JOHANE 6

₁E rile morago ga dilo tse, Jesu a tsamaya a tshelela kwa moseja ga lewatle la Galilea, le e leng lewatle la Tiberia. ₂Bontsi jo bogolo jwa batho jwa mo latela, ka ba bonye ditshupo tse o di dirileng mo go ba ba lwalang. ₃Mme Jesu a tlhatlogela mo thabeng, a dula gone le barutwa ba gagwe. ₄Jaana Tlolaganyo, modiro wa Bajuta, ya bo e le gaufi. ₅Foo ka Jesu a tsholetsa matlho, a bona fa bontsi jo bogolo jwa batho bo tla mo go ene, a raya Filipo a re: “Re tlaa reka kae dinkgwe, gore batho ba, ba je?” ₆Mo a go bua go mo leka, gonne ene ka esi o na a itse se o tlaa se dirang.

₇Filipo a mo fetola a re: “Dinkgwe tse di ka rekwang ka diponto di le 20 ga di ka ke tsa ba lekana, le fa mongwe le mongwe a fiwa go le gobotlana.”

₈Mongwe wa barutwa ba gagwe, e bong Anterea, mogoloa Simone Petere, a mo raya a re: ₉“Go na le mosimane fa, yo o tshotseng dinkgwe di le tlhano tsa barele, le ditlhapi di le pedi; mme tseo e tlaa bo e le eng mo bontsing jo bo kanakana?”

₁₀Jesu a re: “Rayang batho ba dule fa fatshe.” Jaana bojang bo ne bo le bogolo gone foo. Batho ba dula fa fatshe, palo ya bone e ka ne e le 5 000. ₁₁Foo Jesu a tsaya dinkgwe; ya re a sena go leboga, a di abela batho ba ba dutseng; le tsone ditlhapi a di dira jalo, ka fa ba ratang ka teng. ₁₂Mme ya re ba sena go kgora, a raya barutwa ba gagwe a re: “Selang dikabetla tse di setseng, gore go se ka ga latlhega sepe.” ₁₃Ba di sela, ba tlatsa diroto di le 12 ka dikabetla tsa dinkgwe tsa barele tse di siilweng ke ba ba jeleng.

₁₄E rile batho ba bona sesupo se o se dirileng, ba re: “Ammaaruri, yo, ke ene moperofeti yo o tlang mo lefatsheng.” ₁₅Mme Jesu, ka a lemoga fa ba tlaa tloga ba tla go mo tsaya ka thata go mo dira kgosi, a ngongwaelela kwa thabeng a le esi.

₁₆E rile go le maabanyane, barutwa ba gagwe ba fologela kwa lewatleng; ₁₇ba tsena mo mokorong, ba tshela lewatle ba ya Kaperenaume. Ga bo go setse go le lefifi jaanong, Jesu a bo a ise a tle kwa go bone. ₁₈Lewatle la bo le rwalelesega ka ntlha ya phefo e kgolo e e fokang. ₁₉Ke gone e rileng ba sena go tsamaisa mokoro sebaka sa dikilometara di magareng a botlhano le borataro, ba bona Jesu a tsamaya mo godimo ga lewatle, a atamela fa mokorong; mme ba boifa. ₂₀Mme a ba raya a re: “Ke nna; se boifeng.” ₂₁Foo ba itumela go mo tsholela mo mokorong; mokoro wa akofa wa tshwara lefatshe le ba yang kwa go lone.

₂₂Ya re ka moso bontsi jo bo emeng kwa moseja ga lewatle ba fitlhela fa go se na mokoro ope o sele teng, fa e se o le mongwe fela, mme ba itse fa Jesu a se ka a tsena mo mokorong le barutwa ba gagwe, barutwa ba gagwe ba ne ba tsamaile ba le bosi fela. ₂₃Le fa go ntse jalo ga tla mekoro mengwe e tswa kwa Tiberia, kwa gaufi le felo fa ba jetseng senkgwe teng, Morena a sena go leboga. ₂₄Ke gone, e rile batho ba bantsi ba fitlhela fa Jesu a seyo teng, le fa e le barutwa ba gagwe, le bao ka bosi ba tsena mo mekorong, ba ya go fitlha kwa Kaperenaume, ba batla Jesu.

