JEREMIA 6

₁“Tshabelang polokegong, lona bana ba Benjamine, lo tswe mo gare ga Jerusalema, letsang lonaka mo Tekoa, lo tlhome sekao mo Bethe-hakereme; gonne bosula bo kokomoga ntlheng ya botsheka, le thubakanyo e kgolo. ₂Yo montle le yo o tlekeetso, e bong morwadia Sione, ke tlaa mo kgaola. ₃Badisa ba tlaa tla kwa go ene ba na le matsomane a bone; ba tlaa tlhoma megope ya bone tikologong ya gagwe; mongwe le mongwe o tlaa fudisa felong ga gagwe.” ₄“Mmaakanyetseng dira; nanogang, re bololeng motshegare. Ija! A bo go latlhega rona! Gonne letsatsi le fefile, gonne meriti ya maitsebowa e lelafetse! ₅Nanogang, re bololeng bosigo, re senyeng matlo a dikgosi a teng.”

₆Gonne go bua jaana Jehofa wa masomosomo, a re: “Remang ditlhare, lo koele Jerusalema lomota; ke one motse wa go sekisiwa; go patiko fela mo go one. ₇Jaaka sediba se tle se bilole metsi a sone, le one motse o bilola boikepo jwa one jalo; thubakanyo le thopo di utlwala mo go one; go bolwetse le dintho fa pele ga me ka gale le ka gale. ₈A ko o rutege wena Jerusalema, ka mowa wa me o ka tla wa go tenegelela ruri; nka tla ka go dira tshwafalo, le lefatshe le le sa nnweng.”

₉O bua jaana Jehofa wa masomosomo, a re: “Ba tlaa buduletsa ruri masalela a Iseraele jaaka mofine; ba o busetse seatla sa gago mo dikalaneng jaaka mohudi wa mafine.”

₁₀Ke tlaa bua le mang ke supa, gore ba tle ba utlwe? Bonang, ditsebe tsa bone ga di a rupisiwa, mme ga ba kake ba reetsa; bonang, lefoko la ga Jehofa mo go bone le fetogile kgobo; ga ba na kgatlhego epe mo go lone. ₁₁Ke gone ke tletseng tšarologo ya ga Jehofa; ke lapisitswe ke go ithiba: “E goromeletse gongwe mo banyaneng mo mmileng, le mo kokoanong ya makau, gonne le e leng monna le mosadi wa gagwe ba tlaa tshwarwa, le motsofe a na le yo o malatsi a a tletseng. ₁₂Matlo a bone a tlaa faposiwa a nna a ba sele, maota a bone le basadi ba bone mmogo; gonne ke tlaa otlololela banni ba lefatshe letsogo la me,” go bua Jehofa. ₁₃“Gonne go simolola ka yo mmotlana go ya kwa go yo mogolo mo go bone, mongwe le mongwe o ineetse mo bopelotshetlheng; mme go simolola ka moperofeti go ya moperesiting, mongwe le mongwe o dira ka go ferekana fela. ₁₄Ba bile ba fodisitse thobego ya batho ba me go le gonnye fela, ba re: ‘Kagiso, kagiso;’ le mororo go se na kagiso. ₁₅A e rile ba sena go dira makgapha, a ba kile ba tlhajwa ke ditlhong? Nnyaa, ba ne ba sa tlhajwe ke ditlhong gope, le gone ba ne ba sa kake ba thunya. Ke gone ka moo ba tlaa wa mmogo le ba ba wang; mogang ke ba sekisang ba tlaa digelwa fa fatshe,” go bua Jehofa.

₁₆Go bua jaana Jehofa, a re: “Emang mo ditseleng, mme lo bone, lo botse ka ga ditselana tsa bogologolo, kwa tsela e e molemo e teng, mme lo sepele mo go yone, mme lo tlaa bonela mewa ya lona boikhutso; mme ba re: ‘Re gana go sepela mo go yone.’ ₁₇Ka lo beela balebedi; ka re: ‘Reetsang modumo wa lonaka;’ mme ba re: ‘Re gana go reetsa.’

₁₈“Ke gone utlwang, lona merafe, mme lo itse, lona phuthego, se se mo go lona. ₁₉Utlwa, wena lefatshe; bona, ke tlaa lere bosula mo bathong ba, e bong loungo lwa megopolo ya bone, ka ba se ka ba reetsa mafoko a me; le one molao wa me ba o ganne. ₂₀Ana ke tlelwa ke maswalo a lebano a a tswang kwa Sheba ka ntlha yang, le nyoba e e tswang lefatsheng le le kgakala? Ditshupelo tsa lona tse di fisiwang ga di lebosege, le ditlhabelo tsa lona ga di nkgatlhe.” ₂₁Ke gone ka moo Jehofa o bua jaana, a re: “Bonang ke tlaa baya dikgopi fa pele ga tšhaba e; mme borra bana le bomorwaa bone ba tlaa kgotswa mmogo ke tsone; oo rra motho le tsala ya gagwe ba tlaa nyelela.”

₂₂Jehofa o bua jaana, a re: “Bonang, go tla tšhaba nngwe e tswa lefatsheng la botsheka; le morafe mongwe o mogolo o tlaa tlhotlhelediwa o tswa dikhutlong tsa bofelofelo tsa lefatshe. ₂₃Ke ba ba tsholang bora le lerumo; ke ba ba bolalome, ga ba itse go utlwela botlhoko; kodu ya bone e suma jaaka lewatle, mme ba palame dipitse; mongwe le mongwe o go tlhomeletse, wena morwadia Sione, jaaka monna yo o tlhomeletseng tlhabano.”

₂₄Re utlwile tumedi ya gone; diatla tsa rona di a koafala; tlalelo e e mahehe e re tshwere, le metlotsedi e e ntseng jaaka ya mosadi fa a le mo pelegong. ₂₅Se tsweleng kwa masimong, se tsamayeng mo tseleng; gonne tšhaka ya mmaba e teng, le theregiso ka ntlha tsotlhe.

₂₆Wena morwadia tšhaba ya me, itlame ka letsela la kgetse, o ipidikamise mo meloreng; o itirele khutsafalo, jaaka e ka bo e le morwao yo o esi, e bong go gogotlega mo go botlhoko thata; gonne mothopi o tlaa re wela ka tshoganetso. ₂₇“Ke go dirile kago e e godileng le kago e e thata ya phemelo mo bathong ba me; gore o tle o itse o ba o leka tsela ya bone. ₂₈Botlhe fela ke dirukutlhi tse di utlwisang botlhoko, ba kgarakgatshega ka ditlabeletso; ba ntse kgotlho le tshipi; botlhe fela ba dira mo go bodileng. ₂₉Mouba o tle o ubele ka thata; lotwe o jelwe ke molelo; ba tswelelela pele lefela go itshekisa; gonne baikepi ga ba khumolelwe koo. ₃₀Batho ba tlaa ba bitsa manyelo a selefera, ka Jehofa a ba ganne.”