JOHANE 21

₁E rile morago ga dilo tse, Jesu a ba a ipontsha barutwa ba gagwe gape kwa lewatleng la Tiberia, mme a iponatsa ka mokgwa o o ntseng jaana: ₂Ga bo go le mmogo Simone Petere, Thomase yo o bidiwang Didimo, le Nathanaele wa Kana wa Galilea, le bomorwa Sebete, le barutwa ba gagwe ba bangwe ba le babedi. ₃Simone Petere a ba raya a re: “Ke ya go tshwara ditlhapi.” Ba mo raya ba re: “Le rona re ya nao.” Ba bolola ba tsena mo mokorong; mme ba se ka ba lala ba tshwere sepe sigong joo. ₄Ya re bosigo boo sa, Jesu a ema fa mošaweng; le fa go ntse jalo barutwa ba bo ba sa itse fa e le Jesu. ₅Foo Jesu a ba raya a re: “Bana, a lo na le sengwe se se jewang?” Ba mo fetola ba re: “Nnyaa.”

₆A ba raya a re: “Digelang lotloa ka fa ntlheng ya letsogo le legolo ga mokoro, mme lo tlaa tshwara.” Foo ba lo digela, mme ba retelelwa ke go lo goga ka ntlha ya bontsi jwa ditlhapi.

₇Foo morutwa yo Jesu o mo ratang, a raya Petere a re: “Ke Morena.” Ya re Petere a utlwa fa e le Morena, a ikgatlhelela kobo ya gagwe, gonne o ne a sa apara sepe, mme a ithabuetsa mo lewatleng. ₈Barutwa ba bangwe ba tla ka mokorwana, gonne ba ne ba se kgakala le lefatshe, e ka ne e le sebaka sa mabogo a 200, boo ba tla ba goga lotloa lo tletse ditlhapi. ₉Jalo ya re ba tswela fa lefatsheng, ba bona molelo o o magala teng, o na le ditlhapi di besitswe mo go one, le senkgwe. ₁₀Jesu a ba raya a re: “Lereng ditlhapi dingwe tsa tse lo di tshwereng gompieno.”

₁₁Foo Simone Petere a pagama, a gogela lotloa kwa lefatsheng, lo tletse ditlhapi tse ditona, di le 153; mme le fa di le bontsi jo bo kalo, lotloa ga lo a ka lwa kgaoga. ₁₂Jesu a ba raya a re: “Tlang lo fitlhole.” Mme go se ka ga dira le ope wa barutwa yo o ka lekang go mmotsa go re: “O mang?” ka ba itse fa e le Morena. ₁₃Jesu a fitlha a tsaya senkgwe, a se ba naya le tsone ditlhapi jalo.

₁₄Ya bo e le lone lwa boraro fa Jesu a ipontsha barutwa, a sena go tsoga mo baswing.

₁₅Jalo e rile ba sena go fitlhola, Jesu a raya Simone Petere a re: “Simone, morwa Johane, a o a nthata bogolo go ba?” A mo raya a re: “Ee, Morena; o a itse fa ke go rata.” A mo raya a re: “Fudisa dikwanyana tsa me.” ₁₆A ba a mo raya gape lwa bobedi a re: “Simone, morwa Johane, a o a nthata?” A mo raya a re: “Ee, Morena o a itse fa ke go rata.” A mo raya a re: “Disa dinku tsa me.” ₁₇A mo raya lwa boraro a re: “Simone, morwa Johane, a o a nthata?” Petere a hutsafala ka gobo a mo reile lwa boraro a re: “A o a nthata?” Mme a mo raya a re: “Morena, o itse dilo tsotlhe; o itse fa ke go rata.” Jesu a mo raya a re: “Fudisa dinku tsa me. ₁₈Ammaaruri, ammaaruri, ke a go raya, e rile o sa le lekau, wa nna wa itlama fela, wa itsamaela kwa o go ratang; mme o tlaa re o tsofetse, o tlaa otlolola mabogo, mme o sele o tlaa go tlama, a go isa kwa o sa go rateng.” ₁₉Mme jaana, golo mo, a go bua, a kaya loso lo o tlaa galaletsang Modimo ka lone, ka fa lo tlaa nnang ka gone. Mme ya re a sena go bua jalo, a mo raya a re: “Ntshala morago.”

₂₀Petere a retologa, a bona morutwa yo Jesu o mo ratang a ba setse morago; e bong ene yo o neng a ikaega mo sehubeng sa gagwe, jale ka go jewa selalelo, a ba a bua a re: “Morena yo o go okang e mang?” ₂₁Petere ya re a mmona a raya Jesu a re: “Morena, mme motho yo, o tlaa dirang?” ₂₂Jesu a mo raya a re: “Fa ke rata a diega go tle go tsamaye ke tle, e be e le eng go wena? Wena o ntshale morago fela.” ₂₃Polelo eo ya anamela mo bakaulengweng, gore morutwa yoo, ga a ketla a swa; le fa go ntse jalo Jesu ga a ka a re ga a ketla a swa; fa e se go re: “Fa ke rata a diega go tle go tsamaye ke tle, e be e le eng go wena?” ₂₄Yo, ke ene morutwa yo o supang dilo tse, a ba a kwala dilo tse; mme re a itse fa tshupo ya gagwe e le ammaaruri.

₂₅Go bile go na le dilo di le dintsi di sele tse Jesu o di dirileng, tse e ka reng fa di ne di ka kwalwa tsotlhe, ke a gopola gore le e leng lefatshe le ne le sa ka ke la bonela dikwalo tse di neng di ka kwalwa sebaka sa go di tshola.