JOBE 1

₁Go kile ga ne go le monna mongwe mo lefatsheng la Use, leina la gagwe go twe Jobe; monna yo o ne a itekanetse, a le thokgamo, e le motho yo o boifang Modimo, a tshaba bosula. ₂Mme a tsala bana ba basimane ba supa, le ba basetsana ba le bararo. ₃Dithuo tsa gagwe le tsone e le dinku di le 7 000, dikamela di le 3 000, dipholo tsa dikgomo e le tsa bojokwe ba le 500, diesela tse dinamagadi di le 500, ba ntlo ya gagwe ba le bantsi thata; jalo monna yoo a bo a feta bana botlhe ba kwa botlhabatsatsi ka bogolo.

₄Bomorwawe ba ne ba tle ba ye go dira modiro mo ntlong ya mongwe le mongwe ka letsatsi la gagwe; mme ba rome ba ye go bitsa bokgaitsadia bone ba bararo, gore ba tle go ja le go nwa nabo. ₅Go no go dirale fa malatsi a mediro ya bone a sena go feta, Jobe a rome a ye go ba itshepisa, a phakele a ise ditshupelo tse di fisiwang ka fa palong ya bone botlhe; gonne Jobe a re: “E ka re gongwe bomorwaake ba bo ba leofile, ba itatotse Modimo mo pelong tsa bone.” Jobe a nna a dira jalo ka metlha yotlhe.

₆Jaana go ne go le letsatsi lengwe le bomorwa Modimo ba yang go iponatsa fa pele ga Jehofa ka lone, Satane le ene a ya nabo. ₇Jehofa a raya Satane a re: “O tswa kae?” Foo Satane a fetola Jehofa, a re: “Ke tswa go kgarakgatshega mo lefatsheng, le go tsamayatsamaya mo go lone.”

₈Jehofa a raya Satane a re: “A o ntse o tlhokometse motlhanka wa me Jobe, gonne ga go na ope yo o tshwanang nae mo lefatsheng, e le monna yo o itekanetseng, yo o siameng, motho yo o boifang Modimo, a tshaba bosula?”

₉Foo Satane a fetola Jehofa, a re: “A Jobe o boifa Jehofa ka lefela? ₁₀A ga o a mmeela mo tikologong ya gagwe le ntlo ya gagwe le tsotlhe tse o nang natso ka ntlha tsotlhe? O segofaditse tiro ya diatla tsa gagwe, le dithuo tsa gagwe di atile mo lefatsheng. ₁₁A ko o ntshe seatla sa gago jaana, o ame tsotlhe tse o nang natso, mme o tlaa go itatola mo matlhong a gago.”

₁₂Mme Jehofa a raya Satane a re: “Bona, dilo tsotlhe tse o nang natso di mo thateng ya gago; fa e se ene fela sebele, o se ka wa ntshetsa ene seatla.” Mme Satane a tswa fa pele ga Jehofa.

₁₃Ga dirala ya re ka letsatsi lengwe bomorwa Jobe le bomorwadie ba ja ba nwa bojalwa jwa mofine mo ntlong ya mogolo wa bone. ₁₄Ga tla morongwa kwa go Jobe, a re: “Dikgomo di ne di lema le diesele di fula fa go tsone; ₁₅Basabea ba di tlhasela, ba di gapa; ee, ba bolaile batlhanka ka bogale jwa tšhaka; go falotse nna ke le nosi fela ke tla go go bolelela.”

₁₆Ya re yoo a sa ntse a bua, ga ba ga tla yo mongwe, a re: “Molelo wa Modimo o ole kwa legodimong, mme o laitse dinku, wa di nyeletsa le batlhanka; go falotse nna ke le nosi fela ke tla go go bolelela.”

₁₇Ya re yoo a sa ntse a bua, ga ba ga tla yo mongwe a re: “Bakalatea ba ne ba itira ditlhopha di le tharo, ba tlhasela dikamela, ba di gapa, ee, ba bile ba bolaile batlhanka ka bogale jwa tšhaka, go falotse nna ke le nosi ke tla go go bolelela.”

₁₈E rile yoo a sa ntse a bua, ga ba ga tla yo mongwe a re: “Bomorwao le bomorwadio ba ne ba ja ba nwa bojalwa jwa mofine mo ntlong ya mogoloa bone; ₁₉mme bona, ga tswa sefefo se segolo kwa nageng, sa itaya dikgokgotsho tsa ntlo tsoo nne, mme ya wela makau, mme a sule; go falotse nna ke le nosi fela ke tla go go bolelela.”

₂₀Foo Jobe a nanoga, a ikgagola kobo, a ipeola tlhogo, a wela fa fatshe, a obama; ₂₁mme a re:

₂₂Mo go tsotlhe tse Jobe ga a ka a leofa, le fa e le go kaya Modimo boatla.