JEREMIA 51

₁Jehofa o bua jaana, a re: “Bonang, ke tlaa tsosa phefo e e senyang, ke e tsosetsa Babilone le ba ba agileng mo Lebe-kamai.

₂“Ke tlaa roma baolosi kwa Babilone, ba ba tlaa mo olosang; ba tlaa leafatsa lefatshe la gagwe, gonne mo motlheng wa pitlagano ba tlaa mo tlhasela mo tikologong. ₃A mohudi ka bora a laele bora jwa gagwe, a a hule yo o hulang ka bora, a a be a hule yo o itsosang a le mo meitshomelong ya gagwe ya phemelo, mme lo se ka lwa rekegela makau a gagwe; lo senyetse ruri ntwa yotlhe ya gagwe. ₄Ba tlaa wa ba bolailwe mo fatsheng la Bakalatea, ba phololeditswe mo mebileng ya gagwe. ₅Gonne Iseraele, ga a a latlhwa, le fa e le Juta, ke Modimo wa gagwe, Jehofa wa masomosomo; le fa lefatshe la bone le tletse molato wa go leofela Moitshepi wa Iseraele. ₆Kudubitlegang lo tswe mo gare ga Babilone, mme a mongwe le mongwe a phedise botshelo jwa gagwe; se kgaolelweng mo boikepong jwa gagwe; gonne ke motlha wa pusoloso ya ga Jehofa; o tlaa mo naya tuelo. ₇Babilone e ne e ntse e le senwelo sa gouta mo seatleng sa ga Jehofa, se se tagisitseng lefatshe lotlhe: merafe e nole bojalwa jwa mofine jwa gagwe; ke gone ka moo merafe e tsenwang. ₈Babilone o ole ka tshoganetso, o senyegile; mmokoleleleng, lo tseeleng botlhoko jwa gagwe boroku jo bo alafang, e tle e re kgotsa a fole. ₉Re ne re rata re ka bo re fodisitse Babilone, mme ga a a fola; mo tlhobogeng, mme a re yeng mongwe le mongwe fatsheng la ga gabo, gonne tshekiso ya gagwe e fitlha le kwa legodimong, e tsholetsegile go ya fela kwa loaping.

₁₀“Jehofa o ntsheditse tshiamo ya rona kwa ntle; ntlong a re boleleng mo Sione tiro ya ga Jehofa Modimo wa rona.

₁₁“Gotlhang metswi; tshwarang dithebe thata; Jehofa o tsositse mowa wa dikgosi tsa Bamete; ka gonne o logetse Babilone maano go mo senya, gonne ke pusoloso ya ga Jehofa, pusoloso ya tempele ya gagwe. ₁₂Tlhomelang dithako tsa Babilone mokgele wa tlhabano, lo thatafatse tebelo, tlhomang balebedi, baakanyang ditalelo, gonne Jehofa o logile maano, o bile o dirile se o se buileng ka ga banni ba Babilone. ₁₃Ao, wena yo o agileng mo dinokeng di le dintsi, yo o tletseng mahumo, bokhutlo jwa gago bo tsile, selekanyo sa bopelotshetlha jwa gago. ₁₄Jehofa wa masomosomo o ikanne ka ene ka esi, a re: Ruri ke tlaa go tlatsa ka batho, jaaka e ka bo e le tsie; mme ba tlaa go goelelela.”

₂₄“Babilone le banni botlhe ba Kalatea ke tlaa lefetsa mo go bone bosula jotlhe jwa bone jo ba bo dirileng mo Sione mo ponong ya lona,” go bua Jehofa.

₂₅“Bona, ke tlhabana nao, wena thaba e e senyang, go bua Jehofa, wena yo o senyang lefatshe lotlhe; ke tlaa go otlololela seatla sa me, mme ke tlaa go kgokolosa ke go ntsha kwa mafikeng, ke go ntsha thaba e e šeleng fela. ₂₆Mme ga ba ketla ba tsaya mo go wena lentswe la kgokgotšho, le fa e le lentswe la motheo; mme o tlaa swafala fela ka bosakhutleng, go bua Jehofa.

₂₇“Tlhomang mokgele mo lefatsheng, letsang lonaka mo merafeng, lo mmaakanyetseng merafe, lo mmiletseng magosi a Ararate, le Minni, le Ašekenase; mo laoleleng kgosana ya tlhabano; tlhatlosang dipitse di nne jaaka tsie molomi. ₂₈Mmaakanyetseng merafe go tlhabana nae, dikgosi tsa Bamete, le balaodi ba teng, le balaodisiwa botlhe ba teng, le lefatshe lotlhe la mmuso wa gagwe. ₂₉Lefatshe le a roroma, le mo botlhokong; gonne maikaelelo a Morena ka ga Babilone a eme, a go dira lefatshe la Babilone tshwafalo, le sena monni. ₃₀Diganka tsa Babilone di ithibile go tlhabana, di setse fela mo dikagong tsa tsone tse di thata tsa phemelo; thata ya bone e ngobetse; di ntse jaaka basadi fela; maago a gagwe a tshubilwe ka molelo; mephakalego ya gagwe e robegile. ₃₁Moisa dikwalo o tlaa siana a ya go kgatlhantsha moisa dikwalo yo mongwe, le morongwi yo mongwe o tlaa kgatlhantsha yo mongwe, ba ya go supetsa kgosi ya Babilone fa motse wa yone o gapilwe mo ntlheng tsotlhe; ₃₂le go re, matsibogo a gapilwe, le go re, lotlhaka ba lo fisitse ka molelo, le go re, batlhabani ba tshogile.” ₃₃Gonne Jehofa wa masomosomo, Modimo wa Iseraele o bua jaana, a re: “Morwadia Babilone o ntse jaaka sebopi sa pholelo mo motlheng o se gatwang ka one; e sa le lobakanyana, mme motlha wa thobo o tlaa mo tlela.”

