Jobe
1Foo Jobe a fetola a re:
2“Ke utlwile dilo di le dintsi
tse di ntseng jalo; lo bagomotsi
ba lo lapisang lotlhe fela.
3A mafoko a boithamako
a ka dirana le bokhutlo?
Kgotsa ke eng se se go gakatsang
fa e bo ne ne o fetola jaana?
4Le nna ke ne ke ka bua jaaka lona;
fa mowa wa lona o ka bo
o le mo boemong jwa mowa wa me,
ke ne ke ka lo gololela mafoko
a a lo nyatsang,
ke lo thukhuthela tlhogo.
5Mme nna, ke ne ke tlaa lo nonotsha
ka molomo wa me,
le kgomotso ya dipounama tsa me
e ne e tlaa kokobetsa bohutsana
jwa lona.
6Le fa ke bua,
bohutsana jwa me ga bo a kokobela;
le fa ke ithiba
ke a bo ke imologile eng?
7Mme jaanong o ntapisitse,
o swafaditse lesomo la me
lotlhe fela.
8O nkudupantse,
e le tshupo e e nnyatsang;
borole jwa me bo a ntsogologela,
bo ntsha tshupo fa pele ga
sefatlhogo sa me.
9O nkgagotse mo bogaleng jwa one,
o mpogisitse; o ntšhenetse meno;
moganetsi wa me
o šadikanya matlho a gagwe ka nna.
10Ba nkatlhamoloseditse melomo;
ba ntiteile lesama ka kgobo,
ba nkgobokanetse go tlhabana
le nna.
11Modimo o ntsenya mo seatleng
sa ba ba sa reng Modimo sepe,
o ntatlhela mo diatleng tsa baikepi.
12Ke ne ke le mo boiketlong,
mme wa nthobaganya ka bogare,
ee, o ntshwere ka thamo
a nthubaganya;
o bile o ntlhomile,
gore ke nne sekonopiwa sa one.
13Bahudi ba one ba ntikanyeditse,
o fatola diphilo tsa me,
a sa rekegele; o tshololela
santlhokwe wa me fa fatshe.
14O mphatlakanya ka go nthubaka,
o ntshotlhomelela jaaka seganka.
15Ke rokeletse letlalo la me
letsela la kgetse,
ke beile lonaka lwa me
mo loroleng.
16Sefatlhogo sa me
se kganatheditswe ke go lela,
moriti wa loso
o mo dintshing tsa matlho a me;
17le fa go se na thubakanyo
mo diatleng tsa me,
le morapelo wa me o le boitsheko.
18“Lefatshe wee,
o se ka wa bipa madi a me,
a kgajajego ya me
e se bone felo ga boikhutso.
19Le jaana, bona,
mosupi wa me o kwa legodimong,
le yo o nkemelang
o kwa godimong.
20Ditsala tsa me di a ntshotla,
leitlho la me
le thelela Modimo dikeledi;
21gore o tle o emele
tshiamo ya motho mo Modimong,
le ya morwa motho
mo go wa ga gabo!
22Gonne e tlaa re dinyaganyana
di sena go feta,
ke be ke ya tseleng
e ke se ketlang ke bowa mo go yone.”
