1Foo Pilato a tsaya Jesu, a mo seola. 2Mme batlhanka ba loga serwalo sa mitlwa, ba se mo rwesa mo tlhogong, ba mo apesa kobo e e bohibidu jo bo mokgona. 3Ba tla fa go ene ba re: “Dumela Kgosi ya Bajuta!” Mme ba mo gatla ka dithobane.
4Mme Pilato a ba a tswa gape, a ba raya a re: “Bonang, ke mo ntshetsa kwano go lona, gore lo itse fa ke sa bone molato ope mo go ene.” 5Foo Jesu a tswa, a rwele serwalo sa mitlwa, a apere kobo e e bohibidu jo bo mokgona. Mme Pilato a ba raya a re: “Bonang, monna ke yo!”
6E rile ditlhogo tsa baperesiti le maotlana ba mmona, ba goa ka thata ba re: “Mmapole, mmapole!” Pilato a ba raya a re: “Mo itseeleng, lo mmapole, gonne nna ga ke bone molato ope mo go ene.”
7Bajuta ba mo fetola ba re: “Re na le molao, mme ka fa molaong oo, o tshwanetse go swa, ka gobo a itirile Morwa Modimo.”
8Ya re Pilato a utlwa lefoko leo, a boifa bogolo; 9a ba a tsena mo ntlong ya tshekelo gape, a raya Jesu a re: “O tswa kae?” mme Jesu ga a a ka a mo fetola. 10Foo Pilato a mo raya a re: “A ga o bue le nna? A ga o itse fa ke na le thata ya go go golola, ke bile ke na le thata ya go go bapola?”
11Jesu a mo fetola a re: “O ka bo o se na thata epe mo go nna, fa o ne o sa e newa e tswa kwa godimo; ke gone yo o ntsentseng mo seatleng sa gago o na le boleo bogolo.”
12Foo Pilato a senka go mo golola, mme Bajuta ba goa ka thata, ba re: “Fa o golola monna yo, ga o tsala ya ga Kaesare; mongwe le mongwe yo o itirang kgosi o tlhabana le Kaesare.”
13E rile Pilato a utlwa mafoko a, a ntshetsa Jesu kwa ntle, mme a dula mo setulong sa tshekelo, mo felong fa go tweng, Bophaphato jwa Matlapa, mme mo puong ja Sehebere, go twe Gabatha. 14Ya bo e le Iketleetso ya Tlolaganyo; e le nako ya sethoboloko. Mme a raya Bajuta a re: “Bonang kgosi ya lona!”
15Foo ba goa ka thata ba re: “A a ye koo, a a ye koo, mmapole!” Pilato a ba raya a re: “A ke tlaa bapola kgosi ya lona?” Ditlhogo tsa baperesiti tsa mo fetola tsa re: “Ga re na kgosi epe fa e se Kaesare.”
16Foo a mo ba neela gore a bapolwe.
Papolo ya ga Jesu
17Foo ba tsaya Jesu, mme a tswela kwa ntle, a itshikaretse mokgoro, a ya felong fa go bidiwang, “Felo ga logata”, ka Sehebere, ga twe: Golegotha. 18Ba mmapolela teng le ba bangwe ba le babedi nae, mongwe a le ka fa ntlheng nngwe, yo mongwe a le ka fa ntlheng e nngwe ya gagwe, Jesu a le fa gare. 19Le gone Pilato a kwala lokwalo, a lo baya mo mokgorong. Mme ga bo go kwadilwe, go twe: “JESU WA NASARETHA KGOSI YA BAJUTA.” 20Foo Bajuta ba le bantsi ba bala lokwalo lo, gonne felo fa Jesu o bapoletsweng teng go ne go le gaufi le motse, mme ga bo go kwadilwe ka Sehebere, le Seroma, le Segerika. 21Foo ditlhogo tsa baperesiti ba Bajuta tsa raya Pilato tsa re: “Se kwale go re: ‘Kgosi ya Bajuta’, mme o re: ‘Ene o rile: Ke kgosi ya Bajuta’.”
22Pilato a ba fetola a re: “Se ke se kwadileng ke se kwadile.”