₂₅Mme ya re ba mmona kwa moseja ga lewatle, ba mo raya ba re: “Rabi, o tsile leng kwano?”

₂₆Jesu a ba fetola a re: “Ammaaruri, ammaaruri, ke a lo raya, lo a mpatla, e seng ka gobo lo bonye ditshupo, mme e le ka gobo lo jele dinkgwe, lwa kgora. ₂₇Se direleng dijo tse di nyelelang, direlang dijo tse di nnelang go ya go fitlha botshelong jo bo sa khutleng, tse Morwa Motho o tlaa di lo nayang; gonne ke ene yo Rara, e bong Modimo, o mmeileng lotshwao.”

₂₈Foo ba mo raya ba re: “Re na le go dirang, gore re dire ditiro tsa Modimo?”

₂₉Jesu a ba fetola a re: “Tiro ya Modimo ke e, gore lo dumele mo go ene yo o mo romileng.”

₃₀Foo ba mo raya ba re: “O dirang fela se e leng sesupo, gore re bone, re be re dumele mo go wena? O dirang? ₃₁Borraetsho ba ne ba ja mana mo nageng; jaaka go kwadilwe ga twe: ‘O ba neile senkgwe se se tswang legodimong go se ja.’ ”

₃₂Foo Jesu a ba fetola a re: “Ammaaruri, ammaaruri, ke a lo raya, e ne e se Moše yo o lo neileng senkgwe se se tswang legodimong; mme Rre o lo naya senkgwe sa ammaaruri se se tswang legodimong; ₃₃gonne senkgwe sa Modimo ke se se fologang se tswa legodimong, mme se naya lefatshe botshelo.”

₃₄Foo ba mo raya ba re: “Morena, re neye senkgwe seo ka metlha yotlhe.”

₃₅Jesu a ba raya a re: “Ke nna senkgwe sa botshelo; yo o tlang mo go nna, ga a ketla a bolawa ke tlala, le yo o dumelang mo go nna, ga a ketla a nyorwa gope. ₃₆Ke lo reile ka re, lo mponye, le fa go ntse jalo ga lo dumele. ₃₇Botlhe ba Rara o ba nnayang ba tlaa tla mo go nna; mme yo o tlang mo go nna, ga nketla ke mo kgoromeletsa ntle gope. ₃₈Gonne ke fologile kwa legodimong, ke sa tle go dira go rata ga me, fa e se go rata ga yo o nthomileng. ₃₉Go rata ga yo o nthomileng, ke gore, gotlhe mo o go nneileng ke se ka ka latlhegelwa ke sepe, fa e se gore ke tle ke se tsose mo letsatsing la bofelo. ₄₀Gonne go rata ga Rre ke mo, gore mongwe le mongwe yo o bonang Morwa Modimo, a mo dumela, a bone botshelo jo bo sa khutleng; mme ke tlaa mo tsosa mo letsatsing la bofelo.”

₄₁Foo Bajuta ba ngongorega ka ga gagwe, ka gobo a rile: “Ke nna senkgwe se se fologileng se tswa legodimong.” ₄₂Ba re: “Yo, a ga se Jesu morwa Josefe, yo borraagwe le mmaagwe re ba itseng? O bua jang gompieno, a re: ‘Ke fologile ke tswa legodimong’?”

