JOBE 20

₂“Ke gone ka moo megopolo ya me

e nnayang phetolo,

e bong ka ntlha ya go potlaka ga me

mo go nna.

₃Ke utlwile kgalemelo

e e ntlhabisang ditlhong,

mowa wa tlhaloganyo ya me

wa mphetola.

₄A gale, bogologolo,

e sa le ka motho a bewa

mo lefatsheng,

a o ntse o sa itse se,

₅sa go re, go ja koma ga baikepi

go le go khutshwane,

le boitumelo jwa ba ba sa reng

Modimo sepe

bo nna ka ponyo ya leitlho fela?

₆Le fa tlotlomalo ya gagwe

e palamela kwa magodimong,

le tlhogo ya gagwe

e fitlha kwa marung;

₇le fa go ntse jalo o tlaa felela ruri

ka bosakhutleng

jaaka maswe a gagwe;

ba ba mmonyeng ba tlaa re:

‘O kae?’

₈O tlaa fofela koo fela jaaka toro,

mme ga a ketla a fitlhelwa;

ee, o tlaa alolwa

jaaka ponatshegelo ya bosigo.

₉Leitlho le le kileng la mmona

ga le ketla le tlhola le mmona gope;

le gone felo ga gagwe

ga go ketla go tlhola go mo leba.

₁₀Bana ba gagwe ba tlaa batla

botsalano jwa bahumanegi,

diatla tsa gagwe

di tlaa rebola khumo ya gagwe.

₁₁Le fa marapo a gagwe

a tletse bokolwane,

bo tlaa itelega nae mo loroleng.

₁₂le fa boikepo bo le botshe

mo ganong la gagwe,

le fa a bo suba

fa tlase ga loleme lwa gagwe;

₁₃le fa a bo rekegela,

a gana go bo lesa,

mme a ntse a bo tshegeditse fela

mo teng ga legano la gagwe;

₁₄le fa go ntse jalo,

dijo tsa gagwe di fetogile

mo maleng a gagwe,

ke botlhoko jwa dinenebu

mo teng ga gagwe.

₁₅O komeditse dikhumo,

mme o tlaa ba a di tlhatsa;

Modimo o tlaa di gelola

mo mpeng ya gagwe.

₁₆O tlaa mona botlhoko jwa dinenebu;

lolema lwa šaušawane

lo tlaa mmolaya.

₁₇Ga a ketla a leba dinoka,

dinokana tse di elang dinotshe

le madila a maši.

₁₈Se o ne a se itapisetsa

o tlaa se busa, mme

ga a ketla a se meletsa mo teng;

ga a ketla a itumelela thoto

e o e bapetseng.

₁₉Gonne o patikile a latlha

bahumanegi;

o gapile ntlo ka thata,

e o ne a se ka a e aga.

₂₀“E re ka a ne a sa itse boiketlo

mo teng ga gagwe,

ga a ketla a sala le sepe

sa se o ne a itumela mo go sone.

₂₁Ga se ka ga sala sepe

se o sa se jelang ruri;

ke gone ka moo

go tlhogonolofala ga gagwe

ga go ketla go tlhomama.

₂₂O tlaa re mo botlalong

jwa letlotlo la gagwe

a nne mo pitlaganong;

seatla sa mongwe le mongwe

yo o mo matladikeng

se tlaa wela mo go ene.

₂₃E tlaa re mogang o reng o kgora

mo mpeng,

Modimo o latlhele bogale

jwa tšarologo ya one mo go ene,

o tlaa bo kgoromeletsa mo go ene

a sa ntse a ja.

₂₄O tlaa tshaba sebolao sa tshipi,

bora jwa kgotlho

bo tlaa mo phololetsa.

₂₅Fa mongwe a o somola,

o tswe mo mmeleng wa gagwe;

ee, segale se se phatsimang

se tswe mo santlhokweng wa gagwe;

ditheregiso di mo go ene.

₂₆Lefifi lotlhe le beetswe

dikhumo tsa gagwe tse di rategang;

molelo o o sa butswelwang ke motho

o tlaa mo laila;

o tlaa nyeletsa se se setseng

mo mogopeng wa gagwe.

₂₇Magodimo a tlaa senola

boikepo jwa gagwe,

le lefatshe le tlaa mo tsogologela.

₂₈Totafalo ya ntlo ya gagwe

e tlaa tloga,

dithoto tsa gagwe di tlaa elela koo

mo tsatsing la botšarara jwa one.

₂₉Kabelo ya moikepi ke eo,

e tswa mo Modimong,

le boswa jo o bo laoletsweng

ke Modimo.”