JOELE 2

₁Letsang lonaka mo Sione,

lo openg mokgosi wa tshoso

mo thabeng ya me e e boitshepo;

a banni botlhe ba lefatshe

ba rorome;

gonne motlha wa ga Jehofa o etla,

gonne o fa gaufi.

₂Motlha wa lefifi le letobo,

motlha wa maru

le lefifi le le kwenneng,

jaaka bosa fa bo sela le dithaba;

batho ba ba tšhaba e kgolo e e thata,

ga go ise go ke go nne

e e tshwanang nabo,

le gone ga go ketla go tlhola go nna

epe morago ga bone,

go ya fela dinyageng tsa dikokomana

di le dintsi.

₃Molelo o laila fa pele ga bone;

fa morago ga bone kgabo e a tuka;

lefatshe le ntse jaaka tshimo ya

Etene fa pele ga bone,

mme morago ga bone

ke naga e e swafetseng fela.

Ee, ga go na sepe se se falotseng

mo go bone.

₄Ponalo ya bone

e ntse jaaka ponalo ya dipitse;

ba bile ba taboga

jaaka bapalami ba dipitse.

₅Go tlola ga bone

go ntse jaaka modumo wa dikara,

mo godimo ga dithaba

go ntse jaaka modumo

wa kgabo ya molelo fa e ja dirite,

jaaka batho ba ba thata

fa ba abetswe go tlhabana.

₆Ditšhaba di mo tlalelong e e mahehe

ka ntlha ya bone;

difatlhogo tsotlhe di khwatile.

₇Ba taboga jaaka batho

ba ba nonofileng;

ba palama lorako jaaka batlhabani;

ba tsamaela gongwe botlhe

mo ditseleng tsa bone,

ga ba fapaane mo thulaganong

ya bone.

₈Le gone mongwe ga a kgorometse

yo mongwe;

ba tsamaela gongwe,

mongwe le mongwe

mo tseleng ya gagwe,

ba sotlhomele mo dibolaong

fela ka thata, ga ba kgaogane

mo go sepeleng ga bone.

₉Ba tlolele mo motseng;

ba taboge mo godimo ga lorako;

ba palamele mo matlong;

ba tsene ka fa diponeng

jaaka legodu.

₁₀Lefatshe le reketle

fa pele ga bone;

magodimo a rorome,

letsatsi le fifale le kgwedi,

le dinaledi di gonyetse

phatsimo ya tsone.

₁₁Jehofa o ntsha lentswe la gagwe

fa pele ga ntwa ya gagwe;

gonne ntwa ya gagwe e e tlhaolelang

e kgolo thata;

gonne go thata yo o dirafatsang

lefoko la gagwe.

Gonne motlha wa ga Jehofa

o mogolo,

o boitshega thata;

mme e mang yo o ka o itshokelang?

₁₂“Le gompieno,” go bua Jehofa,

“retologelang mo go nna

ka pelo yotlhe,

le ka go ikitsa go ja,

le ka go lela, le ka go hutsafala.”

₁₃Lo ikgagole dipelo, e seng diaparo,

lo retologele mo go Jehofa

Modimo wa lona,

gonne o pelontle,

o tletse bopelotlhomogi,

o bonya go galefa,

o letlotlo la boutlwelobotlhoko,

mme o tle a ikwatlhaele bosula.

₁₄Go itse mang bo ga a ketla

a retologa a ikwatlhaya,

mme a tlogela tshegofatso,

e bong tshupelo ya boupe,

le tshupelo e e nowang

ya ga Jehofa Modimo wa lona?

₁₅Letsang lonaka mo Sione

lo itshepise go ikitsa go ja,

kuang phuthego e e masisi;

₁₆phuthang batho,

itshepiseng phuthego,

phuthang banna bagolo,

phuthang banyana,

le ba ba anyang mabele.

A monyadi a tswe

mo ntlwaneng ya gagwe,

le monyadwi

mo borobalong jwa gagwe.

