JOBE 4

₂“Fa motho a leka go bua nao,

a o tlaa nna pelo e botlhoko?

Mme e mang yo o ka ithibang

mo go bueng?

₃Bona, o rutile batho ba le bantsi,

o thatafaditse diatla tse di bokoa.

₄Mafoko a gago a emisitse

yo o ne a kgokgweetsega,

le mangole a a obegang

o a nonotshitse.

₅Mme jaanong se tsile mo go wena,

mme o a idibala;

se a go ama, mme o a huduega.

₆A go boifa Modimo ga gago

ga se gone boikanyo jwa gago,

le bosenang molato

jwa ditsela tsa gago,

a ga se jone tsholofelo ya gago?

₇“Ke a go rapela,

o tle o gakologelwe gore

e mang yo o kileng a nyelela

a se na molato?

Kgotsa bathokgami

ba kile ba kgaolwa kae?

₈Ka fa nna ke bonyeng ka teng,

ke go re: ba ba lemang boikepo,

ba jala bosenyi,

ba tle ba robe jone fela.

₉Ba tle ba nyelediwe

ke go hema ga Modimo,

ba lailwe ke tsubutlo

ya bogale jwa one.

₁₀Go duma ga tau,

le kodu ya tau e e bogale,

le meno a ditawana,

go robegile.

₁₁Tau e kgolo e tle e bopame

ka go tlhoka phologolo,

le bana ba tau e namagadi

ba phatlalale.

₁₂“Jaana ka sebediwa sengwe,

ka longwa tsebe ka ga sone.

₁₃E rile mo megopolong e e tswang

mo diponatshegelong tsa bosigo,

motlhang boroko jo bogolo

bo tshwereng batho,

₁₄poifo ya nkwela, le thoromo,

e e neng ya roromisa marapo

a me otlhe fela.

₁₅Foo sedimo sengwe sa feta

fa pele ga sefatlhogo sa me,

nama ya me ya tlhonya bobowa.

₁₆Sa ema, mme ke se ka ka lemoga

ponalo ya sone;

ga bo go le sebopego

fa pele ga matlho a me,

go tuuletse fela,

mme ka utlwa lentswe le re:

₁₇‘A motho yo o swang o ka

nna tshiamo bogolo go Modimo?

A monna o ka itsheka

bogolo go Modiri wa gagwe?

₁₈Bona, ga o ikanye batlhanka ba one;

le baengele ba one

o tle o ba neye molato wa boeleele.

₁₉Bogolo jang bone

ba ba agileng mo matlong a seretse,

a motheo wa one

o leng mo loroleng,

a phatlakanngwa jaaka serurubele.

₂₀Gare ga moso le maitsebowa

ba tle ba senngwe,

ba swele ruri,

ba sa tlhokomelwe ke ope.

₂₁A megala ya megope ya bone

ga e tlhomolwe mo teng ga bone?

Ba swe, e bile e le

mo go se nang botlhale.’ ”