₄₃Jesu a ba fetola a re: “Se ngongoregeng mo go lona. ₄₄Ga go motho ope yo o ka tlang mo go nna, fa Rara yo o nthomileng a sa mo goge, mme ke tlaa mo tsosa mo letsatsing la bofelo. ₄₅Go kwadilwe mo baperofeting ga twe: ‘Ba tlaa rutwa ke Modimo botlhe fela.’ Mongwe le mongwe yo o utlwileng mo go Rara, mme a ithutile, o tla mo go nna. ₄₆Ga se gore mongwe o kile a bona Rara, fa e se yo o tswang kwa Modimong, ke ene yo o bonyeng Rara. ₄₇Ammaaruri, ammaaruri, ke a lo raya: Yo o dumelang mo go nna o na le botshelo jo bo sa khutleng. ₄₈Ke nna senkgwe sa botshelo. ₄₉Borraeno ba kile ba ja mana mo nageng, mme ba sule. ₅₀Se ke sone senkgwe se se fologang se tswa legodimong, gore motho a se je, mme a se ka a swa. ₅₁Ke nna senkgwe se se tshedileng se se fologileng se tswa legodimong; fa motho le fa e le mang a ja senkgwe se, o tlaa tshela ka bosakhutleng; ee, le gone senkgwe se ke tlaa se ntshang ke nama ya me, gore e nne botshelo jwa lefatshe.”

₅₂Foo Bajuta ba nna kgang ba re: “Ana motho yo, o ka re naya nama ya gagwe jang go e ja?”

₅₃Foo Jesu a ba raya a re: “Ammaaruri, ammaaruri, ke a lo raya, fa lo sa je nama ya Morwa Motho, fa lo sa nwe madi a gagwe, ga go na botshelo mo go lona. ₅₄Yo o jang nama ya me, a ba a a nwa madi a me, o na le botshelo jo bo sa khutleng; mme ke tlaa mo tsosa mo letsatsing la bofelo. ₅₅Gonne nama ya me ke sejo ruri, le madi a me ke seno ruri. ₅₆Yo o jang nama ya me, a ba a a nwa madi a me, o ntse mo go nna, le nna mo go ene. ₅₇Jaaka Rara yo o tshedileng a nthomile, mme ke tshela ka ntlha ya ga Rara; jalo le ene yo o njang, o tlaa tshela ka ntlha ya me. ₅₈Se ke sone senkgwe se se fologileng se tswa legodimong, ga se mo go etsang jaaka borara ba kile ba ja, mme ba sule; yo o jang senkgwe se, o tlaa tshela ka bosakhutleng.”

₅₉Dilo tse a di bua mo ntlong ya thuto, ka a ruta mo Kaperenaume.

₆₀Barutwa ba gagwe ba le bantsi, ba re ba utlwa jalo, ba re: “Lefoko le ke lefoko le le thata; e mang yo o ka le utlwang?”

₆₁Mme Jesu, ka a itse ka esi fa barutwa ba gagwe ba ngongoregetse mo, a ba raya a re: “A golo mo go a lo kgopisa? ₆₂Ana lo ne lo tlaa reng fa lo bona Morwa Motho a tlhatlogela kwa o ne a le teng pele? ₆₃Mowa ke one o rudisang; nama ga e thuse sepe; mafoko a ke a buileng le lona, ke one a a leng mowa, e bile a botshelo. ₆₄Mme go na le bangwe ba lona ba ba sa dumeleng.” Gonne Jesu o ne a itse, le ka tshimologo, ba e leng bone ba ba sa dumeleng, le yo o tlaa mo okang. ₆₅Mme a re: “Ke gone ke lo reileng ka re, ga go motho ope yo o ka tlang mo go nna, fa a se ka a go newa ke Rara.”

₆₆Ya re ka moo barutwa ba gagwe ba le bantsi ba tenega, ba se ka ba tlhola ba tsamaya nae. ₆₇Ke gone Jesu a raya ba ba 12 a re: “A le lona lo rata go tsamaya?”

₆₈Simone Petere a mo raya a re: “Morena, ana re ka ya kwa go mang? Wena o na le mafoko a botshelo jo bo sa khutleng. ₆₉Re dumetse, re bile re a itse fa e le wena Moitshepi wa Modimo.”

₇₀Jesu a ba fetola a re: “A ga ke a lo itshenkela, lona ba ba 12, mme mongwe wa lona ke diabolo?” ₇₁Mme a bo a bua ka ga Jutase morwa Simone Isekariote, gonne e le ene yo o tlaa mo okang, e le mongwe wa ba 12.