₁₇A baperesiti, badiredi ba ga Jehofa,

ba lele fa gare ga maribela le sebeso,

mme a ba re:

“Jehofa, rekegela batho ba gago,

o se ka wa neela boswa jwa gago

kgobong,

gore merafe e ba laole;

ana ba tlaa bo ba buelang

mo ditšhabeng ba re:

‘Modimo wa bone o kae?’ ”

₁₈Foo Jehofa a hufanela lefatshe

la gagwe,

a tlhomogela batho ba gagwe pelo.

₁₉Jehofa a fetola,

a raya batho ba gagwe, a re:

“Bonang, ke tlaa lo leretse mabele,

le bojalwa jwa mofine, le lookwane,

mme lo tlaa di kgora;

ga nketla ke tlhola ke lo dira kgobo

mo merafeng;

₂₀ke tlaa tlosetsa ntwa ya botsheka

kgakala le lona, ke tlaa e lelekela

kwa lefatsheng le le sekaka

le le le swafetseng,

tlhogo ya yone e le mo lewatleng

la botlhabatsatsi,

le mogatla wa yone

o le mo lewatleng

la bophirimatsatsi;

mme go nkga ga yone

go tlaa tlhatloga,

le moutlwalo wa yone o o bosula

o tlaa tlhatloga,

ka ba dirile dilo tse dikgolo.”

₂₁O se ka wa boifa, wena lefatshe,

ipele o itumele;

gonne Jehofa

o dirile dilo tse dikgolo.

₂₂Lo se ka lwa boifa

lona diphologolo tsa naga;

gonne mafulo a naga a a tlhoga,

gonne setlhare se a ungwa,

ditlhare tsa mofeige le tsa mafine

di ntsha thata ya tsone.

₂₃Ke gone, ipeleng lona

bana ba Sione,

lo itumele mo go Jehofa

Modimo wa lona;

gonne o lo naya pula ya sephai

ka selekanyo se se siameng,

o lo nesetsa pula, pula ya sephai

le pula ya kgogolammoko

ka kgwedi ya ntlha.

₂₄Dibopi di tlaa tlala mabele,

le didibeletso di tlaa penologa

bojalwa jwa mofine le lookwane.

₂₅“Ke tlaa lo rebolela

tsa dinyaga tse tsie e di jeleng,

le boijane, le seboko,

le mogokong, ntwa ya me e kgolo

e nkileng ka e roma mo go lona.

₂₆Lo tlaa jela mo letlotlong lo kgora,

lo tlaa baka leina la ga Jehofa

Modimo wa lona,

yo o lo diretseng ka kgakgamatso;

mme batho ba me ga ba ketla

ba tlhajwa ke ditlhong gope.

₂₇Lo tlaa itse

fa ke le mo gare ga Iseraele,

le go re ke Jehofa Modimo wa lona,

mme go bo go se na ope o sele.

Mme batho ba me ga ba ketla

ba tlhajwa ke ditlhong gope.”

₂₈“Go tlaa dirala morago ga mo,

go re ke thele mowa wa me

mo bathong botlhe;

bana ba lona ba basimane le ba

basetsana ba tlaa perofesa,

banna bagolo ba lona

ba tlaa lora ditoro,

makau a lona a tlaa bona

diponatshegelo.

₂₉Le mo batlhankeng

le mo malateng

ke tlaa thela mowa wa me

mo metlheng eo.

₃₀Ke tlaa bonatsa dikgakgamatso

mo magodimong le mo lefatsheng,

madi le molelo,

le dithogomosi tsa mosi.

₃₁Letsatsi le tlaa fetolwa lefifi

le kgwedi madi,

pele motlha o mogolo

le o o boitshegang wa ga Jehofa

o ise o tle.

₃₂Go tlaa dirala go re,

le fa e le mang yo o tlaa bitsang

leina la ga Jehofa

o tlaa gololwa;

gonne mo thabeng ya Sione

le mo Jerusalema

go tlaa nna ba ba falolang,

jaaka Jehofa a buile,

le mo masaleleng go tlaa nna bone

ba Jehofa o ba bitsang.”