JOBE 10

₁“Mowa wa me

o tennwe ke botshelo jwa me;

ke tlaa golola go itoka ga me;

ke tlaa bua ka bogalaka

jwa mowa wa me.

₂Ke tlaa raya Modimo ke re,

O se ka wa ntshekisa;

o nkaele ka fa o ganelang

le nna ka gone.

₃A go molemo mo go wena

fa o ka patika,

fa o ka nyatsa tiro

ya diatla tsa gago,

mme o phatsimela

kgakololo ya baikepi?

₄A o na le matlho a nama,

kgotsa a o bona jaaka motho a bona?

₅A malatsi a gago

a tshwana jaaka malatsi a motho,

kgotsa dinyaga tsa gago,

jaaka malatsi a motho,

₆fa e bo ne ne o botsa

ka ga boikepo jwa me,

o hukutsa ka ga boleo jwa me,

₇le fa o ntse o itse

fa ke se boikepo;

le gone go se na ope

yo o ka gololang

mo seatleng sa gago?

₈Diatla tsa gago di mpopagantse,

tsa ntshwatshwaela fela gotlhe;

le fa go ntse jalo o a ntshenya.

₉Ke a go rapela,

a ko o nkgakologelwe

go re o mpopile jaaka letsopa;

mme a o tlaa ba o mpusetsa

mo loroleng?

₁₀A ga o a nthela jaaka maši,

wa nthemisa jaaka madila

a a loileng.

₁₁O nkapesitse letlalo le nama,

o ntshwaragantse ka marapo

le mesifa.

₁₂O nneile botshelo le botsalano,

le pabalelo ya gago

e tlametse mowa wa me.

₁₃“Le fa go ntse jalo,

dilo tse o ne wa di loba

mo pelong ya gago;

ke a itse fa selo se, se na nao;

₁₄fa ke leofa,

foo o a tle o ntlhokomele,

mme ga o ketla o nkgolola

mo boikepong jwa me.

₁₅Fa ke le boikepo,

go tlaa bo go latlhega nna;

mme fa ke le tshiamo,

le fa go ntse jalo

ga nketla ke tsholetsa tlhogo;

ka ke tletse ditlhong,

ke ntse ke lebile patikego ya me.

₁₆Ka tlhogo ya me e ikgoletsa,

o a tle o ntsome jaaka tau;

gape o iponatse kgakgamatso

mo go nna.

₁₇O ntšhafaletsa basupi ba gago

ba ba nnayang molato,

o ntotisetse kgakalo ya gago;

ntwa e e tlhomaganyeng

le ntwa e tlhabana le nna.

₁₈“E le foo o nntsheditse eng

mo sebopelong?

Nka bo ke ne ke sule,

leitlho lepe le koo

le se ka la mpona.

₁₉Nka bo ke ne ke tshwana jaaka

fa nka bo ke seyo gope;

nka bo ke ne ke tsewa

mo sebopelong ka isiwa phupung.

₂₀A malatsi a me ga a mabotlana?

Ke gone khutla,

mme o ntese gore ke tle

ke ikgomotse go le gonnye,

₂₁ke ise ke ye

kwa ke se ketlang ke boa gone,

e bong kwa lefatsheng la lefifi

le la moriti wa loso;

₂₂lefatshe la lefifi

le le kwenneng jaaka lefifi tota;

lefatshe la moriti wa loso

le le se nang thulagano,

le kwa lesedi le ntseng

jaaka lefifi gone.”