o o dirileng kagiso le bana ba Iseraele, fa e se Bahife banni ba Gibeone; ba thopa gotlhe ka ntwa. ₂₀Gonne e ne e le go rata ga Jehofa go thatafatsa dipelo tsa bone, gore ba bololele Iseraele ka ntwa, gore a ba senyetse ruri, gore ba se ka ba bona tumelelesego epe, fa e se gore a ba senye, fela jaaka Jehofa a laotse Moše.

₂₁Jošua a tla ka baka loo, a kgaola Baanake mo lefatsheng la makgabana, mo Heberone, mo Debire, le mo Anabe, le mo lefatsheng lotlhe la Juta la makgabana, le mo lefatsheng lotlhe la Iseraele la makgabana; Jošua a ba senyetsa ruri le metse ya bone. ₂₂Ga go a ka ga sala ope wa Baanake mo lefatsheng la bana ba Iseraele, fa e se mo Gasa, mo Gathe le mo Ašetote, ga sala bangwe gone.

₂₃Jalo Jošua a thopa lefatshe lotlhe ka fa go tsotlhe tse Jehofa o ne a di bua le Moše; mme Jošua a le naya Iseraele go nna boswa ka fa dikgaoganong tsa ditso tsa bone. Mme lefatshe la bona boikhutso mo ntweng.