JOHANE 3

₁Jaana ga bo go le motho wa Bafarisai go twe Nikotemo, molaodi mongwe wa Bajuta. ₂A tla kwa go Jesu go le bosigo, a mo raya a re: “Rabi, re a itse fa o le moruti yo o tswang kwa Modimong, gonne ga go motho ope yo o ka dirang ditshupo tse o di dirang fa Modimo o se na nae.”

₃Jesu a mo fetola a re: “Ammaaruri, ammaaruri ke a go raya, fa motho a sa tsalwe seša, ga a ka ke a bona bogosi jwa Modimo.”

₄Nikotemo a mo raya a re: “Motho o ka tsalwa jang a tsofetse? A o ka ba a tsena lwa bobedi mo sebopelong sa ga mmaagwe, mme a tsalwa?”

₅Jesu a mo fetola a re: “Ammaaruri, ammaaruri, ke a go raya, fa motho a sa tsalwe ka metsi le Mowa, ga a ka ke a tsena mo bogosing jwa Modimo. ₆Se se tsetsweng ke nama ke nama; mme se se tsetsweng ke Mowa ke mowa. ₇O se gakgamale ka gobo ke go reile ka re, lo na le go tsalwa seša. ₈Phefo e fokela kwa e go ratang, mme o utlwa go suma ga yone, mme ga o itse kwa e tswang le kwa e yang teng; mme mongwe le mongwe yo o tsetsweng ke Mowa o ntse jalo.”

₉Nikotemo a mo fetola a re: “Dilo tse di ka nna jalo jang?”

₁₀Jesu a mo fetola a re: “A o moruti wa Iseraele, mme o sa tlhaloganye dilo tse? ₁₁Ammaaruri, ammaaruri, ke a go raya, rona re bua se re se itseng, re supa se re se bonyeng; mme lona ga lo tshole tshupo ya rona. ₁₂Fa ke lo bolelela dilo tsa selefatshe lo sa dumele, lo tlaa dumela jang, fa ke lo bolelela dilo tsa selegodimo? ₁₃Ga go a tlhatlogela ope kwa legodimong, fa e se ene yo o fologileng kwa legodimong, e bong Morwa Motho yo o kwa legodimong.

₁₄“Mme jaaka Moše a kile a tlhatlosa noga kwa gare ga naga, Morwa Motho o na le go tlhatlosiwa fela jalo; ₁₅gore le fa e le mang yo o dumelang a bone botshelo jo bo sa khutleng mo go ene. ₁₆Gonne Modimo o ratile lefatshe mo go kalokalo, wa ntsha Morwa one yo o tsetsweng a le esi, gore le fa e le mang yo o dumelang mo go ene a se ka a nyelela, mme a bone botshelo jo bo sa khutleng. ₁₇Gonne Modimo ga o a ka wa roma Morwa one mo lefatsheng go sekisa lefatshe, mme e le gore lefatshe le bolokwe ka ene.

₁₈“Yo o dumelang mo go ene ga a sekisiwe; yo o sa dumeleng o sekisitswe le gompieno, ka a se ka a dumela mo ineng la Morwa Modimo yo o tsetsweng a le esi. ₁₉Tshekiso ke e, gore lesedi le tsile mo lefatsheng, mme batho ba ratile lefifi bogolo go lesedi; gonne ditiro tsa bone di ne di le bosula. ₂₀Gonne mongwe le mongwe yo o dirang bosula o ila lesedi, o a ba a sa tle leseding, e tle e re kgotsa ditiro tsa gagwe di kgalemelwe. ₂₁Yo o dirang boammaaruri o tla leseding, gore ditiro tsa gagwe di senolwe, fa di dirilwe mo Modimong.”

₂₂E rile morago ga dilo tse, Jesu a tla mo lefatsheng la Jutea, a na le barutwa ba gagwe; mme a diega nabo gone a kolobetsa. ₂₃Johane le ene a bo a kolobetsa mo Ainone, gaufi le Salime, gonne metsi a ne a le magolo teng; mme ba tla ba kolobediwa, ₂₄gonne Johane o ne a ise a tsenngwe mo ntlong ya kgolegelo.

₂₅Ke gone ka moo potso e ne ya tsoga, barutwa ba ga Johane ba botsanya le Mojuta mongwe ka ga bontlafatso. ₂₆Mme ba ya kwa go Johane, ba mo raya ba re: “Rabi, yo o ne o na nae kwa moseja ga Joretane, yo o supileng ka ga gagwe, bona o a kolobetsa, mme batho botlhe ba ya kwa go ene.”

₂₇Johane a ba fetola a re: “Motho ga a ka ke a amogela sepe, fa a se ka a se newa se tswa kwa legodimong. ₂₈Le lona ka losi lo basupi ba me, fa ke rile, ga ke Keresete, fa e se gore ke romilwe pele ga gagwe fela. ₂₉Yo o nang le monyadwi ke monyadi; mme tsala ya monyadi, yo o emeng a mo utlwa, o itumelela lentswe la monyadi thata; ke gone boitumelo jo jwa me bo diretse. ₃₀Ene o na le go gola, mme nna ke na le go ngotlafala.

₃₁“Yo o tswang kwa godimo o godimo ga botlhe; yo o leng wa lefatshe ke wa lefatshe, o bua ga lefatshe; yo o tswang legodimong o godimo ga botlhe. ₃₂Se o se bonyeng a se utlwa, ke sone se o se supang; ga go ope yo o amogelang tshupo ya gagwe. ₃₃Yo o amogetseng tshupo ya gagwe, o ikwadile a baya sekano sa gagwe sa gore, Modimo o boammaaruri. ₃₄Gonne yo Modimo o mo romileng o bua mafoko a Modimo; gonne ga o abe Mowa ka selekanyo. ₃₅Rara o rata Morwa, mme o tsentse dilo tsotlhe mo seatleng sa gagwe. ₃₆Yo o dumelang mo go Morwa Modimo o na le botshelo jo bo sa khutleng, mme yo o ganang go utlwa Morwa Modimo, ga a ketla a bona botshelo, mme bogale jwa Modimo bo ntse mo go ene.”