23Foo batlhabani e rile ba sena go bapola Jesu, ba tsaya diaparo tsa gagwe, ba di kgaoganya sene, motlhabani mongwe le mongwe a bona go le gongwe, le hempe ya gagwe jalo; hempe yone ya bo e se na moroko, e logilwe gotlhe fela. 24Foo ba raana ba re: “A re se e gagole, a re e laoleng ka bola, gore re bone bo e tlaa nna ya ga mang.” E ne e le gore lokwalo lo dirafale, lo lo reng: “Diaparo tsa me ba di kgaogana, hempe ya me ba e laola ka bola.” Ke gone batlhabani ba dira dilo tse jalo.
25Fa mokgorong wa ga Jesu ga bo go eme mmaagwe, le monnaa mmaagwe, e bong Maria mogatsa Keleopase, le Maria Magetalene. 26Ya re Jesu a bona mmaagwe, le morutwa yo o mo ratang a eme teng, a raya mmaagwe a re: “Mosadi bona morwao!”
27Foo a raya morutwa yoo a re: “Bona mmaago!” Mme e sa le ka lobaka loo morutwa yoo a mo tshola, a ya go nna kwa ga gagwe.
Loso lwa ga Jesu
28Morago ga moo, ka Jesu a itse fa jaanong dilo tsotlhe di setse di weditswe, mme gore lokwalo lo dirafale, a re: “Ke nyorilwe.”
29Mme ga bo go beilwe teng nkgwana e tletse bojalwa jo bo botšarara; foo ba ina ngami mo botšarareng, ba e tlhomela ka thupa ya mosiama, ba e isa kwa molomong wa gagwe. 30Ya re Jesu a sena go amogela botšarara, a re: “Go weditswe!” mme a oba tlhogo, a neela mowa.
Jesu o tlhajwa letlhakore
31Mme e re ka e le lobaka lwa Iketleetso, Bajuta ba lopa Pilato gore maoto a bone a rojwe, mme ba tlosiwe, gore ditoto tsa bone di se ka tsa nna mo mekgorong ka Sabata, gonne letsatsi leo la Sabata e ne e le letsatsi le legolo. 32Foo batlhabani ba fitlha ba roba maoto a wa ntlha, le a yo mongwe, yo o bapotsweng nae; 33mme ba re ba tla mo go Jesu, ba fitlhela a setse a sule, ba se ka ba mo roba maoto. 34Le fa go ntse jalo mongwe wa batlhabani a tlhaba lotlhakore lwa gagwe ka lerumo, mme ka bonako ga tswa madi le metsi. 35Mme yo o bonyeng o supile, mme tshupo ya gagwe e ammaaruri; o bile o itse fa a bolelela ruri, gore le lona lo dumele. 36Gonne dilo tse di diretse, gore lokwalo lo dirale lo lo reng: “Ga go ketla go rojwa lesapo lepe la gagwe.” 37Gape lokwalo lo longwe lwa re: “Ba tlaa leba ene yo ba mo tlhabileng.”
Phitlho ya ga Jesu
38Morago ga dilo tse, Josefe wa Arimathea, e le morutwa wa ga Jesu, mme a itobile ka go boifa Bajuta, a lopa Pilato gore a mo lese a tlose setoto sa ga Jesu; mme Pilato a mo dumelela. Foo a tlosa setoto sa gagwe. 39Ga ba ga tla Nikotemo le ene, yo e rileng pele a ya kwa go ene go le bosigo, a tla a tshotse tao ya mura e tlhakanye le mokgopha, e ka ne e le bokete jwa dikilokerame di le 30. 40Jalo ba tsaya setoto sa ga Jesu, ba se phuthela mo letseleng la leloba, le ka malao jaaka e le tlwaelo ya phitlho ya Bajuta. 41Jaana ga bo go le tshimo felong fa o bapoletsweng teng; mme mo tshimong eo ga bo go le phupu e ntšha, e go iseng go ke go bewe ope mo go yone. 42Ya re ka phupu e le fa gaufi, ba baya Jesu mo go yone, ka ntlha ya gobo e le lobaka lwa Iketleetso ya Bajuta.