₃₆Ke gone ka moo Jehofa o bua jaana, a re: “Ke tlaa emela mafoko a gago mo tshekong, ke tlaa go lefeletsa; mme ke tlaa tšhisa lewatle la gagwe, ke tlaa kgadisa motswedi wa gagwe. ₃₇Babilone o tlaa nna mekoakoa fela, a nna bonno jwa bophokoje, le kgakgamatso, le kotso, a sena monni. ₃₈Ba tlaa duma mmogo jaaka ditau; ba tlaa karetla jaaka bana ba ditau. ₃₉Ba tlaa re ba gotetse, ke ba direle modiro, ke tlaa ba tagisa, gore ba tle ba tlhapelwe, mme ba robale boroko jo bo sa khutleng, ba se ke ba tlhola ba kubuga,” go bua Jehofa. ₄₀“Ke tlaa ba isa tlhabong jaaka dikwanyana, jaaka diphelefu di na le diphoko.

₄₁“Ana Shešake o gapilwe jang! Pako ya lefatshe lotlhe e tshoganeditswe jang! Babilone o fetogile jang tshwafalo mo merafeng! ₄₂Lewatle le tlhatlogetse mo Babilone; o khurumeditswe ke bontsi jwa makhubu a lone. ₄₃Metse ya gagwe e swafetse, ke lefatshe la lokgere, le sekaka, lefatshe le go sa ageng motho ope mo go lone, le le go sa feteng ngwana ope wa motho ka lone. ₄₄Ke tlaa sekisa Bele mo Babilone, ke tlaa ntsha mo ganong la gagwe se o se komeditseng; mme merafe ga e ketla e tlhola e sailela mmogo kwa go ene. Ee, lorako lwa Babilone lo tlaa wa. ₄₅Batho ba me, tswang mo gare ga gagwe, mme a mongwe le mongwe e iphedise botshelo jwa gagwe mo bogaleng jo bo tukang jwa ga Jehofa. ₄₆A pelo tsa lona di se idibale, se boifeng ka ntlha ya tumedi e e tlaa utlwalang mo lefatsheng; gonne go tlaa tla tumedi ka ngwaga o mongwe, mme morago ga moo ka ngwaga o mongwe go tlaa tla tumedi, le thubakanyo mo lefatsheng, molaodi a tlhabana le molaodi.

₄₇“Ke gone, bonang, metlha e e tla, e ke tlaa sekiseng ditshwantsho tse di setilweng tsa Babilone ka yone, mme lefatshe lotlhe la gagwe le tlaa tlhajwa ke ditlhong; le babolaiwi ba gagwe botlhe ba tlaa wela mo gare ga gagwe. ₄₈Foo legodimo le lefatshe, le tsotlhe tse di mo go lone, di tlaa opela Babilone ka boitumelo; gonne bathopi ba tlaa tla mo go ene ba tswa ntlheng ya botsheka,” go bua Jehofa. ₄₉“Jaaka Babilone a ositse babolaiwi ba Iseraele, jalo fela babolaiwi ba lefatshe lotlhe ba tlaa wa kwa Babilone.”

₅₀“Lona ba lo falotseng mo tšhakeng, tsamayang, lo se ka lwa ema; gakologelwang Jehofa lo le kwa kgakala, mme a Jerusalema a tsene mo mogopolong wa lona. ₅₁‘Re tlhabilwe ke ditlhong, ka re utlwile kgobo; tshosobagano e re bipile difatlhogo, gonne baeng ba tsile mo mafelong a a boitshepo a ntlo ya ga Jehofa.’ ₅₂Ke gone, bonang, metlha e etla,” go bua Jehofa, “e ke tlaa sekisang ditshwantsho tsa gagwe tse di setilweng ka yone; mme ba ba ntshitsweng dintho mo lefatsheng la gagwe lotlhe ba tlaa sonela. ₅₃Le fa Babilone a ka palamela kwa legodimong, le fa a ka thatafatsa bogodimo jwa thata ya gagwe, le fa go ntse jalo bathopi ba tlaa tla mo go ene ba tswa kwa go nna.” Go bua Jehofa.

₅₉Lefoko le Jeremia moperofeti o le laoletseng Seraia morwa Neria morwa Maheseia, jale ka a ya Babilone le Setekia kgosi ya Juta, ka ngwaga wa bone wa puso ya gagwe. Jaana Seraia ya bo e le molebedi yo mogolo wa mantlwana. ₆₀Jeremia a kwala mo lokwalong bosula jotlhe jo bo tlaa tlang mo Babilone, e bong mafoko otlhe a a kwadilweng ka ga Babilone. ₆₁Mme Jeremia a raya Seraia, a re: “Mogang o fitlhang mo Babilone, foo o bone gore o bale mafoko otlhe a, ₆₂o re: ‘Jehofa, aitse o buile ka ga felo fa, go go kgaola, gore go se age ope teng, le fa e le motho le fa e le kgomo, fa e se gore go swafale fela ka bosakhutleng.’ ₆₃Go tlaa dirala go re, fa o sena go wetsa go bala lokwalo lo, o bofele lentswe mo go lone, mme o lo latlhele mo gare ga Euferatese, ₆₄o re: ‘Babilone o tlaa nwela fela jalo, mme ga a ketla a tlhola a biloga ka ntlha ya bosula jo ke tlaa bo ba lapile.’ ”

Mafoko a ga Jeremia a khutla fa.